កម្មករសាឡង់ម្នាក់ លង់ទឹកស្លាប់ មួយយប់ទើបឃើញសព និងកុមារាម្នាក់ លង់ទឹកអណ្តូង ស្លាប់
ខេត្តកំពត: ដោយមានការជ្រោមជ្រែងពីកម្លាំងវរៈ២៤១នគរបាលការពារព្រំដែនទឹក និងសមត្ថកិច្ចកងនាវាចរណ៍ ប្រចាំខេត្តកំពត-កែប កាលពីថ្ងៃត្រង់ ថ្ងៃទី៧ ខែតុលា ឆ្នាំ២០១៣ ក្រុមកម្មករសាឡង់ដឹកខ្សាច់ បានរកឃើញសពមិត្តរួមការងារម្នាក់ បន្ទាប់ពីលង់លិចចូលព្រែក ក្នុងភូមិសាស្ត្រភូមិជុំក្រៀល ឃុំ ជុំក្រៀល ស្រុកទឹកឈូ នារសៀលថ្ងៃទី៦ ខែតុលា ព្រោះតែការលោតតាមចាប់ធុងសាំង ធ្លាក់ពីសាឡង់។
ជនរងគ្រោះ ក្នុងករណីនេះ ឈ្មោះ ឡេ វ៉ាំងងៀ អាយុ ៤៣ឆ្នាំ ទីលំនៅខេត្តឡុងអាង ប្រទេសវៀតណាម ជាកម្មករសាឡង់ដឹកខ្សាច់។
មិត្តភក្តិរួមការងារ បានឱ្យដឹងថា ដោយសារមានសម្បកធុងសាំងមួយបាន ធ្លាក់ពីសាឡង់ និងអណ្តែតតាមទឹក កាលពីវេលាម៉ោងប្រហែល ២រសៀលថ្ងៃទី៦ ខែតុលា ឆ្នាំ២០១៣ ក្រុមកម្មករបានបើកទូកម៉ាស៊ីនតាម។ ជាចៃដន្យ ពេលជិតដល់ចំណុចសម្បកធុងអណ្តែតទៅហើយ ស្រាប់តែទូកបានកល់ជាប់នឹងដី ទើបជនរងគ្រោះ លោតចុះ ដើម្បីចាប់អូស នាំយកមកលើទូក។ ប៉ុន្តែការលោតទៅនោះ ជនរងគ្រោះ បានលិចបាត់ ដោយមិនឃើញងើបឡើងវិញ ទើបកម្មករនាំគ្នាចុះមុជ រាវរកតែមិនឃើញ។
ដោយសារនៅទីតាំងនោះ ក្បែរនឹងកន្លែងឈរជើងរបស់កម្លាំងវរៈ២៤១ នគរបាលការពារព្រំដែនទឹក និងសមត្ថកិច្ចកងនាវាចរណ៍ ប្រចាំខេត្តកំពត-កែប ក្រុមកម្មករបានរាយការណ៍ប្រាប់ ក៏មានការមកជួយស្វែងរករហូតដល់យប់។
ព្រោះតែការរកមិនទាន់ឃើញសព នាព្រឹកថ្ងៃបន្ទាប់នេះ (៧តុលា) ទាំងកម្លាំងសមត្ថកិច្ច ទាំងកម្មករទូកបានបន្តមុជរាវរកទៀត រហូតដល់ម៉ោងជាង១២ថ្ងៃត្រង់ ទើបប្រទះសពនៅបាតទឹក ត្រង់ចំណុចបាត់ខ្លួន។
លោក គង់ សុខន នាយការិយាល័យនគរបាលព្រហ្មទណ្ឌកម្រិតធ្ងន់បានឲ្យដឹងថា ដោយឡែកនារសៀលថ្ងៃទី៦ ខែតុលា ឆ្នាំ២០១៣ កុមារាម្នាក់ ឈ្មោះ ប៉ាល់ វិសាល អាយុ ៨ឆ្នាំ បានធ្លាក់ទឹក អណ្តូងស្លាប់ ក្នុងភូមិក្រាំង ឃុំត្រពាំងធំ ស្រុកទឹកឈូ ក្រោយពីឪពុកម្តាយ នាំមកពីខេត្តព្រះសីហនុ ដើម្បីសួរសុខទុក្ខសាច់ញាតិ នៅភូមិឃុំកើតហេតុនេះ ក្នុងឱកាសបុណ្យភ្ជុំបិណ្យ។
ក្រោយស្រង់ពីអណ្តូង ក្រុមគ្រួសារ បាននាំយកកុមាររងគ្រោះ ទៅមន្ទីរពេទ្យដែរ តែត្រូវគ្រូពេទ្យប្រាប់ថាកុមាររងគ្រោះ បានស្លាប់ទៅហើយ៕
Read more: http://www.cambodiapage.info/?p=18196#ixzz2h38f2whw
