តុលាការកំពូលសម្រេចដោះលែងអ្នកស្រី យ៉ោម បុប្ផា ឲ្យនៅក្រៅឃុំបណ្តោះអាសន្ន
ភ្នំពេញៈ ចៅក្រមនៃតុលាការកំពូល បានបើកសវនាការ និងសម្រេចដោះលែងអ្នកស្រី យ៉ោម បុប្ផា សកម្មជនតវ៉ាដីធ្លីនៅតំបន់បឹងកក់ ឲ្យនៅក្រៅឃុំជាបណ្តោះអាសន្ន និងបង្វិលសំណុំរឿងព្រហ្មទណ្ឌមួយនេះ ទៅឲ្យសាលាឧទ្ធរណ៍វិញដើម្បីធ្វើការស៊ើបអង្កេត និងជំនុំជម្រះជាថ្មី។
អ្នកស្រី យ៉ោម បុប្ផា ត្រូវបានសាលាដំបូងរាជធានី ផ្តន្ទាទោសកាលពី ខែ កញ្ញា ឆ្នាំ ២០១២ ឲ្យជាប់ពន្ធនាគារ ៣ ឆ្នាំ ពីបទបង្កហិង្សា ដោយចេតនា និងតម្រូវឲ្យរួមគ្នាបង់សំណងរដ្ឋប្បវេណី ដល់ជនរងគ្រោះ ៦០ លានរៀល។ ប៉ុន្តែក្រោយមកត្រូវបានសាលាឧទ្ធរណ៍ បន្ធូរបន្ថយទោសមកនៅ ត្រឹម ២ ឆ្នាំ និងតម្រូវឲ្យរួមគ្នាបង់សំណងរដ្ឋប្បវេណី ដល់ជនរងគ្រោះសរុប ៣០ លានរៀល។
ក្រោយពីតុលាការកំពូលធ្វើការជំនុំជម្រះអស់ពេល១ព្រឹក នៅថ្ងៃសុក្រនេះ អ្នកស្រី យ៉ោម បុប្ផា សកម្មជន តវ៉ាដីធ្លី នៅតំបន់បឹងកក់ដែលមានជម្លោះដីធ្លីដ៏រ៉ាំរ៉ៃអាចនឹងត្រូវ ដោះលែងពី មន្ទីរឃុំឃាំងនៃស្នងការដ្ឋានរាជធានីភ្នំពេញ នៅរសៀលថ្ងៃសុក្រនេះ។ គិតមកដល់ថ្ងៃនេះគឺជាថ្ងៃទី ៤៤៤ ដែលអ្នកស្រី យ៉ោម បុប្ផា ត្រូវបានឃុំឃាំងក្នុងពន្ធនាគារ។
ក្រុមសកម្មជនដីធ្លីប្រមាណ ១០០ នាក់ មកពីសហគមន៍ បឹងកក់ បុរីកីឡា ថ្មគោល បាននាំគ្នាដង្ហែក្បួនជុំវិញតុលាការកំពូល ដើម្បីបួងសួងដល់វិញ្ញាណបុព្វការីជនខ្មែរ សូមឲ្យជួយអ្នកស្រី យ៉ោម បុប្ជា រួចផុតពីការចោទប្រកាន់ទាំងអយុត្តិធម៌។
ព្រះសង្ឃ ប្រជាពលរដ្ឋ និងកូនស្រី អ្នកស្រីយ៉ោម បុប្ផា មកស្តាប់សវនាការសំណុំរឿងអ្នកស្រីយ៉ោម បុប្ផានៅព្រឹកថ្ងៃសុក្រនេះ
ប្រភពពី ភ្នំពេញ ប៉ុស្តិ៍
