សភាពការណ៍ព្រំដែនល្អពលករខ្មែរឆ្លងដែនទៅស៊ីឈ្នួលនៅស្រុកថៃភាគច្រើនទៅព្រឹកវិលល្ងាច
ខេត្តបន្ទាយមានជ័យ: គេបានសង្កេតឃើញជាក់ស្តែងថាមានពលករខ្មែររាប់រយពាន់នាក់ក្នុងមួយច្រករបៀងៗនៃព្រំដែនកម្ពុជា-ថៃ បាននាំគ្នាចេញ-ចូលក្នុងរូបភាពទៅស៊ីឈ្នួលតាមវាលស្រែនិងចំការរបស់ថៃដែលនៅស្រុកជាប់ៗនឹងព្រំដែន។ពួកគេទៅព្រឹក វិលល្ងាច។ សកម្មភាពនេះបានកើតឡើងវិញខណៈស្ថានភាពព្រំដែនបន្តស្ងប់ស្ងាត់ បរិយាកាសអំណោយផលល្អ ចាប់តាំងពីក្រោយបកស្រាយសាលក្រមតុលាការយុត្តិធម៌អន្តរជាតិក្រុងឡាអេ ថ្ងៃទី១១ វិច្ឆិកា។
យោធានិងនគរបាលការពារព្រំដែនកម្ពុជា-ថៃ អោយដឹងថ្ងៃទី២៣ វិច្ឆិកាថា ច្រករបៀង មួយចំនួនក្នុងភូមិសាស្ត្រខេត្តបន្ទាយមានជ័យ ដែល ម្ចាស់ស្រែ-ចម្ការនិងកងកម្លាំង កម្លាំងថៃបង្កលក្ខណៈងាយស្រួលអោយពលករខ្មែរចូលព្រឹក ចេញល្ងាចទៅស៊ីឈ្នួល ប្រមូលផលស្រូវនិងចម្ការថៃគឺមួយច្រកៗ មានពលកររាប់រយនាក់។
ប្រភពបន្តថា កងកម្លាំងថៃតាមព្រំដែន(ទាំងទាហាននិងនគរបាល) ពុំបានបង្កើនចំនួន ឬ រឹតបន្តឹងនោះទេ។ ពួកគេនិងអាជ្ញាធរដែនដី សម្រួលអោយម្ចាស់ស្រែចម្ការខ្លួន(ថៃ)អាចយករថយន្តឬត្រាក់ទ័រមកដឹកពលករខ្មែរនៅព្រំដែននៅព្រលឹមស្រាង រួចដឹកត្រលប់វិញនៅពេលព្រលប់។
ពលករនិងអាជ្ញាធរដែនដីភូមិ-ឃុំនៅស្រុកថ្មពួក, ស្វាយចេក, អូរជ្រៅ ក្រុងប៉ោយប៉ែតនិងស្រុកម៉ាឡៃបាននិយាយអោយដឹងថា: ពលករខ្មែរនៅមូលដ្ឋានព្រំដែនមានមួយភាគនិងពលករពីកន្លែងឯទៀតទាំងក្នុងនិងក្រៅខេត្តមួយភាគបានបោះជំរុំប្លាស្ទិចឬតង់កៅស៊ូតូចៗរាប់សិប រាប់រយតាមព្រំដែនដើម្បីស្នាក់នៅតែពេលយប់។ ពេលថ្ងៃនៅសល់តែកូនក្មេងតូចៗមនុស្សឈឺចាំជំរុំ។
តម្លៃស៊ីឈ្នួលច្រូតស្រូវមួយថ្ងៃតម្លៃ២០០ទៅ២៥០បាត(ប្រាក់ថៃ)គឺប្រមាណជាង៣០.០០០រៀល។ឯធ្វើការតាមចម្ការក៏គិតថ្លៃមួយថ្ងៃៗប្រហែលគ្នានេះដែរ។
បើថៃបង្កលក្ខណៈងាយស្រួលនិងធានាសុវត្ថិភាព សន្តិសុខបែបនេះ ពលករយើងពុំមានបញ្ហាអ្វីទេ។ ពលករសុខសប្បាយនិងកម្រៃស៊ីឈ្នួលថ្លៃសមរម្យផង៕
រោងស្នាក់អាស្រ័យបណ្តោះអាសន្ន របស់ពលករខ្មែរចូលទៅស៊ីឈ្នួល ប្រមូលផលស្រូវនិងចម្ការថៃ ព្រឹកចេញមកវិញល្ងាច
ប្រភពពី CEN
