បុរសវ័យក្មេងដេកស្លាប់ ចោលកូនប្រុសស្រីតូចៗ ២ នាក់ ពេលប្រពន្ធទៅផ្សារ
រាជធានីភ្នំពេញ ៖ បុរសវ័យក្មេងម្នាក់ ខណៈដេកនៅក្នុងផ្ទះ ជាមួយកូនតូចៗចំនួន ២ នាក់ បានសា្លប់ដោយគ្មានមូលហេតុ ហើយសាច់ញាតិបានអះអាងថា បណ្តាលមកពី ជំងឺគាំងបេះដូង ដោយសារតែជនរងគ្រោះ ធ្លាប់មានជំងឺខ្សោយបេះដូង និងជំងឺលើសឈាម ក្នុងនោះនគរបាលចុះទៅពិនិត្យសាកសព បានស្នើឲ្យក្រុមគ្រួសារ ពិនិត្យមើកអីវ៉ាន់នៅក្នុងផ្ទះ ក្រែងលោកមានបាត់បង់ ប៉ុន្តែក្រុមគ្រួសារ អះអាងថា ពុំមានអ្វីបាត់បង់នោះឡើយ
ហេតុការណ៍ភ្ញាក់ផ្អើលនេះ បានកើតឡើងកាលពីវេលាម៉ោង ១និង៣០ នាទីថ្ងៃទី២៦ ខែកញ្ញា ឆ្នាំ២០១៣ ស្ថិតនៅក្នុងផ្ទះល្វែងគ្មានលេខ កែងក្រោយផ្សារត្រពាំងថ្លឹង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។ ជនរងគ្រោះមានឈ្មោះ ផន សុខខេង ភេទប្រុសអាយុ ២៥ ឆ្នាំ រស់នៅផ្ទះកើតហេតុ មានស្រុកកំណើតនៅខេត្តសៀមរាប មានប្រពន្ធឈ្មោះ សុខ ស្រីអូន អាយុ ៣៣ ឆ្នាំជាជាងអ៊ុតសក់ រស់នៅជាមួយគ្នា ក្នុងផ្ទះកើតហេតុ មានស្រុកកំណើតនៅខេត្តកំពង់ចាម មានកូនពីរនាក់ ស្រី១ប្រុស១ កូនស្រីបងអាយុទើបបាន ៣ ឆ្នាំ
បើយោងតាមប្រពន្ធ របស់ជនរងគ្រោះ បានឲ្យដឹងថា កាលពីព្រឹកគាត់បាន ទុកកូនទាំងពីរនាក់ ឲ្យនៅជាមួយជនរងគ្រោះ ដោយគាត់ទៅផ្សារ លុះរហូតដល់ម៉ោងប្រហែល ១រសៀល គាត់បានទូរស័ព្ទ មកកាន់ប្តីដោយចង់សួរសុខទុក្ខកូនប្អូន ដែលគេក្តៅខ្លួន បានធូរស្រាល ឬមួយយ៉ាងណា ? ប៉ុន្តែប្តីរបស់គាត់ ពុំបានទទួលទូរស័ព្ទនោះទេ បែរជាកូនបងទទួលទូរស័ព្ទ ដោយនិយាយថា ឪពុកដេកលក់ហើយ។
ពេលដែលកូនដាស់មិនងើប ទើបនាងសង្ស័យក៏ទូរស័ព្ទ មកកាន់អ្នកជិតខាង ឲ្យជួយមើលប្តីរបស់គាត់ផង ។ ពេលអ្នកជិតខាងដើរមកមើល ហៅមិនឮទ្វារជាប់ខ្ទាស់សោខាងក្នុង ទើបកាន់តែសង្ស័យ ក៏មកផ្ទះ ពេលនោះហៅមិនងើបឲ្យកូនដាស់ក៏មិនភ្ញាក់ ទើបហៅជាងមកដោះ កញ្ចក់ទ្វារដកគន្លឹះឃើញថា ប្តី របស់នាងស្លាប់បាត់ទៅហើយ ។ បន្ទាប់ពីនគរបាលពិនិត្យរួចរាល់ សាកសពត្រូវក្រុមគ្រួសារ ដឹកយកទៅស្រុកកំណើត ឯខេត្តសៀមរាប ដើម្បីបុណ្យ ទៅតាមប្រពៃណី៕
_____________________
ប្រភពពីវត្តភ្នំ
