មន្ត្រីសហជីពសេរីកម្មករ ម្នាក់រងការគំរាមសម្លាប់ តាមទូរស័ព្ទ
មន្ត្រីសហជីពសេរីកម្មករនៃព្រះរាជាណាចក្រកម្ពុជា ប្រចាំរោងចក្រខេមបូហែនសាំពីរ នៅសង្កាត់ចោមចៅ ខណ្ឌពោធិ៍សែនជ័យ ត្រូវបានជនមិនស្គាល់អត្តសញ្ញាណ គំរាមសម្លាប់តាមទូរស័ព្ទ។
ប្រធានសហជីពសេរីកម្មករប្រចាំរោងចក្រកាត់ដេរខេមបូហែនសាំពីរ លោក វ៉ាន់ បូរ៉េត ប្រាប់VODនៅរសៀលថ្ងៃចន្ទទី៣០ ខែកញ្ញានេះថា លោកត្រូវបានជនមិនស្គាល់អត្តសញ្ញាណហៅទូរស័ព្ទទៅលោកនៅព្រឹកមិញនេះ ដោយព្រមានថា បើមិនឈប់ធ្វើការនេះទេ គេនឹងសម្លាប់ចោល។ លោកបន្តថា តាំងពីចាប់ធ្វើការមក លោកមិនដែលមានសត្រូវជាមួយអ្នកណាទេ តែកន្លងមកលោកធ្លាប់បានប្រមូលកម្មករឲ្យទៅបោះឆ្នោតជូនគណបក្សសង្គ្រោះជាតិ។ បន្ទាប់ពីមានគេគំរាមសម្លាប់ហើយ លោកបានទៅប្តឹងសមត្ថកិច្ចនៅសង្កាត់ចោមចៅ តែសមត្ថកិច្ចមិនបានចាត់ការអ្វីទេគ្រាន់តែឲ្យលេខទូរស័ព្ទពីរខ្សែសម្រាប់ទាក់ទងពេលមានបញ្ហាប៉ុណ្ណោះ។
លោក វ៉ាន់ បូរ៉េត សំណូមពរឲ្យស្ថាប័នពាក់ព័ន្ធជួយស៊ើបអង្កេតពីករណីនេះ ដោយលោកបារម្ភពីសុវត្ថិភាពផ្ទាល់ខ្លួន ៖ "ខ្ញុំអំពាវនាវឲ្យគ្រប់ស្ថាប័នដែលពាក់ព័ន្ធហ្នឹងឲ្យគាត់ជួយស៊ើបអង្កេតករណីហ្នឹងផង ហើយណាមួយខ្ញុំជាកម្មកររោងចក្រចឹងខ្ញុំមានការព្រួយបារម្ភណាស់ ពីព្រោះខ្ញុំទៅធ្វើការចឹងខ្ញុំអត់ដឹងថា អ្នកណាគេស្អប់ខ្ញុំចឹងណាស់" ។
VOD បានទាក់ទងមេប៉ូលិសសង្កាត់ចោមចៅ តែលោកមេប៉ូលិសដែលមិនបញ្ចេញឈ្មោះរូបនោះ អះអាងថា មិនមានអ្នកប្តឹងពីករណីនេះ។
បើតាមជនរងគ្រោះឲ្យដឹងថា លេខទូរស័ព្ទដែលហៅចូល ហើយគំរាមសម្លាប់នោះ គឺលេខ ០៩៧ ៨២ ២០ ៧៦៥។ ប៉ុន្តែលេខនេះ នៅពេលVOD បានទាក់ទងអ្នកទទួល អះអាងថា ជាលេខទូរស័ព្ទសាធារណៈ។
VOD មិនអាចទាក់ទងអ្នកនាំពាក្យក្រសួងមហាផ្ទៃ និងអ្នកនាំពាក្យអគ្គស្នងការដ្ឋាននគរបាលជាតិបានទេនៅល្ងាចនេះ។
អគ្គលេខាធិការរងសហជីពសេរីកម្មករនៃព្រះរាជាណាចក្រកម្ពុជា លោក ថន ថុល ទទួចឲ្យសមត្ថកិច្ចចាត់វិធានការណ៍ដោយស៊ើបអង្កេតជាបន្ទាន់ ព្រោះការគំរាមកំហែងបែបនេះតែងតែកើតមានជាញឹកញាប់ លើមន្ត្រី និងសមាជិកសហជីពសេរីកម្មករ ៖ “ខ្ញុំមានការព្រួយបារម្ភចំពោះគាត់ សូមឲ្យអាជ្ញាធរចាត់វិធានការ ឲ្យបានឆាប់ទៅលើជនដែលបង្កហេតុ ព្រោះច្រើនលើកច្រើនសារហើយដែលគំរាមកំហែង មកលើសកម្មជននិងថ្នាក់ដឹកនាំ សហជីពសេរីកម្មករយើង”។
គួរបញ្ជាក់ថា កាលពីឆ្នាំ២០០៤ ប្រធានសហជីពសេរីកម្មករនៃព្រះរាជាណាចក្រកម្ពុជាដ៏ល្បី គឺលោក ជា វិជ្ជា ត្រូវបានជនមិនស្គាល់អត្តសញ្ញាណ ផ្ញើសារចូលទូរស័ព្ទរបស់លោកគំរាមសម្លាប់។ ហើយប៉ុន្មានថ្ងៃក្រោយមកលោក ត្រូវបានឃាតករបាញ់សម្លាប់នៅមុខតូបលក់កាសែត ជិតវត្តល័ង្កការ រាជធានីភ្នំពេញ បើទោះជាលោកបានប្តឹងករណីនេះទៅសមត្ថកិច្ចរួចហើយក៏ដោយ។ រហូតមកទាល់ពេលនេះជិត១០ឆ្នាំហើយតែឃាតករពិត មិនទាន់ត្រូវសមត្ថកិច្ចចាប់មកផ្តន្ទាទោសនៅឡើយទេ៕
