ទើបបើកលុយពីធនាគារចោរវាយបំបែកកញ្ចក់ឡានលួចលុយជាង៣៨ លានរៀល
ភ្នំពេញ: ក្រុមចោរ២នាក់ ជិះម៉ូតូមួយគ្រឿងមកឈប់ធ្វើសកម្មភាពវាយបំបែកកញ្ជក់រថយន្តលួចយកលុយក្នុងរថយន្តអស់ជាង៣៨លាន ៦០ម៉ឺនរៀល កាលពីវេលាម៉ោង ៣កន្លះ រសៀលថ្ងៃទី ២៧ ខែវិច្ចិកា ឆ្នាំ២០១៣ នៅចំណុចមុខផ្ទះលេខ១៤៨ មហាវិថីព្រះសីហនុ ភូមិ៤ សង្កាត់បឹងកេងកងទី១ ខណ្ឌចំការមន។
ប៉ូលិសមូលដ្ឋានបានឲ្យដឹងថាម្ចាស់រថយន្តឈ្មោះ ញឹវ ប៊ុនធឿន ភេទប្រុស អាយុ ៣២ឆ្នាំ មុខរបរជាអ្នកម៉ៅការសំណង ស្នាក់នៅផ្លូវជាតិ៥ ភូមិកណ្តាល សង្កាត់ព្រែកព្នៅ ខណ្ឌសែនសុខ។
ញឹវ ប៊ុនធឿន បំភ្លឺប្រាប់ប៉ូលិសថា មុនពេលកើតហេតុគាត់បានបើករថយន្តហាយឡែនឌ័រ ពណ៍ទឹកប្រាក់ ពាក់ស្លាកលេខភ្នំពេញ 2W 0778 ចេញពីផ្ទះទៅបើកលុយក្នុងធានាគារកាណាឌីយ៉ា សង្កាត់ស្រះចក ខណ្ឌដូនពេញ ហើយបន្តបើករថយន្តមកចតនៅចំណុចកើតហេតុខាងលើ ដោយទុកលុយទើបនឹងបានថ្មីៗខាងក្នុង រួចចុះពីលើរថយន្តដើរចូលទៅក្នុងផ្សារទំនើបឡាគីញាំអី ។
ខណៈចូលបានជិត៣០នាទីក៏ដើរចេញមកវិញ ស្រាប់តែឃើញរថយន្តរបស់ខ្លួនបែកកញ្ចក់ទ្វាររថយន្តខាងមុខផ្នែកខាងឆ្វេង ភ្លាមៗនោះម្ចាស់បានស្ទុះទៅមើលលុយដែលទុកក្នុងរថយន្ត បាត់អស់៣៨លាន ៦០ម៉ឺនរៀល ទើបស្រែកឆោឡោបង្កឲ្យមានការភ្ញាក់ផ្អើលដល់សមត្ថកិច្ចមូលដ្ឋានចុះទៅអន្តរាគមន៍ដល់កន្លែងកើតហេតុ និងបានហៅម្ចាស់រថយន្តមកដាក់ពាក្យបណ្តឹងនៅទីស្នាក់ការនគរបាលប៉ុស្តិ៍បឹងកេងកងទី១ ដើម្បីងាយស្រួលដល់សមត្ថកិច្ចបើកការស្រាវជ្រាវតាមចាប់ខ្លួនជនសង្ស័យយកមកផ្តន្ទាទោសតាមផ្លូវច្បាប់៕
