គណៈកម្មការសហគមន៍​អឺរ៉ុប​ បាន​ស្នើ​អោយ​មាន​ការ​ហាម​ឃាត់​ការ​នាំ​ចូល​ផលិត​ផល​ត្រី​ពី​ប្រទេស​កម្ពុជា​ ​ដោយ​សារ​តែ​ប្រទេស​នេះ​បរាជ័យ​ក្នុង​ការ​លុបបំបាត់​ការ​នេសាទ​ខុស​ច្បាប់​ ។ ​នេះ​បើ​យោង​​តាម​ការ​ផ្សាយ​របស់​ទី​ភ្នាក់​ងារ​ព័ត៌​មាន​ AFP ​និង​ Reuters ។​

ប្រភព​ដដែល​បាន​រាយការណ៍​ថា ​ក្រៅ​ពី​កម្ពុជា​ ​នៅមាន​ប្រទេស​ពីរ​ផ្សេង​ទៀត ​ដែល​ត្រូវ​បាន​ហាម​ឃាត់​ដោយ​សារ​គណ​កម្មការ​សហ​គមន៍​អឺ​រុប​​ ​គឺ​ប្រទេស ​Belize ​និង Guinea ​។ សេចក្តី​រាយ​ការណ៍​ព័ត៌​មាន​ក៏​បាន​អោយ​ដឹង​ថា​ ប្រទេស​៣​ផ្សេង​ទៀត​ ​ក៏​នឹង​ប្រឈម​មុខ​នឹង​ការ​ដាក់ទណ្ឌកម្ម​នៅ​ឆ្នាំ​ក្រោ​យ​ផង​ដែរ ​។
​
គណ​កម្មការ​សហគមន៍​អឺរុប​ បាន​អំពាវ​នាវអោយ​រដ្ឋា​ភិបាល​នៃ​ប្រទេស​ទាំង​២៨ ​ក្នុង​សហគមន៍​អឺរ៉ុប​ ​អោយ​បញ្ឈប់​ការ​នាំ​ចូល​ត្រី​ ​ពីប្រទេស​ទាំងបី​ខាងលើ​ ដោយសារ​តែប្រទេស​ទាំង​បី​នេះ ​មិន​អាច​ បង្ហាញ​នូវ​ដំណោះ​ស្រាយ​ប្រសិទ្ធ​ភាព​ក្នុង​ការ​ទប់​ស្កាត់​ការ​នេសាទ​ខុស​ច្បាប់​ ។
​
គេ​នៅមិន​ទាន់​ទទួល​បាន​ប្រតិ​កម្ម​ពី​រាជ​រដ្ឋា​ភិបាល​កម្ពុជា​ ​ឬ​រដ្ឋ​បាល​ជល​ផល​ នៃ​ប្រទេសនេះ​បាន​នៅ​ឡើយ​ទេ ​នៅយប់​ថ្ងៃ​អង្គារ​នេះ ​។

យោង​តាម​សេចក្តី​ប្រកាស​របស់​លោក​ស្រី ​Maria Damanaki ស្នង​ការ​ជល​ផល​នៃ​សហ​គមន៍​អឺរ៉ុប​ បាន​អោយដឹង​ថា​ ​ពីមុន​ ប្រទេស​អាហ្រ៊ិក​ខាង​លិច​ គឺ​ជា​ប្រភព​​នៃ​ការ​នេសាទ​ខុស​ច្បាប់​ តែ​បច្ចុប្បន្ន​ និន្នា​ការនេះ​ បាន​ផ្លាស់​ប្តូរ​មក​កាន់​តំបន់​អាស៊ី​ប៉ាស៊ី​ហ្វ៊ិក​ វិញ ​។
​
ស្ថិតិ​របស់​សហ​គមន៍​អឺរ៉ុប​ បាន​បង្ហាញ​ថា​ ប្រទេស​ទាំង​២៨​ ​នៃ​សហគមន៍​នេះ​ ​បាន​នាំចូល​ត្រី​ពី​ប្រទេស​ផ្សេង​ៗ​ទៀត​នៅ​លើសក​ល​លោក​ប្រ​មាណ​៥០​លាន​តោន​ក្នុង​មួយ​ឆ្នាំ​ៗ​ ដែល​​គិត​ជា​ទឹក​ប្រាក់​ប្រហែល​២៥,០០០ ​លាន​ដុល្លារ​សហ​រដ្ឋ​អាមេរិក​ ៕

ប្ររភពពី Free Press Magazine