និស្សិតបារាំងកាក់កបពីការលក់ខ្យល់បរិសុទ្ធច្រកកំប៉ុង
បង្កើត ឡើងដោយនិស្សិតបារាំងវ័យ២២ឆ្នាំឈ្មោះ អង់ទ័រនើរ ដេប្លេ ផលិតផលខ្យល់បរិសុទ្ធច្រកកំប៉ុងដែលមានយីហោជាភាសាបារាំងសរសេរថា Air de Montcuq ត្រូវបានលក់ក្នុងតម្លៃ៧,៥ដុល្លារក្នុង១កំប៉ុង ដោយបូករួមទាំងថ្លៃសេវាដឹកជញ្ជូនដល់គេហដ្ឋានផងដែរ។ ក្នុងកំប៉ុងរុំក្រដាសស្លាកសញ្ញាពណ៌សនោះ ផ្ទុកទៅដោយខ្យល់ដែលបូមពីបរិយាកាសនៅភូមិម៉ុងគូយ ជាស្រុកកំណើតរបស់លោក អង់ទ័រនើរ ដេប្លេ ផ្ទាល់តែម្ដង។
ក្នុងរយៈពេល៣សប្ដាហ៍ លោកទទួលបានការកុម្ម៉ង់ពីមនុស្សដល់ទៅ ១០០នាក់ឯណោះ។ ដើម្បីរក្សាគុណភាពផលិតផលរបស់លោក ក្នុងមួយសប្ដាហ៍លោកបូមខ្យល់បរិសុទ្ធនោះច្រកកំប៉ុងតែ១០លីត្រ ប៉ុណ្ណោះ ដោយប្រព្រឹត្តទៅនៅរៀងរាល់ម៉ោង៣កន្លះទៀបភ្លឺនារដូវក្ដៅ។ ទោះយ៉ាងណា អតិថិជនគួរកុំភ្ញាក់ផ្អើលដែរ ប្រសិនបើបើកកំប៉ុងទទេហើយមិនទទួលបានក្លិនអ្វីប្លែកសោះនោះ៕
ប្រភពពី ភ្នំពេញប៉ុស្តិ៍
