កម្ពុជា ៖ បោះឆ្នោតសាជាថ្មីក៏មិនអាច បង្កើតគណៈកម្មការឯករាជ្យស៊ើប អង្កេតភាពមិនប្រក្រតីនៃ ការបោះឆ្នោតក៏មិនហ៊ាន
ក្រោយការប្រកាសលទ្ធផលនៃការបោះឆ្នោតជ្រើសតាំងតំណាងរាស្ត្រនីតិកាលទី៥ ដោយគណៈកម្មាធិការជាតិរៀបចំការបោះឆ្នោត “គ.ជ.ប” កាលពីថ្ងៃទី០៨ ខែកញ្ញា ឆ្នាំ២០១៣មក គឺមានរយៈពេល៣ខែហើយ ប៉ុន្តែគណបក្សសង្គ្រោះជាតិមិនទាន់អស់ចិត្តនិងយល់ព្រមទទួលស្គាល់ លទ្ធផលនៃការបោះឆ្នោតនេះនៅឡើយ ដោយដឹកនាំក្រុមអ្នកគាំទ្រគណបក្សរបស់ខ្លួនធ្វើបាតុកម្មតវ៉ាជាហូរហែ អស់ជាច្រើនលើកច្រើនសា ដើម្បីឲ្យមានការបង្កើតគណៈកម្មការចម្រុះឯករាជ្យស៊ើប អង្កេតភាពមិនប្រក្រតីនៃការបោះឆ្នោត ក្នុងគោល បំណងឲ្យគណបក្សឈ្នះឆ្នោតបានឈ្នះដោយថ្លៃថ្នូរ និងគណបក្សចាញ់ឆ្នោតបានចាញ់ដោយអស់ចិត្ត ។
ការទាមទាររបស់គណបក្សសង្គ្រោះជាតិដែលស្នើសុំបង្កើតគណៈកម្មការចម្រុះឯករាជ្យ ស៊ើបអង្កេតភាពមិនប្រក្រតីនៃការបោះឆ្នោតចាប់តាំងពី គ.ជ.ប ប្រកាសលទ្ធផលឆ្នោតបណ្តោះអាសន្នភ្លាមៗនោះ ត្រូវបានច្រានចោលដោយគណបក្សប្រជាជនកម្ពុជា ដោយគណបក្សកាន់អំណាចនេះអះអាងថា ជាការរំលោភបំពានលើច្បាប់របស់កម្ពុជា ព្រោះការដោះស្រាយភាពមិនប្រក្រតីនៃការបោះឆ្នោត គឺជាសមត្ថកិច្ចរបស់ គ.ជ.ប និងក្រុមប្រឹក្សាធម្មនុញ្ញ ។
ដោយសារជំហររបស់គណបក្សប្រជាជនកម្ពុជា ដែលជាគណបក្សនយោបាយឈ្នះឆ្នោតមិនយល់ស្របទៅនឹងការទាមទាររបស់ខ្លួន និងដោយយល់ឃើញថា ទាំង គ.ជ.ប ទាំងក្រុមប្រឹក្សាធម្មនុញ្ញ សុទ្ធតែដង្ហែគាំទ្រគណបក្សប្រជាជនកម្ពុជា មិនអាចទុកចិត្តបាន ទើ់បគណបក្សសង្គ្រោះជាតិសម្រេចយកជម្រើសចុងក្រោយ គឺធ្វើបាតុកម្មប្រឆាំងតវ៉ាអស់ជាច្រើនលើកច្រើនសា ខណៈដែលអ្នកតំណាងរាស្ត្រជាប់ឆ្នោតរបស់គណបក្សប្រឆាំងមួយនេះចំនួន៥៥រូបមិនទាន់យល់ព្រមចូលរួមកាន់តំណែងក្នុងរដ្ឋសភាឡើយ ។
ក្នុងឱកាសប្រារព្ធទិវាសិទ្ធិមនុស្សអន្តរជាតិខួបលើកទី៦៥ ថ្ងៃទី១០ ខែធ្នូ ឆ្នាំ២០១៣ម្សិលមិញនេះ ទាំងឯកឧត្តម សម រង្ស៊ី ទាំងឯកឧត្តម កឹម សុខា ជាប្រធាន និងអនុប្រធានគណបក្សសង្គ្រោះជាតិ បានបង្ហាញនូវជំហររបស់ខ្លួនថា ចង់ឲ្យសម្តេចអគ្គមហាសេនាបតីតេជោ ហ៊ុន សែន អនុប្រធានគណបក្សប្រជាជនកម្ពុជា និងជានាយករដ្ឋមន្ត្រីនៃព្រះរាជាណាចក្រកម្ពុជាអាណត្តិទី៥ រហស្សនាម”បុរសខ្លាំង” យកគំរូតាមលោកជំទាវ យីងឡាក់ ស៊ីណាវ៉ាត្រា នាយករដ្ឋមន្ត្រីនៃព្រះរាជាណាចក្រថៃ ដែលមានសេចក្តីក្លាហានហ៊ានស្នើសុំរំលាយរដ្ឋសភា និងរៀបចំឲ្យមានការបោះឆ្នោតសាជាថ្មីឡើងវិញ បន្ទាប់ពីក្រុមបាតុករគណបក្សប្រជាធិបតេយ្យរបស់លោក អាប់ភីស៊ីត វេចាជីវ៉ា ធ្វើបាតុកម្មតវ៉ាយ៉ាងខ្លាំងក្លាអស់ជាច្រើនថ្ងៃរួចមក ។
មជ្ឈដ្ឋានអ្នកវិភាគនយោបាយឯករាជ្យនៅកម្ពុជា បានលើកឡើងថា ថ្វីដ្បិតជាប្រទេសក្បែរខាងភូមិផងរបងជាមួយ ជាប្រទេសសមាជិកសមាគមអាស៊ានដូចគ្នា និងជាប្រទេសមានវប្បធម៌ស្រដៀងគ្នាពិតមែន ប៉ុន្តែថៃមិនដូចកម្ពុជាទេ គឺទាំងស្តេចថៃក៏មិនដូចស្តេចខ្មែរ ទាំងរដ្ឋសភាថៃ ក៏មិនដូចរដ្ឋសភាខ្មែរ ទាំងនាយករដ្ឋមន្ត្រីថៃក៏មិនដូចនាយករដ្ឋមន្ត្រីខ្មែរ ទាំងកងកម្លាំងប្រដាប់អាវុធថៃ ក៏មិនដូចកងកម្លាំងប្រដាប់អាវុធខ្មែរ ទាំងតុលាការថៃ ក៏មិនដូចតុលាការខ្មែរ…ដូច្នេះ វាទំនងពិបាកណាស់ដែលចង់ឲ្យស្ថានការណ៍នយោបាយខ្មែរដោះស្រាយតាមរបៀបថៃនោះ ដ្បិតនាយករដ្ឋមន្ត្រីគ្មានអនុវត្តន៍យុទ្ធសាស្ត្រ “ឈ្នះ-ឈ្នះ” ដូចនាយករដ្ឋមន្ត្រីខ្មែរទេ ។
រួមសេចក្តីមក វាសនានៃប្រទេសកម្ពុជា ក៏ដូចជាវាសនារបស់ប្រជាពលរដ្ឋកម្ពុជាខ្លួនឯងទៅថ្ងៃអនាគត គឺអាស្រ័យលើអំណាចនៃការប្រើប្រាស់សិទ្ធិរបស់ប្រជាពលរដ្ឋម្នាក់ៗ ខណៈដែលការបោះឆ្នោតសាជាថ្មីនៅកម្ពុជាក៏មិនអាច និងការបង្កើតគណៈកម្មការឯករាជ្យស៊ើបអង្កេតភាពមិនប្រក្រតីនៃការបោះឆ្នោតក៏ “បុរសខ្លាំង” មិនហ៊ាន ៕
ប្រភពពី DTN7
