មានអញ្ចឹងដែរ គ្រូមីយ៉ាន់ម៉ាអត់ដឹងគេគិតតាមរូបមន្ត head-to-head?
ខូចចិត្តរហូតស្រក់ទឹកភ្នែក
និងកំហឹងពុះកញ្ជ្រោលរហូតផ្ទុះអំពើហិង្សា
គឺជាអារម្មណ៍ពិតរបស់អ្នកគាំទ្រក្រុមបាល់ទាត់ម្ចាស់ផ្ទះមីយ៉ាន់ម៉ានៅព្រឹត្តិការណ៍កីឡាស៊ីហ្គេម ក្រោយក្រុមបាល់ទាត់របស់ខ្លួនបានធ្លាក់ចេញពីការប្រកួត ដោយសារចាញ់ឥណ្ឌូណេស៊ី ១-០ ក្នុងប្រកួតចុងក្រោយនៃវគ្គជម្រុះតាមពូលកាលពីយប់មិញ។
អ្នកគាំទ្រម្នាក់អង្គុយយំក្រោយមីយ៉ាន់ម៉ាធ្លាក់ចេញពីការប្រកួត
ដូចដែលប្រិយមិត្តបានដឹងហើយថា
មីយ៉ាន់ម៉ាធ្លាក់ចេញពីការប្រកួតនៅមុខអ្នកគាំទ្ររបស់ខ្លួននេះ
គឺដោយសាររូបមន្ត head-to-head
ពោលគឺក្រុមនេះមានពិន្ទុ៧ស្មើឥណ្ឌូណេស៊ីដែរ
ហើយថែមទាំងលើសគ្រាប់បាល់ចំណេញទៀតផង
ប៉ុន្តែត្រូវធ្លាក់ដោយសារចាញ់ឥណ្ឌូណេស៊ីនេះតែម្ដង។
អ្វីដែលគួរឲ្យភ្ញាក់ផ្អើល
គឺគ្រូបង្វឹករបស់មីយ៉ាន់ម៉ា Park Sung Hwa បានបញ្ជាក់ថា
លោកមិនបានដឹងមុនថាគេគិតតាមរូបមន្តនេះទេ។
និយាយឲ្យចំគឺលោកយល់ច្រឡំ
ស្មានតែក្រុមលោកនៅតែអាចជាប់ទៅវគ្គពាក់កណ្ដាលផ្ដាច់ព្រ័ត្រ
ទោះចាញ់ ១-០ ក៏ដោយ ត្បិតមានគ្រាប់បាល់សំណល់ច្រើនលើសឥណ្ឌូណេស៊ី
(មុនប្រកួត មីយ៉ាន់ម៉ាចំណេញគ្រាប់បាល់៥គ្រាប់
ឯឥណ្ឌូណេស៊ីខាត២គ្រាប់)។
គ្រូបង្វឹកសញ្ជាតិកូរ៉េខាងត្បូងរូបនេះ
បាននិយាយក្នុងសន្និសីទកាសែតក្រោយចប់ការប្រកួតថា ៖
“ខ្ញុំមិនបានដឹងជាមុននោះទេ
ដូច្នេះខ្ញុំបានបង្កើតកំហុសចំពោះការរៀបទម្រង់លេង
ក៏ដូចជាបច្ចេកទេសនៃការលេងរបស់កីឡាករ”។
គ្រូបង្វឹកមីយ៉ាន់ម៉ា Park Sung Hwa (កណ្ដាល) មិនអស់ចិត្ត (រូបភាព៖ Kyaw Zeyar Myint)
កីឡាករមីយ៉ាន់ម៉ាយំក្រោយចប់ការប្រកួត (រូបភាព៖ Kyaw Zeyar Myint)
អ្នកគាំទ្រមីយ៉ាន់ម៉ាដុតអាវរូបទង់ជាតិខ្លួនឯងបញ្ចេញកំហឹងក្រោយចាញ់ការប្រកួត
ការធ្លាក់ក្នុងដីខ្លួនឯងដោយមិនអស់ចិត្តនេះហើយ
បានបង្កឲ្យមានការផ្ទុះកំហឹងយ៉ាងខ្លាំងពីសំណាក់អ្នកគាំទ្រមួយ
ចំនួនរហូតបង្កជាអំពើហិង្សា ខណៈក្រុមកីឡាករ
និងអ្នកគាំទ្រមួយចំនួនទៀតបានត្រឹមស្រក់ទឹកភ្នែកទាំងគួរឲ្យ
សោកស្ដាយប៉ុណ្ណោះ។ប្រិយមិត្តយល់យ៉ាងណាដែរចំពោះការលើកឡើងរបស់គ្រូបង្វឹកក្រុមមីយ៉ាន់ម៉ា?
