ស្លាកលេខម៉ូតូនឹងធ្វើត្រឹមច្រកចេញចូលតែមួយ សាលាខណ្ឌនៅឆ្នាំក្រោយ
ភ្នំពេញ: ការធ្វើស្លាកលេខម៉ូតូចាប់ពីដើមខែមករាឆ្នាំ២០១៤នេះគឺធ្វើនៅការិយាល័យច្រកចេញចូលតែមួយរបស់ខណ្ឌដោយមិនចាំបាច់ទៅធ្វើនៅមន្ទីរសាធារណការនិងដឹកជញ្ជូនរាជធានីភ្នំពេញដូចមុនទៀតនោះទេ។នេះបើតាមការបញ្ជាក់លោកអភិបាលខណ្ឌទួលគោក លោកឯក ឃុនដឿន។
លោកអភិបាលខណ្ឌ បានចូលរួមក្នុងកិច្ចប្រជុំសាមញ្ញលើកទី៥៥ របស់ក្រុមប្រឹក្សា ខណ្ឌទួលគោក កាលពីព្រឹកថ្ងៃទី៥ខែធ្នូ។នាពេលនោះលោកបញ្ជាក់ថា មានក្រសួងចំនួនប្រាំបួន រួមមានៈ ទី១.ក្រសួងអប់រំយុវជននិងកីឡា,ទី២.ក្រសួងសុខាភិបាល,ទី៣.ក្រសួងរៀបចំដែនដីនគររូបនីយកម្មនិងសំណង់ ,ទី៤.ក្រសួងសាធារណការនិងដឹកជញ្ជូន,ទី៥.ក្រសួងទេសចរណ៍,ទី៦.ក្រសួងវប្បធម៌និងវិចិត្រសិល្បៈ ,ទី៧.ក្រសួងឧស្សហកម្ម,ទី៨.ក្រសួងកសិកម្មរុក្ខាប្រមាញ់និងនេសាទនិងក្រសួងពាណិជ្ជកម្មបានធ្វើប្រតិភូកម្មអំណាចមកឱ្យថ្នាក់ខណ្ឌជាអ្នកសម្រេចក្នុងកិច្ចការរបស់ខ្លួន។លោកបានបន្ថែមថាមន្ត្រីថ្នាក់ដឹកនាំការិយាល័យច្រកចេញចូលតែមួយនេះត្រូវបានបោះឆ្នោតជ្រើសរើសដោយក្រុមប្រឹក្សាខណ្ឌទាំងអស់ព្រមទាំងមានតំណាងអាជីវកររកស៊ីធំៗ នៅក្នុងខណ្ឌ និងមានតំណាងអង្គការមិនមែនរដ្ឋាភិបាល ចូលរួមផងដែរ។
លោកអភិបាលខណ្ឌបានបញ្ជាក់ថារាជរដ្ឋាភិបាលបានបង្កើតឱ្យមានការិយាល័យច្រកចេញ ចូលតែមួយនេះឡើង ក្នុងគោលបំណងបង្ខិតឱ្យកាន់តែជិតបំផុត ក្នុងការផ្តល់សេវាផ្សេងៗ ជូនប្រជាពលរដ្ឋ បង្កភាពងាយស្រួលដល់ប្រជាជនបានចំណេញពេលវេលា និងមិនខាតបង់ថវិកាច្រើន។
ដោយឡែកសម្រាប់ការងារសំណង់ខណ្ឌត្រូវបានថ្នាក់ជាតិប្រតិភូកម្មអំណាចឱ្យមានសិទ្ធិសម្រេចលើការសាងសង់ ក្នុងទំហំដី៥០០ម៉ែត្រការ៉េ។នេះគឺជាការបញ្ជាក់របស់លោក ឯក ឃុនដឿន៕
ប្រភពពី CEN
