ក្រសួងយុត្តិធម៌នឹងគ្រប់គ្រងប្រាក់មូលនិធិមេធាវីសម្រាប់សេវាកម្មជំនួយផ្នែកច្បាប់
ក្រសួងយុត្តិធម៌ មានគម្រោងបង្វែរប្រាក់មូលនិធិមេធាវីសម្រាប់សេវាកម្មជំនួយផ្នែកច្បាប់ ដល់ជនក្រីក្រ មកឲ្យក្រសួងយុត្តិធម៌ គ្រប់គ្រងវិញ ចាប់ពីឆ្នាំ២០១៤ តទៅ។ គម្រោងនេះត្រូវបានមន្ត្រីរដ្ឋាភិបាល បង្ហើបឲ្យដឹងនៅក្នុងសន្និសីទថ្នាក់ជាតិ ស្ដីពីជំនួយផ្នែកច្បាប់នៅថ្ងៃសុក្រ ទី២៩ វិច្ឆិកា។
អនុរដ្ឋលេខាធិការក្រសួងយុត្តិធម៌ លោក គីម សន្តិភាព ថ្លែងថា រដ្ឋាភិបាលបានបង្វែរប្រាក់មូលនិធិ ២០០លានរៀល ពីគណៈមេធាវី សម្រាប់សេវាកម្មជំនួយផ្នែកច្បាប់ដល់ជនក្រីក្រជារៀងរាល់ឆ្នាំនោះ មកឲ្យក្រសួងយុត្តិធម៌គ្រប់គ្រងវិញ ហើយបានបន្ថែម ១០០លានរៀលពីលើនោះ ដើម្បីឲ្យក្រសួងធ្វើការជួយផ្នែកច្បាប់ដល់ជនក្រីក្រវិញ។ តែទោះយ៉ាងណា លោក គីម សន្តិភាព ពុំទាន់បានពន្យល់ពីហេតុផលនៃការផ្លាស់ប្ដូរការគ្រប់គ្រងការងារ និងថវិកានោះទេ។
នៅព្រឹកថ្ងៃសុក្រ ទី២៩ វិច្ឆិកា ក្រសួងយុត្តិធម៌ និងគណៈមេធាវីនៃព្រះរាជាណាចក្រកម្ពុជា បានសហការគ្នារៀបចំសន្និសីទថ្នាក់ជាតិមួយ ស្ដីពីជំនួយផ្នែកច្បាប់ ក្រោមការឧបត្ថម្ភដោយអង្គការយូនីសេហ្វ (UNICEF) និងអង្គការ យូ.អិន-អូ.អេច្ឆ.ស៊ី.អេច្ឆ.អ (UN-OHCHR) ក្នុងបំណងបង្ហាញមហាជនឲ្យបានយល់ដឹងពីសិទ្ធិទទួលបានជំនួយផ្នែកច្បាប់នៅក្នុងប្រព័ន្ធយុត្តិធម៌ព្រហ្មទណ្ឌ។
ប្រភពពី វិទ្យុអាស៊ីសេរី
