Sony ប្រកាសចេញទូរស័ព្ទទំនើប Xperia Z1 mini (វីឌីអូ)
ក្រុមហ៊ុន Sony ទើបបានប្រកាសចេញនូវទូរស័ព្ទទំនើបថ្មី Xperia Z1 mini ដែលត្រូវបានគេហៅឈ្មោះថា Xperia Z1 f និងមានបំពាក់នូវលក្ខណសម្បត្តិបែបបច្ចេកទេសជាច្រើនដូចគ្នាទៅនឹង Xperia Z1 ដែលជាទូរស័ព្ទឆ្នើមរបស់ក្រុមហ៊ុនមានកាមេរ៉ាទំហំដល់ទៅ 20.7MP ។
ទូរស័ព្ទទំនើបទាំងពីរគឺ Xperia Z1 ដែលជាទូរស័ព្ទដើម និង Xperia Z1 f ដែលជាទូរស័ព្ទមានរាងតូចច្រឡឹង មានភាពខុសគ្នាតែទំហំ និងកម្រិតភាពច្បាស់នៃទូរស័ព្ទប៉ុណ្ណោះ ជាក់ស្ដែងស្របពេល Xperia Z1 ត្រូវបានបំពាក់ដោយអេក្រង់ទំហំ 5-inch LCD ជាមួយនឹងកម្រិតភាពភាពច្បាស់ 1920x1080pixels (Full HD ) ទូរស័ព្ទទំនើបថ្មី Sony Xperia Z1 f ត្រូវបានបំពាក់ដោយអេក្រង់ទំហំ 4.3-inch LCD ដែលមានកម្រិតភាពច្បាស់ 1280x720pixels (HD) ។
លក្ខណសម្បត្តិរបស់ Xperia Z1 f ៖
- អេក្រង់ 4.3-inch LCD
- កម្រិតភាពច្បាស់ 1280x720pixels (HD)
- កាមេរ៉ា 20.7 MP EXMOR sensor
- CPU Qualcomm Snapdragon 800 quad-core 2.2GHz
- GPU Adreno 330
- RAM 2GB
- អង្គចងចាំជាប់ម៉ាស៊ីន 16GB អាចបន្ថែម microSD card
- ថាមពលថ្ម 2,300mAh
- ដំណើរការដោយប្រព័ន្ធប្រតិបត្តិការ Android
ទស្សនាវីឌីអូ៖
សូមបញ្ជាក់ថា ខុសគ្នាតែទំហំអេក្រង់ និងកម្រិតភាពច្បាស់ទូរស័ព្ទទំនើប Xpeira Z1 f ត្រូវបានបំពាក់បន្ថែមនូវលក្ខណសម្បត្តិពិសេសមិនជ្រាបទឹក និងធូលី តាមស្តង់ដារ IP58 ។
យ៉ាងណាមិញទូរស័ព្ទនេះ នឹងចេញលក់ដោយក្រុមហ៊ុន Docomo ក្នុងប្រទេសជប៉ុន នាខែធ្នូ ខាងមុខ ជាមួយនឹងជម្រើសបួនពណ៌គឺ ខ្មៅ ស ផ្កាឈូក និងពណ៌ទឹកក្រូច ។ ដោយឡែកចំពោះតម្លៃរបស់ Sony Xperia Z1 f មិនមានប្រភពណាមួយបានដឹងនៅឡើយទេ ហើយទូរស័ព្ទនេះ ក៏នឹងត្រូវចេញលក់ទៅខាងក្រៅប្រទេសជប៉ុនផងដែរ ៕
