យុវតីម្នាក់ បានលង់ទឹកស្លាប់ បាត់បង់ជីវិតទាំងវ័យក្មេង នៅទំនប់២០ ឧសភា
ខេត្តកំពង់ឆ្នាំង ៖ យុវតីវ័យ១៦ឆ្នាំម្នាក់ បានស្លាប់បាត់បង់ជីវិត យ៉ាងអាណោចអាធ័ម កាលពីវេលាម៉ោង ៣រសៀល ថ្ងៃទី៣០ ខែកញ្ញា ឆ្នាំ២០១៣ ខណៈដែលនាងបានទៅលេងទឹក ហើយបានភ្លាត់ស្នៀតរអិលជើង ធ្លាក់ចូលកន្លែងជ្រៅ បណ្តាលឲ្យលង់ស្លាប់នៅចំណុចទ្វារទឹក ២០ ឧសភា ស្ថិតនៅភូមិស្រះកែវ ឃុំមេលំ ស្រុកបរិបូរណ៍។
បើតាមប្រភពព័ត៌ មានពីកន្លែងសមត្ថកិច្ចបានឲ្យដឹងថា ជនរងគ្រោះដែលបានស្លាប់បាត់បង់ជីវិតមានឈ្មោះ ធន សុផាន់ណា អាយុ ១៦ឆ្នាំ មានទីលំនៅភូមិឬស្សីកែវ ខណ្ឌឬស្សីកែវ រាជធានីភ្នំពេញ។ ប្រភពដដែលបានបន្តឲ្យដឹងទៀតថា មុនពេលកើតហេតុ គេបានឃើញមនុស្សមួយក្រុម មានគ្នា៣នាក់ ស្រី២ ប្រុស១ បានជិះរថយន្តម៉ាកឡិចស៊ីសមួយគ្រឿង មកលេងទឹកនៅចំណុចទំនប់ទ្វារទឹក ២០ ឧសភា។ ខណៈពេលកំពុងលេងទឹក នារីរងគ្រោះបានរអិលជើងធ្លាក់ចូលទឹកជ្រៅ ហើយបានគួចចេញទៅ ភ្លាមៗនោះ មានមនុស្សប្រុស ២នាក់ ដែលជាអ្នកស្រុកជិតនោះ បានព្យាយាមជួយដែរ តែជួយមិនបាន ព្រោះទឹកបានគួចខ្លាំងពេកបណ្តាលឲ្យនារីរងគ្រោះលង់ទឹកស្លាប់តែម្តង ។
បន្ទាប់ពីកើតហេតុ សាកសពជនរងគ្រោះត្រូវបានក្រុមគ្រួសារទំនាក់ទំនងរថយន្តរបស់មន្ទីរពេទ្យបង្អែកខេត្ត ដើម្បីដឹកយកទៅធ្វើបុណ្យតាមប្រពៃណីនៅឯគេហដ្ឋាន៕
__________________
ប្រភពពីវត្តភ្នំ
