ដីមណ្ឌលព័ត៌មានទេសចរណ៍ខេត្តកោះកុង ក្លាយជាសាច់ជ្រូកបីជាន់
កោះកុង:
ទីតាំងមណ្ឌលព័ត៌មានទេសចរណ៍ខេត្តកោះកុង ដែលសិ្ថតនៅតាមបណ្តោយ
ឆ្នេរព្រែកកោះប៉ោ ក្នុងសង្កាត់ស្មាច់មានជ័យ ក្រុងខេមរភូមិន្ទ
ដែលធ្លាប់តែមានសោភ័ណភាព និងជាទីកន្លែង សម្រាប់ផ្តល់ព័ត៌មាន
ដល់ភ្ញៀវទេសចរជាតិ និងអន្តរជាតិនោះ បច្ចុប្បន្ន ត្រូវបានលោកប៊ុន បៀវ
ប្រធានមនី្ទរទេសចរណ៍ខេត្តកោះកុង ពុះជាកង់ៗ ជួលឲ្យឯកជន
ធើ្វអាជីវកម្ម សើ្ទរតែមើលលែងយល់ហើយ។
មជ្ឈដ្ឋានជាច្រើន នៅខេត្តកោះកុង បានសំដែងនូវការរិះគន់
ដោយចាត់ទុកថា ការពុះជ្រៀកដីនៅទីនោះ ជួលទៅឲ្យឯកជន
គឺជារឿងមួយពុំត្រឹមត្រូវឡើយ ព្រោះទីតាំងនោះកន្លងមក
គឺជាមណ្ឌលសម្រាប់ចែកចាយព័ត៌មាន ជូនដល់ភ្ញៀវទេសចរណ៍មកពីទីជិតឆ្ងាយ
ហើយវាក៏ជាដីរបស់រដ្ឋផងដែរ ដូចនេះ គេមិនគួរយកទីតាំងខាងលើ
ជួលទៅឲ្យឯកជន ធើ្វជាកន្លែងលក់ដូរទេ។
ប្រភពមួយនៅក្នុងខេត្តកោះកុង បានបងើ្ហបឲ្យដឹងថា សព្វថៃ្ងនេះ
មិនត្រឹមតែទីតាំងខាងលើទេ ដែលគេពុះជួលទៅឲ្យឯកជន
សូម្បីតែដីមន្ទីរ ក៏លោកប្រធានមនី្ទរ ពុះចែកជាពីរដែរ
ហើយដីដែលពុះនោះ មិនដឹងថា លោកប្រធាន ពុះយកខ្លួនឯង
ឬក៏យកទៅឲ្យអ្នកណាទេ គឺកូនចៅ ពុំមាននរណាម្នាក់បានដឹងឡើយ។
ដីមណ្ឌលព័ត៌មានទេសចរណ៍ និងដីមន្ទីរទេសចរខេត្តកោះកុង ត្រូវបានប្រធានមនី្ទរ ពុះជួល និងយកដោយស្ងាត់ៗ
ប្រភពខាងលើ បានបន្តថា កាលពីជំនាន់ លោកយុទ្ធ ភូថង
ធើ្វជាចៅហ្វាយខេត្តនោះ លោកប៊ុន បៀវ បានសើ្នសុំដីខេត្ត
បានចំនួនពីរកន្លែង គឺមួយកន្លែងសម្រាប់សាងសង់មនី្ទរ
និងមួយកន្លែងសម្រាប់សាងសង់ ជាមណ្ឌលព័ត៌មានទេសចរណ៍។
តែមកដល់សព្វថៃ្ង ដីមណ្ឌលព័ត៌មានទេសចរណ៍ ត្រូវបានពុះជួលជាកង់ៗ
ទៅឲ្យឯកជន។ ចំណែកដីមនី្ទរវិញ ត្រូវបានលោកប្រធានមនី្ទរ
ពុះយកពាក់កណ្តាល ដោយស្ងាត់ៗ ហើយដោយខ្លាចកូនចៅផ្ទុះបាតុភាព
លោកប្រធានមនី្ទរ ក៏បានយកដីរដ្ឋនៅខាងក្រោយមនី្ទរ
ពុះចែកឲ្យកូនចៅ ក្នុងម្នាក់ៗ ទទឹង៥ម៉ែត្រ និងបណ្តោយ១០ម៉ែត្រ
ដើម្បីបិទមាត់។
ជុំវិញភាពមិនប្រក្រតី ក្នុងការពុះដីជួល និងយកដោយស្ងាត់ៗនេះ
លោកប៊ុន បៀវ ប្រធានមនី្ទរទេសចរណ៍ខេត្តកោះកុង មិនអាចទំនាក់ទំនង
សុំការបញ្ជាក់បានទេ កាលពីព្រឹកថៃ្ងទី១៥ ខែមករាឆ្នាំ២០១៤នេះ។
ប្រភពខាងលើ ក៏បានសំណូមពរផងដែរ ដល់លោករដ្ឋមន្រី្តក្រសួងទេសចរណ៍ មេត្តាត្រួតពិនិត្យមើល ភាពមិនប្រក្រតីទាំងនេះផង៕
ប្រភពពី CEN
