យីឌុបដឹកស្រូវបុកខឿនរង្វង់មូល ស្ពានព្រែកតាមាក់ កៀបជាប់បង្គោលភ្លើងរបួសមនុស្ស ៣នាក់
ខេត្តកណ្តាល ៖ រថយន្តយីឌុបដឹកស្រូវមួយគ្រឿង បានបុកខឿនរង្វង់មូល ស្ពានព្រែកតាមាក់ យ៉ាងពេញទំហឹង បន្តទៅបុកបង្គោលភ្លើង បាក់អស់មួយដើម ហើយដោយសារតែ មិនទាន់អស់ល្បឿន រថយន្តបានជ្រុលទៅបុកម៉ូតូ ដែលដាក់លក់នៅជិតផ្លូវខូចខាតអស់៥ គ្រឿង កាលពីវេលាម៉ោង ៨និង៣០ នាទីព្រឹក ថ្ងៃទី២៤ ខែវិច្ឆិកា ឆ្នាំ២០១៣ ស្ថិតនៅរង្វង់មូល ស្ពានព្រែកតាមាក់ ក្នុងភូមិ-ឃុំ ព្រែកតាមាក់ ស្រុកខ្សាច់កណ្តាល ខេត្តកណ្តាល ។
រថយន្តយីឌុបបង្កហេតុ ពាក់ស្លាកលេខ តាកែវ 3A-0475 ដឹកស្រូវពេញរថយន្តទម្ងន់ ២៧ តោន ទិញពីខេត្តបន្ទាយមានជ័យ ក្នុងគោលបំណងទៅលក់ នៅវៀតណាម មានម្ចាស់ឈ្មោះ ឈិត ជួង ភេទប្រុស អាយុ ២៧ឆ្នាំ ប្រពន្ធឈ្មោះ ជឿន អាយុ ១៩ឆ្នាំ និងព្រូរថយន្តម្នាក់ទៀត បានរងរបួសស្រាលទាំង ៣នាក់។ ប្រជាពលរដ្ឋ និងសមត្ថកិច្ចបានជួយគាស់ និងទាញយកអ្នកបើកបរ ២នាក់ប្តី ប្រពន្ធរួមជាមួយព្រូម្នាក់ទៀតចេញពីរថយន្ត។
មុនពេលកើតហេតុ រថយន្តបានបើកបរ ក្នុងល្បឿនធម្មតា ប៉ុន្តែមកដល់ចំណុចកើតហេតុ មិនដឹងជាយ៉ាងម៉េច ស្រាប់តែអ្នកបើកបរ រថយន្តរេចង្កូចទៅបុក ខឿនរង្វង់មូលស្ពាន រួចទៅបុកបង្គោលភ្លើង និងបុកម៉ូតូ ដែលនៅជិតនោះចំនួន ៥គ្រឿងទៀត ទើបរថយន្តបង្កកៀបជាប់ ទៅមុខលែងរួច ។ សមត្ថកិច្ចបានវាយតម្លៃថា គ្រោះថ្នាក់នេះបានកើតឡើង ដោយសារម្ចាស់រថយន្តបង្ក មិនសូវស្គាល់ភូមិសាស្ត្រ ច្បាស់លាស់ ទើបបើកបរមិនប្រយ័ត្ន ៕
____________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
