Nokia Lumia 929 អាចនឹងត្រូវបញ្ចេញនៅក្នុងខែមករា ឆ្នាំ២០១៤
កាលពីខែតុលាក្រុមហ៊ុន Nokia បានបញ្ចេញទូរស័ព្ទទំនើបប្រភេទ Phablet ចំនួនពីរម៉ូដែលគឺ Nokia Lumia 1320 និង Lumia 1520 ហើយបន្ទាប់មកក៏មានលេចចេញនូវពាក្យចចាមអារ៉ាមមួយចំនួនថាក្រុមហ៊ុននឹងបញ្ចេញ Phablet មួយម៉ូដែលទៀតដែលមានឈ្មោះថា Lumia 929 ។
ដោយឡែកសម្រាប់ពេលនេះនៅខណៈដែលក្រុមហ៊ុន Nokia មិនទាន់មានបញ្ជាក់ជាផ្លូវការថានឹងប្រកាសចេញ Lumia 929 នៅក្នុងកាលបរិច្ឆេទណាមួយឲ្យប្រាកដនោះ ស្រាប់តែប្រភពពីគេហទំព័រ UnwiredView បានរាយការណ៍ថា Nokia នឹងបង្ហាញ Lumia 929 នៅក្នុងពិព័រណ៍គ្រឿងអេឡិចត្រូនិកអន្ដរជាតិ CES 2014 ដែលនឹងប្រព្រឹត្តទៅនៅដើមខែមករា ឆ្នាំ២០១៤ ខាងមុខនេះ ។ ប្រភពដដែលក៏បានឲ្យដឹងទៀតថាទូរស័ព្ទទំនើបរបស់ Nokia មួយម៉ូដែលនោះអាចនឹងមានឈ្មោះថា Lumia Icon ហើយនឹងត្រូវប្រគល់សិទ្ធិចែកចាយឲ្យទៅក្រុមហ៊ុន Verizon សម្រាប់ទីផ្សារសហរដ្ឋ ដោយនឹងត្រូវចេញលក់ជាលើកដំបូងនៅថ្ងៃទី១៦ មករា ឆ្នាំ២០១៤ ។
ចំពោះលក្ខណសម្បត្តិបច្ចេកទេសជាផ្លូវការរបស់ទូរស័ព្ទទំនើបមួយនេះ Nokia មិនបានបញ្ចេញឲ្យដឹងជាផ្លូវការទេ ប៉ុន្តែបើយោងតាមពាក្យចចាមអារ៉ាមនាពេលកន្លងមកថា Lumia 929 ឬ Lumia Icon នឹងមានតួធ្វើពីលោកហធាតុ និងដំណើរការដោយប្រព័ន្ធប្រតិបត្តិការ Windows Phone 8 ។
លក្ខណសម្បត្តិបច្ចេកទេសរបស់ Lumia 929 ឬ Lumia Icon ដែលទទួលបានពីប្រភពចចាមអារ៉ាមទាំងនោះរួមមានដូចខាងក្រោម៖
- អេក្រង់ទំហំ 5-inch
- បច្ចេកវិទ្យាអេក្រង់ AMOLED
- កម្រិតភាពច្បាស់ 1,080p Full HD
- CPU Quad-core 2.2GHz (Snapdragon 800)
- GPU Adreno 330
- RAM 2 GB
- អង្គផ្ទុកទិន្នន័យជាប់ម៉ាស៊ីនទំហំ 32 GB (មិនអាចបន្ថែម microSD card ទេ)
- មានបំពាក់ដោយបច្ចេកវិទ្យា NFC, GPS, LTE, Wi-Fi 802.11 ac Bluetooth 4.0 និងអាចបញ្ចូលថាមពលដោយឥតប្រើខ្សែ (wireless charging)
- កាមេរ៉ាទំហំ 20 MP PureView (មាន flashes ពីរ ឬ dual-Flash)
- ដំណើរការដោយប្រព័ន្ធប្រតិបត្តិការ Windows Phone 8
- ថាមពលថ្ម 2,510mAh
សូមបញ្ជាក់ថាទាំងនេះគឺជាលក្ខណសម្បត្តិបច្ចេកទេសដែលទទួលបានតាមរយៈប្រភពពី GSMarena និងមិនទាន់ត្រូវបញ្ជាក់ដោយ Nokia នៅឡើយទេ ប៉ុន្តែគេរំពឹងថាទូរស័ព្ទទំនើប Lumia 929 ឬ Lumia Icon អាចនឹងមានតម្លៃប្រហែល $500 ៕
