អង្គការក្នុងស្រុករកអន្តរាគមន៍ពី UN ក្នុងបណ្ដឹងប្រឆាំងមន្ត្រីដែនជម្រកសត្វ
កំពង់ស្ពឺៈ អង្គការការពារធនធានធម្មជាតិ និងសិទ្ធិមនុស្សក្នុងខេត្ត កំពង់ស្ពឺ បានដាក់សំណើ និងបញ្ជីឈ្មោះមនុស្សជាង ២០០ នាក់ទៅអង្គការសហប្រជាជាតិប្រចាំប្រទេសកម្ពុជា ដើម្បីស្នើសុំឃ្លាំមើល និងស៊ើបអង្កេតសំណុំរឿងនៅតុលាការ ដែលបានប្តឹងមន្ត្រីដែនជម្រកសត្វព្រៃ ភ្នំឱរ៉ាល់ និងអាជ្ញាធរជាច្រើននាក់ពីការកាប់បំផ្លាញព្រៃឈើ។
លោក ជា ហ៊ាន ប្រធានអង្គការប្រឆាំងអំពើពុករលួយទប់ស្កាត់ការបំផ្លាញធនធាន ធម្មជាតិ និងការពារសិទ្ធិពលរដ្ឋក្នុងខេត្ត កំពង់ស្ពឺ បានឲ្យដឹងថា លោកបានដាក់សំណើរួមនឹងបញ្ជីឈ្មោះមនុស្សចំនួន ២៤១ នាក់ទៅការិយាល័យនៃឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ប្រចាំកម្ពុជាកាលពីថ្ងៃចន្ទ ដើម្បីឲ្យជួយឃ្លាំមើលសំណុំរឿងដែលលោកបានដាក់ទៅតុលាការខេត្ត ប្តឹងលោក ឈុន ឈៀហេង ប្រធានដែនជម្រកសត្វព្រៃ ឱរ៉ាល់ និងមន្រ្តី ៨ នាក់ទៀតពីការសមគំនិតដោយចេតនាកាប់បំផ្លាញព្រៃឈើ និងរានយកដីក្នុងដែនជម្រកសត្វព្រៃដែលការពារដោយព្រះរាជក្រឹត្យ។
លោកបានបញ្ជាក់ថា៖ «ខ្ញុំស្នើសុំអង្គការសហប្រជាជាតិជួយតាមឃ្លាំមើល និងចុះស៊ើបអង្កេតសំណុំរឿងខ្ញុំ ដើម្បីឲ្យដំណើការដោយយុត្តិធម៌ និងផ្តន្ទាទោសជនល្មើស»។
លោកបានបន្តថា បន្ទាប់ពីលោកបានដាក់ពាក្យបណ្តឹងកាលពីខែ កក្កដា កន្លងទៅ តុលាការខេត្ត កំពង់ស្ពឺ បានកោះហៅលោក និងលោក ឈុន ឈៀហេង ទៅសាកសួរពាក់ព័ន្ធទៅនឹងករណីនេះ។ ប៉ុន្តែមកដល់ពេលនេះ មិនទាន់មានការឃាត់ខ្លួនអ្នកណាម្នាក់នៅឡើយទេ។ ដោយបារម្ភថា តុលាការតម្កល់បណ្តឹងរបស់លោកមិនចាត់ការ ទើបលោកស្វែងរកអង្គការសហប្រជាជាតិឲ្យជួយ។
កាល ពីម្សិលមិញ ភ្នំពេញ ប៉ុស្តិ៍ បានទទួលបានសំណើថតចម្លងដែលលោក ជា ហ៊ាន ដាក់ទៅឧត្តមស្នងការនោះដោយបានរៀបរាប់ពីសកម្មភាពស៊ើបអង្កេតរបស់អង្គការលោកពីការកាប់បំផ្លាញឈើក្នុងដែនជម្រកសត្វព្រៃក្នុងខេត្ត កំពង់ស្ពឺ និង កោះកុង និងពីសំណុំរឿងដែលលោកមានក្តីក្តាំ ជាមួយនឹងមន្រ្តីដែនជម្រក រហូតដល់មានការបង្កើតភ័ស្តុតាងក្លែងក្លាយ ដើម្បីចាប់លោកឃុំខ្លួនជិត ៣ ឆ្នាំ និងធ្វើឲ្យបុគ្គលិកអង្គការលោកទទួលការគំរាមកំហែងអាយុជីវិត ត្រូវបានបាញ់របួស ដុតផ្ទះ និង ១៨ នាក់បានរត់គេចខ្លួនទៅប្រទេស ថៃ។
លោកបានថ្លែងថា តំណាងអង្គការសហប្រជាជាតិកំពុងរកមេធាវីការពារក្តីឲ្យលោក។
ករណី ស្រដៀងគ្នានេះដែរ នៅថ្ងៃពុធនេះ លោក ជា ហ៊ាន គ្រោងនឹងដាក់សំណើមួយច្បាប់របស់ពលរដ្ឋ ៤៨ គ្រួសារក្នុងស្រុក ឱរ៉ាល់ ទៅរដ្ឋមន្រ្តីក្រសួង បរិស្ថាន ដើម្បីស្នើសុំឲ្យចាត់ក្រុមអធិការកិច្ចរបស់ក្រសួង ចុះត្រួតពិនិត្យការកាប់បំផ្លាញព្រៃឈើក្នុងតំបន់ការពារនេះ និងកំណត់ឲ្យបានច្បាស់ពីព្រំប្រទល់ការពារ ដោយព្រះរាជក្រឹត្យ។
ភ្នំពេញ ប៉ុស្តិ៍ មិនអាចទាក់ទងលោក ឈុន ឈៀហេង នាយដែនជម្រកសត្វព្រៃ ភ្នំឱរ៉ាល់ ដើម្បីសុំការបំភ្លឺបានទេ កាលពីម្សិលមិញដោយលោកបានបិទទូរស័ព្ទ។
លោក ខន សុខុន ប្រធានក្រុមល្បាតនៃដែនជម្រក បានបដិសេធ មិនអត្ថាធិប្បាយទេ ដោយនិយាយថា មិនមែនជាលោក សុខុន។
ទោះយ៉ាងណាលោក នៅ ណាក់ អនុប្រធានមន្ទីរ បរិស្ថាន ខេត្ត កំពង់ស្ពឺ បានមានប្រសាសន៍ថា មន្រ្តីភាគច្រើននៅដែនជម្រកសត្វព្រៃ ភ្នំឱរ៉ាល់ ជាមន្រ្តីជាប់កិច្ចសន្យាដែលជ្រើសរើស និងគ្រប់គ្រងដោយក្រសួង បរិស្ថាន ហើយមន្ទីររបស់លោកអត់មានជាប់ពាក់ព័ន្ធទៅនឹងបទល្មើសព្រៃឈើនោះទេ។ លោកបានបញ្ជាក់ថា៖ «មន្រ្តីនៅដែនជម្រកទាំងអស់គឺស្ថិតក្រោមការគ្រប់គ្រងរបស់ក្រសួង បរិស្ថាន ហើយខាងមន្ទីរអត់មានលូកដៃចូលកិច្ចការផ្ទៃក្នុងរបស់គេទេ»៕
ប្រភពពី ភ្នំពេញ ប៉ុស្តិ៍
