មន្ត្រីបក្សនឹងប្តឹងមេដឹកនាំ ហ៊្វុនស៊ិនប៉ិច
លោក សុខ សាវ៉ាន់ សមាជិកគណៈកម្មការនាយករបស់គណបក្ស ហ៊្វុនស៊ិនប៉ិច បាន ចោទលោក ញឹក ប៊ុនឆៃ អគ្គលេខាធិការគណបក្ស ហ្វ៊ុនស៊ិនប៉ិច និងប្រធានគណបក្ស ហ៊្វុនស៊ិនប៉ិច ព្រះអង្គម្ចាស់ក្សត្រិយ៍ អរុណ រស្មី និងស្វាមី លោក កែវ ពុទ្ធរស្មី ពីបទឃុបឃិតលក់ទ្រព្យសម្បត្តិបក្សដោយមិនសុំការឯកភាពពី សំឡេងភាគច្រើននៃគណៈកម្មការនាយក។ លោក សាវ៉ាន់ បានថ្លែងបន្តថា៖ «យើងកំពុងសិក្សាជាមួយមេធាវីរបស់យើងដើម្បីរៀបចំពាក្យបណ្តឹងទៅ តុលាការដើម្បីថែរក្សាកេរដំណែលនយោបាយ និងទ្រព្យសម្បត្តិរបស់សម្តេច ឪ នរោត្តម សីហនុ ហើយការរៀបចំដាក់បណ្តឹងនេះនឹងមិនយូរលើសពីខែនេះទេ»។ លោកបន្តថា មានតែសមាជិកចំនួន ១៦០ រូបប៉ុណ្ណោះក្នុងចំណោមសមាជិកសរុបចំនួន ៣៤០ រូបនៃគណៈកម្មការនាយករបស់គណបក្ស ហ៊្វុនស៊ិនប៉ិច បានចូលរួមកិច្ចប្រជុំកាលពីថ្ងៃ ទី២២ ខែ ធ្នូ នៅទីស្នាក់ការកណ្តាល ហើយដែលនេះជាការផ្ទុយនឹងលក្ខន្តិកៈរបស់បក្ស។
លោក សាវ៉ាន់ ដែលជាបេក្ខជនតំណាងរាស្ត្រ របស់គណបក្ស ហ៊្វុនស៊ិនប៉ិច ឈរឈ្មោះនៅខេត្ត ព្រៃវែង ផងដែរនោះបានថ្លែងថា៖ «កិច្ចប្រជុំនោះគឺខុសច្បាប់ពីព្រោះវាផ្ទុយនឹង លក្ខន្តិកៈបក្ស ដែលមានសមាជិកតែ ១៦០ នាក់ប៉ុណ្ណោះបានចូលរួមការប្រជុំនោះហើយមិនអាចស្មើនឹងសំឡេងភាគ ច្រើនដែលត្រូវសុំការអនុម័តចំពោះការលក់ទីស្នាក់ការនោះទេ»។ លោកបានថ្លែងបន្តថា មេដឹកនាំគណបក្ស ហ៊្វុនស៊ិនប៉ិច មិនបានបង្ហាញបំណុលពីមុនពេលការរួមបញ្ជូលគណបក្សទេ ប៉ុន្តែនៅកិច្ចប្រជុំថ្ងៃ ទី២២ ធ្នូ គណបក្សត្រូវការលក់ទីស្នាក់ការដើម្បីជម្រះបំណុលចំនួន ៨០ ម៉ឺនដុល្លារនៅធនាគារ កាណាឌីយ៉ា។ លោក សាវ៉ាន់ បានថ្លែងបន្តថា គណបក្សមិនអាចរស់រានពីការលក់ទីស្នាក់ការ ដើម្បីធ្វើនយោបាយពីការបោះឆ្នោតអាណត្តិមួយទៅអាណត្តិមួយទៀតបានទេ គណបក្សត្រូវការកំណែទម្រង់។ លោក សាវ៉ាន់ បានថ្លែងបន្តថា៖ «យើងបានប្តេជ្ញានិងរក្សាឲ្យរស់រាននូវកេរដំណែលនយោបាយ និងទ្រព្យសម្បត្តិរបស់សម្តេច ឪ នរោត្តម សីហនុ ដែលបានបង្កើតគណបក្ស ហ៊្វុនស៊ិនប៉ិច»។ «ការលក់ទ្រព្យសម្បត្តិរបស់គណបក្សគឺជាសកម្មភាពបំផ្លាញកេរដំណែល របស់សម្ដេចឪ»។
លោកបានថ្លែងបន្តថា មន្ត្រីគណបក្សនឹងមិនប្រឆាំងទេ ប្រសិនបើថ្នាក់ដឹកនាំគណបក្ស ហ៊្វុនស៊ិនប៉ិច លក់ទ្រព្យសម្បត្តិរបស់ខ្លួននិងប្រើប្រាស់ថវិកាដើម្បីសាងសង់ ហេដ្ឋារចនាសម្ព័ន្ធសាធារណៈ ដូចជា សួនច្បារ សាលារៀន ដោយដាក់ឈ្មោះសម្តេច ឪ មិនមែនដាក់ហោប៉ៅផ្ទាល់ខ្លួនរបស់ថា្នក់ដឹកនាំនោះទេ។
គណបក្ស ហ៊្វុនស៊ិនប៉ិច មិនបានឈ្នះអាសនៈសភាណាមួយនៅក្នុងការបោះឆ្នោតជាតិ កាលពីថ្ងៃ ទី២៨ ខែកក្កដា ដែលបានធ្វើឲ្យគណបក្សនេះមិនបានចូលរួមនៅក្នុងរដ្ឋាភិបាល ប៉ុន្តែទោះយ៉ាងណាក្តី ពួកគេនៅមានតំណែងក្រុមប្រឹក្សាឃុំសង្កាត់ចំនួន ១៦០ រួមជាមួយ ៥៣ របស់គណបក្ស នរោត្តម រណឫទ្ធិ។
ចាប់តាំងពីគណបក្ស ប្រជាជនកម្ពុជា បានបណ្តេញគណបក្ស ហ៊្វុនស៊ិនប៉ិច ចេញពី អំណាច បន្ទាប់ពីការវាយប្រយុទ្ធគ្នាដ៏បង្ហូរឈាម នៅកណ្តាលរាធានីភ្នំពេញ កាលពីខែ កក្កដា ឆ្នាំ ១៩៩៧ រួមទាំងជម្លោះផ្ទៃក្នុងជាបន្តបន្ទាប់ផងនោះ បានធ្វើឲ្យគណបក្សនេះធ្លាក់ចុះឥទ្ធិពលជាបន្តបន្ទាប់។
មន្រ្តី គណបក្ស ហ៊្វុនស៊ិនប៉ិច ម្នាក់ទៀត សុំមិនបញ្ចេញឈ្មោះ ដែលបានមកការិយាល័យ ភ្នំពេញ ប៉ុស្តិ៍ កាលពីដើមខែនេះ បានសម្ដែងការខឹងសម្បាស្រដៀងគ្នាជាមួយលោក សាវ៉ាន់ ថាគណបក្សធ្លាក់ឥទ្ធិពលដោយសារការមិនមានតម្លាភាពនិងបក្ខពួកនិយម។
ទោះយ៉ាងណាលោក ញឹក ប៊ុនឆៃ កាលពីម្សិលមិញបានបដិសេធចំពោះការចោទប្រកាន់របស់លោក សាវ៉ាន់ ប៉ុន្តែបានទទួលស្គាល់ថាការលក់ទីស្នាក់ការកំពុងស្ថិតក្នុង ការពិចារណាដោយគណៈកម្មការនាយកនៅឡើយ៕
ប្រភពពី ភ្នំពេញ ប៉ុស្តិ៍
