មេបក្សប្រឆាំងរិះគន់សហគមន៍អឺរ៉ុបរឿងអ្នកជំនាញបោះឆ្នោត
ភ្នំពេញៈ លោក សម រង្ស៊ី មេដឹកនាំគណបក្សប្រឆាំង បានរិះគន់សហគមន៍អឺរ៉ុប ទាក់ទងនឹងអ្នកជំនាញបោះឆ្នោតមិនសូវលេចធ្លោ ២ រូប ដែលសហគមន៍អឺរ៉ុប បានបញ្ជូនមកឃ្លាំមើលការបោះឆ្នោត កាលពីខែ កក្កដា ដោយអះអាងថា វត្តមាន របស់ពួកគេបានប៉ះពាល់ដល់លទិ្ធប្រជាធិបតេយ្យនៅកម្ពុជា។
ក្នុងលិខិតមួយដែលផ្ញើកាលពីថ្ងៃអង្គារជូនលោក Ugu Astuto អ្នកការទូតកំពូលរបស់សហគមន៍អឺរ៉ុប ប្រចាំនៅអាស៊ីខាងត្បូង និងអាស៊ីអាគេ្នយ៍ លោក សម រង្ស៊ី បានអះអាងថា អ្នកជំនាញទាំងពីរបាននៅប្រទេស កម្ពុជា ហើយកំពុងតែធ្វើការជាមួយនឹងគណៈកម្មាធិការជាតិរៀបចំការបោះឆ្នោត។
ប៉ុន្តែ លោក Jean-Francois Cautain ឯកអគ្គរដ្ឋទូតសហគមន៍អឺរ៉ុប បានបំភ្លឺកាលពីថ្ងៃពុធថា លោក សម រង្ស៊ី យល់ខុសអំពីអង្គហេតុ និងថា អ្នកទាំងពីរបានចាកចេញពីកម្ពុជា កាលពីថ្ងៃ ទី៩ ខែ សីហា។
លោក សម រង្ស៊ី បានទទួលស្គាល់កាលពីថ្ងៃពុធថា លោកអាចយល់ខុសអំពីអង្គហេតុ ដែលបានបញ្ជូនប្រាប់លោក ដោយសហគមន៍អឺរ៉ុបប៉ុន្តែ លោកអះអាងថា លោកនៅតែរីករាយដែលបានផ្ញើលិខិតប្រើពាក្យខ្លាំងៗនោះ។
លោកបញ្ជាក់ថា៖ «ខ្ញុំរីករាយដែលបានសរសេរលិខិតនេះ បើទោះបីជាអ្នកជំនាញទាំងពីរនោះ បានចាកចេញរួចហើយក៏ដោយ ព្រោះវាជាកំហុសតាំងពីដំបូងក្នុងការបញ្ជូនអ្នកជំនាញទាំងពីរ ហើយ ទី២ ខ្ញុំមិនចង់ឲ្យមានហានិភ័យ ដែលមើលឃើញសហគមន៍អឺរ៉ុប បញ្ជូនអ្នកជំនាញច្រើនថែមទៀតឡើយ»។ ក្នុងលិខិតនោះ លោក សម រង្ស៊ី បានសរសេរថា រដ្ឋាភិបាលមិនដែលខ្វះជំនួយបច្ចេកទេស មតិយោបល់ឬអនុសាសន៍សម្រាប់ធ្វើកំណែទម្រង់ការបោះឆ្នោត ទេ ប៉ុន្តែខ្វះឆន្ទៈនយោបាយ ក្នុងការអនុវត្តនូវអនុសាសន៍ទាំងនោះ»។
បន្ទាប់ពីការបោះឆ្នោត ឆ្នាំ ២០០៨ បេសកកម្មអង្កេតផ្លូវការរបស់សហគមន៍អឺរ៉ុប បានផ្តល់នូវអនុសាសន៍ជាច្រើនសម្រាប់ធ្វើកំណែទម្រង់ដែលទាំងអស់នោះហាក់ដូចជាមិនត្រូវបានអនុវត្តដោយរដ្ឋាភិបាលកម្ពុជាឡើយ។
លោក រង្ស៊ី បានសរសេរថា៖ «តើអ្នកគិតថា អ្នកជំនាញបច្ចេកទេសសហភាពអឺរ៉ុប ដែលកំពុងធ្វើការងារជាមួយ គ.ជ.ប នឹងទទួលបានជោគជ័យ ក្នុងការធ្វើឲ្យអាជ្ញាធរកម្ពុជា ផ្លាស់ប្តូរគំនិតហើយអនុវត្តអនុសាសន៍ណាមួយ ដើម្បីធានាឲ្យមានការបោះឆ្នោតដែលអាចជឿជាក់បានទេ?»។ លោកបន្តថា៖ «តាមពិត អ្នកជំនាញបច្ចេកទេសអឺរ៉ុបទាំងពីរនាក់នោះ កំពុងផ្តល់នូវសេវាអាក្រក់ដល់ប្រជាធិបតេយ្យក្នុងប្រទេសកម្ពុជាពីព្រោះពួកគេជាធម្មតា ត្រូវបានប្រើដោយរបបកម្ពុជាផ្តាច់ការដើម្បីគាំទ្រ គ.ជ.ប ហើយវាជាផែនការបន្តមានជានិច្ចរបស់រដ្ឋាភិបាលកម្ពុជាដើម្បីបោកប្រាស់ការបោះឆ្នោត»។
ឯកអគ្គរដ្ឋទូតសហភាព អឺរ៉ុប លោក Cautain បានថ្លែងថា អ្នកជំនាញទាំងពីរនាក់នោះ បានមកដល់កាលពីពាក់កណ្តាលខែ កក្កដា និង «កំពុងមើលដំណើរការបោះឆ្នោតទាំងមូល»។ លោកបានថ្លែងជាដដែលថា ពួកគេមិនមានបេសកម្មសង្កេតការផ្លូវការរបស់សហភាពអឺរ៉ុបទេ ដូចបានប្រកាសកាលមុនការបោះឆ្នោតហើយនឹងមិនមានរបាយការណ៍ណាត្រូវចេញទេ។
អគ្គលេខាធិការ គ.ជ.ប លោក ទេព នីថា បានបញ្ជាក់ថា អ្នកជំនាញសហភាពអឺរ៉ុបបានជួបជាមួយ គ.ជ.ប ដើម្បីផ្តល់ការគាំទ្របច្ចេកទេស ស្តីពីការកែលម្អការបោះឆ្នោត។
ដោយឡែក លោក សម រង្ស៊ី បានអះអាងកាលពីថ្ងៃពុធ នៅក្នុងសុន្ទរកថា ទៅសមាជិកបក្សប្រមាណ ១០០០ នាក់ក្នុងខេត្ត ព្រៃវែង ថា រដ្ឋាភិបាល កំពុងតែអស់ប្រាក់ហើយលោកបានអំពាវនាវឲ្យម្ចាស់ជំនួយបរទេសកាត់ផ្តាច់ «ខ្សែជីវិត» របស់រដ្ឋាភិបាល។ លោកថ្លែងថា៖ «គណបក្សប្រជាជនកំពុងឈឺ កំពុងជិតស្លាប់។ យើងអំពាវនាវសុំឲ្យសហគមន៍អន្តរជាតិ កាត់ផ្តាច់ខ្សែជីវិតនេះ ដើម្បីឲ្យ [គណបក្សប្រជាជនកម្ពុជា] ឆាប់ស្លាប់»។
អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បានថ្លែងថា លោក សម រង្ស៊ី កំពុងតែកុហកសាធារណជនថា រដ្ឋាភិបាលមិនស្ថិតនៅក្នុងជំហរឹងមាំ។
លោកថ្លែងថា៖ «យើងបានកាត់បន្ថយគម្លាតរវាងអ្នកមាននិងអ្នកក្រ ហើយសម្រេចបាននូវភាពរីកចម្រើនល្អ នៅក្នុងការអភិវឌ្ឍន៍។ នេះគ្រាន់តែជាការចោទប្រកាន់ដែលនិយាយឡើងដោយអ្នកកុហក»៕
ប្រភពពី ភ្នំពេញ ប៉ុស្តិ៍
