មនុស្សពីរនាក់កាន់ចន្លុះដុតព្រៃយកដីដើម្បីធ្វើស្រែ
ដូរ មិនដូរ ៗៗៗ…! ឈ្នះមិនឈ្នះ ៗៗ…! ជាពាក្យដែលមេដឹកនាំ ២នាក់ បង្កើតឡើង ដើម្បី ទាញសន្លឹកឆ្នោត បង្កើតព្យុះគំនិតប្រជាជន ព្រមជាមួយគោលនយោបាយរបស់ខ្លួន ដែលសង្ខេបខ្លីៗ ដើម្បីទាក់ទាញការចាប់អារម្មណ៍ពីម្ចាស់ឆ្នោត។ មិនតែប៉ុណ្ណោះអ្នកទាំង ២ ថែមទាំងនិយាយខ្លាំងខុសពីគេខុសពីឯង ដោយមិនខ្លាចរអានរណាម្នាក់ឡើយ ដែលមើលទៅហាក់ដូចជាត្រូវចិត្តរាស្រ្តណាស់ (… រដ្ឋាភិបាលពុករលួយ កាត់ដីឲ្យយួន អាយ៉ងយួន កាប់បំផ្លាញព្រៃឈើ រំលោភដីធ្លីរាស្រ្ត….) ពាក្យទាំងនេះ ជាពាក្យដែលគេបានមើលឃើញ ស្តាប់ឮ ស្ទើរគ្រប់ៗគ្នា។ ពាក្យទាំងនោះហើយដែលធ្វើឲ្យរាស្រ្តពុះពោរ ប្រៀបដូចជា យកគំនរអុសស្ងួតទៅថែមក្នុងព្រៃក្រាស់ នៅរដូវប្រាំងរង់ចាំតែភ្លើងចន្លុះប៉ុណ្ណោះ។
ក្រោយការបោះឆ្នោត ពាក្យថ្មីដែលអ្នកនយោបាយទាំង ២នាក់ និយាយគឺ (គ.ជ.ប ជាចោរពួកចោរ គេលួចយើង គេលួចសន្លឹកឆ្នោតយើង ស្ទើរពេញប្រទេសគ្រប់ទិសទី) គ្មានអ្នកណាដឹងទេថា ការពិតយ៉ាងណា ខ្ញុំនិងអ្នកក៏មិនដឹងថា អ្នកណាឈ្នះ អ្នកណាចាញ់ អ្នកណានិយាយពិត អ្នកណាកុហក តែបើតាម គ.ជ.ប គឺ ជំរំទេវតាបាន ៦៨ និងជំរំព្រះអាទិត្យបាន ៥៥ តែប៉ុណ្ណោះ ហើយមុនពេល និង ក្រោយពេលប្រកាសលទ្ធផលឆ្នោត លោក សម រង្ស៊ី និងលោក កឹម សុខា តែងតែនិយាយដដែលៗថា មិនទទួលស្គាល់លទ្ធផលឆ្នោត ត្រូវបង្កើតគណៈកម្មការ ស្វែងរកការពិតជូនម្ចាស់ឆ្នោត ស្ទើររាល់ថ្ងៃតាមវិទ្យុអន្តជាតិ។
ក្នុងសៀវភៅវិទ្យាសាស្រ្តនយោបាយជាច្រើន បានសរសេរស្រដៀងៗគ្នាថា «គណបក្សនយោបាយ គឺជាក្រុមមនុស្សដែលបង្កើតឡើងក្នុងគោលបំណងធំបំផុត គឺដណ្តើមយកអំណាច» បើបក្សប្រឆាំងមិនចង់បានអំណាចមានតែល្ងង់ នោះហើយជាហេតុផលដើម្បីការចរចាបិទទ្វារ។ វាគ្រាន់តែខុសគ្នាត្រង់ថា សម្រាប់អ្នកនយោបាយខិលខូច អំណាចគឺជាគោលដៅចុងក្រោយសម្រាប់ពួកគេ ដើម្បីស្វែងរកលាភសក្ការៈ ប្រមូលទ្រព្យនគរធ្វើមាន ធ្វើបាន តែសម្រាប់អ្នកនយោបាយមានគុណធម៌ អំណាចមិនមែនជាគោលដៅចុងក្រោយនោះទេ ប៉ុន្តែគ្រាន់តែជាមធ្យោបាយ ដើម្បីស្វែងរកសុភមង្គលជូនរាស្ត្រក្រោមមេឃ ប្រឆាំងអយុត្តិធម៌ លើកទង់ច្បាប់ ប្រើដាវគុណធម៌កម្ចាត់មនុស្សអាក្រក់លើកស្ទួយអ្នកទន់ខ្សោយ។
នៅក្នុងការចរចាកន្លងទៅ ជំរំព្រះអាទិត្យ ទាមទារអំណាចតុល្យភាពក្នុងសភា និងធ្វើកំណែទម្រង់រដ្ឋ ដូចជាយកតំណែងប្រធានសភាជាន់ទាប តែមេទ័ព មេទ័ពរង និយាយប្រាប់ប្រជាជនថា ត្រូវរកយុត្តិធម៌ជូនម្ចាស់ឆ្នោត ហើយថា ការទាមទារនេះ គឺជាផែនការ ក្នុងចង្កោមយុទ្ធសាស្ត្រ ដើម្បីយុត្តិធម៌ម្ចាស់ឆ្នោត តែបើមើលទៅ ហាក់ដូចជាគ្រាន់តែចង់ឲ្យខ្យល់អាគ្នេយ៍បោកបក់ឲ្យខ្លាំង ដើម្បីឲ្យភ្លើងឆេះព្រៃឲ្យឆាប់ ទាន់រដូវសម្រក ចុងខែ កត្តិក រំលាយព្រៃឲ្យទៅជាដីរាប ដែលសមល្មមខ្លួនគាត់ធ្វើស្រែដាំស្រូវមួយចម្ការទៀតតែប៉ុណ្ណោះ ដើម្បីចម្អែតកូនទាហានក្នុងបន្ទាយ និងបំពេញចិត្តរា្រស្តក្នុងនគរ ព្រោះគាត់ដឹងថា បក្សប្រឆាំងរបស់ពួកគាត់បានតែ ៥៥ នាក់ មិនគ្រប់គ្រាន់ធ្វើស្រែមួយព្រៃនោះទេ ហើយយ៉ាងហោចណាស់ ត្រូវរង់ចាំមួយរដូវទៀត ដើម្បីដុតព្រៃថែមដីចម្ការ។
រាស្រ្ត ម្នាក់ៗគិតថា ដូរហើយៗ យើងរួចពីបរទេស បានដីស្រែមកវិញហើយ បានព្រៃ បានឈើមកវិញហើយ ពួកគេប្តូរស្លាប់ជាមួយ មេទ័ព និងលោក មេទ័ពរងណាស់ តែគាត់ថា កុំក្បត់គាត់ បើក្បត់គាត់ ចូលជាមួយបក្សប្រជាជន គាត់នឹងដុតថែមមួយចន្លុះទៀត ឲ្យឆេះចម្ការអត់ស្រូវដាក់ជង្រុកតែម្តង។ មើលទៅរាស្ត្រខ្មែរ ហាក់ដូចជារត់ប្រសាចនៅលើក្តារអុកធ្វើឲ្យមេទ័ពក្រពុល មុខមិនស្ទើរទេ ព្រោះមានអ្នកបំភ្លៃព័ត៌មាន បង្កើតសង្គ្រាមចិត្តសា្រស្តក្នុងជំរំ ព្រះអាទិត្យ ដូចជាមេទ័ព និងមេទ័ពរងថា រកយុត្តិធម៌ បើបានយុត្តិធម៌ហើយ ត្រូវទៅចែកអំណាចសភា និងកែទម្រង់ស្ថាប័នរដ្ឋធំៗ រួមទាំង គ.ជ.ប ស្រាប់តែមានគេនិយាយថា បក្សប្រឆាំងចូលបក្សប្រជាជនបើចូលមានតែរំលាយបក្ស?
បើបក្សប្រឆាំងចូលរដ្ឋាភិបាល មានតែធ្វើរដ្ឋាភិបាលចម្រុះជាមួយបក្សប្រជាជន? ដូចនេះបើជំរំព្រះអាទិត្យ មិនឆាប់ចាត់ការចារកម្មផ្ទៃក្នុងបំភ្លៃព័ត៌មានទេ នោះ រឿងមិនពិត និយាយមួយពាន់នាក់ បន្ទរមួយម៉ឺនដង បែកពេញជំរំ រឿងមិនពិត ក៏ក្លាយជាពិត ច្បាស់ជាកុនកមិនខាន ដូចគេថា «ពេលខ្លះរឿងកុហកសប្បាយកុហកជាងរឿងពិតទៅទៀត»។
បាតុកម្ម ដ៏ធំបានចាប់ផ្តើមហើយការខ្វែងគំនិតគ្នា ក៏ចាប់ផ្តើមដែរ លោកមេទ័ព និងមេទ័ពរង ចង់បានបាតុកម្ម ដើម្បីដាក់សម្ពាធចរចាយកកៅអីប្រធានសភាជាន់ទាប ប្រៀបដូចជាចង់ដុតព្រៃយកដីធ្វើចម្ការ សុំត្រឹមតែ ២ ហិកតា តែរាស្រ្ត ចង់ដុតព្រៃទាំងមូល យកដីទាំងអស់ ទោះធ្វើមិនទាន់កើតក៏ដោយ ក៏ត្រូវយក ទាំងអស់មកទុកសិនដែរ។ រាស្រ្តខ្លះសម្ភាសនៅអាស៊ីសេរី វីអូអេ និយាយថា ចង់ឲ្យលោក សម រង្ស៊ី ធ្វើជានាយករដ្ឋមន្រ្តី លោក កឹម សុខា ជាប្រធាន សភា បានគាត់ព្រម…! គាត់ខំលក់ឆ្កែ លក់ជី ដើម្បីមកបាតុកម្មចង់បានអ៊ីចឹង…! ខ្ញុំគិតថា បក្សប្រឆាំងស្រងាកចិត្តណាស់ ពេលដែលស្តាប់ឮអ៊ីចឹង ហេតុអី គាត់ចង់ឲ្យភ្លើងឆេះព្រៃត្រឹមដី ២ ហិកតា តែភ្លើងឆេះព្រៃនោះនៅតែឆេះ ឆេះមិនស្រុតកម្លាំង ឆេះរាលទៅមុខ មិនថយ ហើយប្រហែលជាលោកមេទ័ពទាំងពីរ កំពុងតែឆ្ងល់ផងថា ហេតុអ្វីក៏ឆេះសាហាវម៉្លេះ? កុំឆ្ងល់អី! គឺវាមកពី ចន្លុះទាំងពីរ របស់លោកមេទ័ព និងមេទ័ពរង ដែលដើរដុត ៥ ឆ្នាំនឹងឯង។ និយាយមិនរើសពាក្យ បរិភោគមិនរើសអាហារ ដេកមិនរើសកន្លែង គឺជាត្រណមរបស់មេទ័ព។ និយាយទៅ រាស្ត្រក៏មានហេតុផលត្រឹមត្រូវរបស់គាត់ដែរ ដែលហាមកុំឲ្យជំរំ ព្រះអាទិត្យចូលទៅពាក់ព័ន្ធនឹងជំរំទេវតាព្រោះ៖ ទី១. មិនក្រោម ២ លើកទេនៅ មុនការបោះឆ្នោត លោកនាយករដ្ឋមន្ត្រី តែងតែនិយាយថា កែទម្រង់យុទ្ធសាស្រ្តចតុកោណជាដំណាក់កាលៗ យុទ្ធសាស្រ្តជំហានគីង្គក់ កំណែទម្រង់ ស៊ីជម្រៅប៉ុន្មានដងហើយ នៅតែមិនអាចធ្វើបាន ព្រៃក៏អស់ រ៉ែក៏អស់ យកពន្ធបានតិចតួច យកដូចឲ្យ យកដូចអត់យក ធ្វើឲ្យរាស្រ្តមិនទុកចិត្ត។
ទី២. ពួកគាត់ខ្លះមិនចង់ឮ មិនចង់ខ្វល់ ពីរឿងនយោបាយនោះទេ ពួកគាត់ចង់បានតែសុខខ្លួនគាត់ គ្រួសារគាត់ តែពួកគាត់មិនអាចនៅស្ងៀមបាន ដោយនៅសុខៗបាត់ដី នៅសុខៗ គេបំផ្លាញដីធ្លី ស្រែចម្ការ ផ្ទះសម្បែង ដែលធ្វើឲ្យគាត់ឆ្អែតចិត្តណាស់។ ចំណុច ទី២ នេះ អាចនិយាយបានថា សុខចិត្តស្លាប់ខ្លួនគាត់ ចូលតវ៉ាជាមួយបក្សប្រឆាំង ព្រោះគាត់គិតថា បើមានការផ្លាស់ប្តូរ គាត់ជឿជាក់ណាស់ថា នឹងបានដីស្រែចម្ការ របស់ពួកគាត់មកវិញ អ្នកណាមិនចង់ ទាំងខ្ញុំទាំងគេ។
ទី៣. ប្រាក់ខែ នៅតែតិចរស់យ៉ាងវេទនា ថែមទាំងមេជញ្ជក់ពីលើទៅទៀត រហូតនៅថ្ងៃបោះឆ្នោតមានកូនទាហានម្នាក់ហ៊ានសរសេរពាក្យរិះគន់ ពីការកាត់ប្រាក់ខែគាត់ យកទៅដាក់នៅក្នុងហឹបឆ្នោតទៅទៀត មិនថាតែទាហាននោះទេ គ្រូបង្រៀន មន្រ្តីរាជការសាធារណ: កម្រិត គ. និង ឃ. ក៏មានរឿងដូចគ្នាផង ដែរ តើពួកគាត់នៅស្ងៀមទេ? បើគាត់មកបាតុកម្មមិនបានចុះប្រពន្ធ កូន ចៅ របស់គាត់អាចនៅសម្ងំស្ងៀមទេ?
ទី៤: គ្រួសារយុទ្ធជនពលី បានប្រាក់ឧបត្ថម្ភតិច ហើយអ្នកខ្លះបាត់ឈ្មោះ ខ្លះមានឈ្មោះតែអត់លុយ ខ្លះបើកបានតែពាក់កណ្តាល រដ្ឋឲ្យដីស្រែធ្វើ មិនទាន់រាស់ក្តៅដីផង លោកធំៗខ្លះយកដីទៅដាំដំឡូង ដាំកៅស៊ូ បាត់ធ្វើព្រងើយ ថាក្រអត់ដី ឲ្យតែមានផ្ទះនៅ រដ្ឋធ្វើផ្ទះឲ្យកូនទាហាន បែរជាមេយកលក់ឲ្យអ្នកផ្សេងទៅវិញ តើក្នុងចិត្តគាត់គិតយ៉ាងណា? ចុះយុទ្ធជនពិការ? ពិការហើយគឺចប់ មានឈ្មោះបើកលុយបាន ១ ឆ្នាំក៏បាត់ឈ្មោះចេញពីបញ្ជី ឬត្រូវគេលក់ឈ្មោះ ទៅឲ្យអ្នកផ្សេងឯណាឯណីទៅវិញ។ ទាំងអស់នេះ គឺសុទ្ធតែជាឈើស្ងួត ដែលត្រូវការតែកម្ដៅចេញពីភ្លើងចន្លុះប៉ុណ្ណោះ ម៉េចមិនឆេះ?
បើទោះបីជាគ្មានបក្សប្រឆាំង ក៏ពួកគាត់មិនចូលបក្សប្រជាជនដែរ ព្រោះថា ពួកគាត់ស្អប់បក្សប្រជាជន។ តួយ៉ាង បើឲ្យខ្ញុំនិយាយក៏អាចនិយាយបានទាយបានមិនឲ្យខុសថា គឺអ្នកទៅបាតុកម្មទាំងនោះមានមនុស្សតែ ៣ ប្រភេទប៉ុណ្ណោះ ក. សកម្មជនបក្សប្រឆាំង រួមទាំងយុវជនជាសិស្សនិស្សិត ដែលលង់មនោគម បក្សប្រឆាំង ខ.មនុស្សល្អសម្បកក្រៅតែក្នុងចង់បានអំណាច ចង់បានកេរ្តិ៍ឈ្មោះ នៅក្រៅបក្ស តែគាំទ្របក្សដើម្បីឲ្យ ពួកគេនឹងទទួលបានផលប្រយោជន៍នៅថ្ងៃណាមួយ ពេលបក្សប្រឆាំងឈ្នះឆ្នោត គ. គឺក្រុមរងគ្រោះ ទាំង ៤ យ៉ាងខាងលើ យ៉ាងហោចណាស់តំណាងឲ្យ ៧០% នៃបាតុករទាំងអស់។
លោក សម រង្ស៊ី និង លោក កឹម សុខា ដឹងថា បើដុតគឺពន្លត់មិនឈ្នះ ហេតុអីនៅចង់ដុត? គាត់អាចពន្លត់នូវចន្លុះទាំងអស់របស់គាត់ តែគាត់គ្មានទឹកពន្លត់ភ្លើង ឆេះព្រៃទេ។ ឥឡូវនេះបក្សប្រឆាំង មានមេទ័ព និងមេទ័ពរង តែងនិយាយថា យើងធ្វើសមាជ ចង់ដឹងថា តើឲ្យយើងចូលឬមិនចូល? ពាក្យនេះ មានន័យ ច្បាស់ណាស់ថា មេទ័ពទាំង ២ នេះ កំពុងរកច្រកចេញពីភ្លើងព្រៃ បក្សប្រជាជន បញ្ចេញព័ត៌មានឲ្យតំណែង ប្រហែល ១០ ក្រសួង ហើយចង់ស៊ើបមើលថា តើភ្លើងឆេះអស់ឬនៅ ត្រជាក់ឬនៅ? តាមខ្ញុំយល់មិនអាចត្រជាក់បានទេ ព្រោះពួកគាត់ មានគំនិតមួយ ស្អប់បក្សប្រជាជន ស្រឡាញ់មេទ័ពធំ និងមេទ័ពរងណាស់។
ដូចនេះ មេទ័ពធំ មេទ័ពរងនៅតែចង់ចូល តែខ្លាចបើចូលថ្ងៃនេះ ថ្ងៃក្រោយ បានភ្លើងមកពីណា មកដុតព្រៃយកដីធ្វើចម្ការ ហើយចន្លុះនោះ ប្រហែលជាដុតលែងឆេះក៏ថាបាន។ ចង់ឬមិនចង់ គាត់ត្រូវតែរត់តាមភ្លើង ឆេះព្រៃ ដើម្បីសល់ភ្លើងទុកដុត នៅអាណត្តិក្រោយ ហើយកុំឲ្យឆេះបន្ទាយខ្លួនឯង មុនចប់សង្គ្រាម តែប៉ុន្មានថ្ងៃនេះមេទ័ព មេទ័ពរង ខ្ញុំមើលឃើញថា កំពុងគិតរឿងមួយធំជាងការចរចាមិនត្រូវគ្នាទៅទៀត នោះគឺ ភ្លើងឆេះព្រៃអាចរលត់ ត្រជាក់ នៅពេលណា ដោយសារតែពេលនេះ សម្ដីមេទ័ព មេទ័ពរង ជំរំព្រះអាទិត្យ ដូចជាទន់ហើយ៕
និស្សិតទាត់ខ្យល់ សំ សច្ចារ samsacha26@yahoo.com ពីខេត្ត ស្វាយរៀង
ប្រភពពី ភ្នំពេញប៉ុស្តិ៍
