ខេត្តកំពង់ឆ្នាំង ៖ បុរសអ្នករត់ម៉ូតូឌុបម្នាក់ វិះតែនឹងចាញ់ឧបាយកលជនឆបោក ដោយឱ្យគាត់វេលុយតាមវីង ចំនួន៥០០ ដុល្លារទៅគេ ដើម្បីរត់ការយកប្រាក់រង្វាន់ ពីសំឡីអនាម័យ 77777 តែដោយមានការសង្ស័យ បុរសជាអ្នករត់ម៉ូតូឌុប បានរត់មករាយការណ៍ប្រាប់ប៉ូលិសក្រុង អំពីដំណើររឿងនេះ ដើម្បីជួយផ្តល់ជាយោបល់ ។

ហេតុការណ៍នេះកើតឡើង កាលពីវេលាម៉ោង៩ និង១៥នាទីព្រឹកថ្ងៃទី១២ ធ្នូ ២០១៣ ស្ថិតនៅភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង ។ បុរសដែលត្រូវគេប៉ុនប៉ងឆបោករូបនេះ ឈ្មោះសេង សុផាន់ អាយុ៣៨ឆ្នាំ ជាអ្នករត់ម៉ូតូឌុប រស់នៅក្នុងភូមិសង្កាត់ខាងលើ ។

ប្រភពពីបុរសរងគ្រោះបានឱ្យដឹងថា នៅព្រឹកថ្ងៃទី១២ ធ្នូ ២០១៣ នេះ គាត់បានទទួលទូរស័ព្ទ ពីជនមិនស្គាល់អត្តសញ្ញាណ ដែលមានលេខទូរស័ព្ទ ០៩៧ ៩៣០៣៧៩៩ ដោយបានប្រាប់គាត់ថា គាត់ត្រូវរង្វាន់ចំនួន ២.៥០០ដុល្លារពីសំឡីអនាម័យ៧ប្រាំដង ។ ហើយជនពុំស្គាល់អត្តសញ្ញាណនោះ បានឱ្យគាត់ផ្ទេរលុយចំនួន ៥០០ដុល្លារតាមវីងទៅគេ ដើម្បីរត់ការផ្ទេរលុយចំនួន ២.៥០០ដុល្លារតាមធនាគារអេស៊ីលីដា ត្រឡប់មកឱ្យវិញ ។

ដោយមានការសង្ស័យ និងខ្លាចចាញ់បោកជនខិលខូច ជនរងគ្រោះបានកាន់ទូរស័ព្ទមករាយការណ៍ឱ្យមន្ត្រីប៉ូលិសបានដឹង និងជួយផ្តល់យោបល់ ។