ក្រសួងព័ត៌មាន ណាត់ជួបជជែកគ្នា នៅថ្ងៃសុក្រនេះ តែលោកម៉ម សូណង់ដូ សុំលើកពេល
លោកស្រី ហួន ផាណារី ជំនួយការផ្ទាល់របស់លោកម៉ម សូណង់ដូ បានឲ្យដឹងនៅព្រឹកថ្ងៃទី១៧ មករានេះថា វិទ្យុសំបុកឃ្មុំ ទើបតែបានទទួលលិខិតកោះអញ្ជើញ របស់ក្រសួងព័ត៌មាន នៅល្ងាចថ្ងៃព្រហស្បតិ៍ ទី១៦ មករា ម្សិលមិញ។ នៅពេលនេះ លោកម៉ម សូណង់ដូ ស្ថិតនៅក្រៅប្រទេស។
លោកស្រី ហួន ផាណារី បានឲ្យដឹងថា លោក ម៉ម សូណង់ដូ នឹងមកដល់កម្ពុជាវិញ នៅថ្ងៃទី២៣ មករា។ ដូច្នេះ លោកម៉ម សូណង់ដូ អាចនឹងជួបលោករដ្ឋមន្ត្រី ខៀវ កាញារីទ្ធ នៅថ្ងៃទី២៤ មករា។
កាលពីថ្ងៃទី១០ មករា លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន បានបញ្ជាក់ក្នុងលិខិត ប្រាប់លោកស្រី ឌិន ផាណារ៉ា ប្រធានស្តីទីវិទ្យុសំបុកឃ្មុំ FM 105 MHz ថា ក្រសួងព័ត៌មាន ពុំមានសល់ហ្វ្រេកង់វិទ្យុ និងហ្វ្រេកង់ទូរទស្សន៍ សម្រាប់ផ្តល់ឲ្យវិទ្យុសំបុកឃ្មុំទេ។ នេះជាចម្លើយតបទៅនឹងករណីវិទ្យុសំបុកឃ្មុំ របស់លោកម៉ម សូណង់ដូ បានស្នើសុំហ្វ្រេកង់វិទ្យុ និងហ្វ្រេកង់ទូរទស្សន៍ របស់ស្ថានីយវិទ្យុសំបុកឃ្មុំ។
លិខិតចុះថ្ងៃទី១០ ខែមករា ឆ្នាំ២០១៤ ចុះហត្ថលេខាដោយ លោក ខៀវ កាញារីទ្ធ បានបញ្ជូនទៅដល់ស្ថានីយវិទ្យុសំបុកឃ្មុំ នៅថ្ងៃទី១៤ ខែមករា ឆ្នាំ២០១៤។
លិខិតរបស់លោករដ្ឋមន្ត្រីក្រសួងព័ត៌មាន ខាងលើនេះ ត្រូវបានគេផ្សព្វផ្សាយ តែប៉ុន្មានម៉ោង ក្រោយពីលោក ម៉ម សូណង់ដូ ប្រធានវិទ្យុសំបុកឃ្មុំ បានដាក់លិខិតជូនដំណឹងជាថ្មី ទៅកាន់អភិបាលរាជធានី ដើម្បីធ្វើបាតុកម្ម រៀងរាល់សប្តាហ៍ ចាប់ពីថ្ងៃចន្ទ ដល់ថ្ងៃសុក្រ។
លោក ម៉ម សូណង់ដូ ប្រធានវិទ្យុសំបុកឃ្មុំ បានសរសេរលិខិត ជាលើកទី២ ដាក់ជូនលោក ប៉ា សុជាតិវង្ស អភិបាលរាជធានីភ្នំពេញ ដើម្បីស្នើសុំធ្វើបាតុកម្ម ជារៀងរាល់សប្តាហ៍ ចាប់ពីថ្ងៃចន្ទ ដល់ថ្ងៃសុក្រ។ លិខិតនោះ ចុះថ្ងៃទី១៤ ខែមករា ឆ្នាំ២០១៤ បញ្ជូនទៅកាន់អភិបាលរាជធានីភ្នំពេញ កាលពីរសៀលថ្ងៃអង្គារ ទី១៤មករា។
លោក ម៉ម សូណង់ដូ បានលើកឡើង ក្នុងលិខិតថា ចាប់ពីថ្ងៃចន្ទ ទី២៧ ខែមករា ឆ្នាំ២០១៤ តទៅ លោកនឹងដឹកនាំបាតុករ ចំនួនតិចជាង ២០០ នាក់ ធ្វើបាតុកម្ម រៀងរាល់សប្តាហ៍ ចាប់ពីថ្ងៃចន្ទ ដល់ថ្ងៃសុក្រ ដោយជួបជុំគ្នា នៅទីលានប្រជាធិបតេយ្យ វេលាម៉ោង ៧ ព្រឹក ហើយដង្ហែក្បួនបាតុកម្ម ឆ្ពោះទៅកាន់ក្រសួងព័ត៌មាន នៅវេលាម៉ោង ៨ ព្រឹក ដល់ម៉ោង ១២ ថ្ងៃត្រង់ ដើម្បីទាមទារឲ្យក្រសួងព័ត៌មាន អនុញ្ញាតឲ្យវិទ្យុសំបុកឃ្មុំ តម្លើងកម្លាំងផ្សាយបន្តទៅតាមខេត្ត ( Relay ) និងសុំហ្វ្រេកង់ សម្រាប់បង្កើតទូរទស្សន៍ ទៅតាមសំណូមពរ របស់ប្រជាពលរដ្ឋ រាប់លាននាក់ នៅក្នុងព្រះរាជាណាចក្រកម្ពុជា។
រហូតដល់ព្រឹកថ្ងៃទី១៧ ខែមករា ឆ្នាំ២០១៤ លោក ឡុង ឌីម៉ង់ អ្នកនាំពាក្យសាលារាជ ធានីភ្នំពេញ បានបញ្ជាក់ថា ផ្នែករដ្ឋបាលសាលារាជធានីភ្នំពេញ បានបញ្ជូនលិខិតរបស់លោក ម៉ម សូណង់ដូ ជូនលោកអភិបាលរាជធានី ដើម្បីពិនិត្យ និងសម្រេចហើយ។
សូមរម្លឹកថា កាលពីថ្ងៃទី២៧ ខែធ្នូ ឆ្នាំ២០១៣ លោកម៉ម សូណង់ដូ បានសរសេរលិខិតម្តងរួចមកហើយ ដាក់ទៅកាន់លោកអភិបាលសាលារាជធានីភ្នំពេញ ដើម្បីស្នើសុំធ្វើបាតុកម្មរៀងរាល់ថ្ងៃដូចគ្នានេះ នៅមុខក្រសួងព័ត៌មាន ចាប់ពីថ្ងៃទី២៩ ខែធ្នូ ឆ្នាំ២០១៣។ ប៉ុន្តែកាលណោះ អភិបាលរាជធានីភ្នំពេញ មិនអនុញ្ញាត ព្រោះពេលនោះ គណបក្សសង្គ្រោះជាតិ និងកម្មកររោងចក្រកាត់ដេរ កំពុងធ្វើបាតុកម្ម រៀងរាល់ថ្ងៃ នៅទីលានប្រជាធិបតេយ្យ៕
ប្រភពពី CEN
