អាងខ្លួនជាកូន ឧត្តមសេនីយ៍ ដកកាំភ្លើងខ្លីគំរាម អ្នកជិតខាងព្រោះរឿងជម្លោះតិចតួច
រាជធានីភ្នំពេញ ៖ បុរសទំនើងម្នាក់ ដែលគេស្គាល់ថាជាប្រុសលោកឧត្តមសេនីយ៍ឯកម្នាក់នៅក្រសួងមហាផ្ទៃ និងមានតួនាទីជាវរសេនីយ៍ឯកនៅក្រសួងមហាផ្ទៃ ត្រូវបានប្រជាពលរដ្ឋដែលលំនៅដ្ឋាននៅជាប់គ្នា ដាក់ពាក្យប្តឹងពីបទជេរប្រមាថ និងប្រើប្រាស់អាវុធខ្លីគំរាមកំហែងកាលពីថ្ងៃទី១៩ ខែកញ្ញា ឆ្នា២០១៣ ស្ថិតនៅផ្ទះលេខ១៥៥ វិថីព្រះមុនីរ៉េត ផ្លូវលេខ២១៧ សង្កាត់បឹងសាឡាង ខណ្ឌទួលគោក។
បើតាមការរៀបរាប់ពីសមត្ថកិច្ចមូលដ្ឋានបានឲ្យដឹងថា បុរសដែលជាកូនឧត្តមសេនីយ៍ទំនើងខាងលើនេះមានឈ្មោះ ស ម៉ូលីនីន មានឋានន្តរស័ក្តិជាវរសេនីយ៍ឯកនៅក្រសួងមហាផ្ទៃ មានទីលំនៅផ្ទះលេខ៦២ នៅជាប់នឹងលំនៅដ្ឋានកើតហេតុខាងលើ។ ប្រភពដដែលបានបន្តទៀតថា មុនពេលកើតហេតុជនបង្កបានវាយទាត់ធាក់អិដ្ឋ ព្រមទាំងយកកាំភ្លើងខ្លីម៉ាកឡុកចង្អុល និងគំរាមដល់ក្រុមគ្រួសារ និងជាងសំណង់ដោយសារខឹងម្ចាស់ផ្ទះឱ្យជាងសំណង់សាងសង់ផ្ទះដោយមានដាក់ទរទឹកគងលើព្រំដីរបស់គេ។
បច្ចុប្បន្នសំណុំរឿងខាងលើនេះ ខាងសមត្ថកិច្ចមូលដ្ឋានកំពុងតែព្យាយាមធ្វើការសម្របសម្រួលភាគីទាំង២ ដោយបានកោះហៅភាគីទាំង២ចូលខ្លួនមកធ្វើការចរចាគ្នានៅថ្ងៃទី២៣ ខែកញ្ញា ឆ្នាំ២០១៣ នេះ។ មជ្ឈដ្ឋានទូទៅកំពុងតែទន្ទឹងរង់ចាំមើលថា តើសមត្ថកិច្ចហ៊ានចាត់វិធានការដាក់ទោសលើកូនប្រុសអ្នកមានលុយ មានអំណាច ដែលអាងស្បែកឪពុកជាឧត្តមសេនីយ៍ដើរគំរាមកំហែងគេដែរឬអត់៕
_______________________
ប្រភពពីវត្តភ្នំ
