តុលាការអេស្បាញចេញដីកាអន្តរជាតិចាប់ខ្លួនអតីតប្រធានាធិបតីចិន
ក្រុងម៉ាទ្រីដៈ តុលាការអេស្ប៉ាញពីថ្ងៃអង្គារបានចេញដីកាចាប់ខ្លួនអន្តរជាតិមួយសម្រាប់អតីតប្រធានាធិបតីរបស់ចិនគឺលោក ហ្សាង ហ្សាមីន នៅក្នុងករណីមួយដែលលើកឡើងដោយក្រុមសកម្មជនដោយចោទថា កងកម្លាំងចិនបានប្រព្រឹត្តបនប្រល័យពូជសាសន៍នៅទីបេ។
ក្រុមសិទ្ធិមនុស្សទីបេបានលើកយកករណីនេះប្រឆាំងលោក ហ្សាង លោក លី ប៉េង ជាអតីតនាយករដ្ឋមន្ត្រី និងមន្ត្រីចិនបីនាក់ទៀតដោយចោទថា ពួកគេមានការទទួលខុសត្រូវចំពោះ«ប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ ទារុណកម្ម និងអំពើភេរវកម្មទៅលើពលរដ្ឋទីបេកាលពីទសវត្សរ៍ឆ្នាំ១៩៨០ និងឆ្នាំ១៩៩០។
តុលាការជាតិរបស់អេស្ប៉ាញបានចេញដីកាចាប់ខ្លួននៅក្រោមវិន័យប្រព័ន្ធតុលាការអន្តរជាតិដែលអនុញ្ញាតឲ្យតុលាការមួយចំនួនកាត់ទោសករណីខ្លះពាក់ព័ន្ធនឹងការរំលោភសិទ្ធិមនុស្សដែលបានប្រព្រឹត្តនៅក្នុងប្រទេសមួយចំនួនទៀត។
តុលាការនេះបានទទួលករណីនេះ ព្រោះដើមចោទម្នាក់ជាពលរដ្ឋទីបេដែលនិរទេសខ្លួនឈ្មោះ Thubten Wangchen មានសញ្ជាតិអេស្ប៉ាញ ហើយតុលាការចិនមិនបានស៊ើបអង្កេតពីការចោទប្រកាន់ទាំងនេះទេ។
ប្រភពពី ភ្នំពេញប៉ុស្តិ៍
