ពៅ លីដា ធ្លាយទំនាក់ ទំនងស្នេហ៍ ជាមួយបុរស អាណិកជន ខ្មែរនៅអាមេរិក
ភ្នំពេញ៖ តារាសម្តែង មានឈ្មោះល្បីគួរសម សម្បុរខ្មៅស្រអែមស្រស់កញ្ញា ពៅ លីដា ឈានចូលដល់ពាក់កណ្តាលឆ្នាំ២០១៣នេះ វត្តមាននៃការសម្តែងរបស់នាង ត្រូវបានមហាជន ទូទៅមើលឃើញថា ហាក់មានការស្ងប់ស្ងាត់ជាងមុនបន្តិច។ ខណៈដែលថ្មីៗនេះក៏មានការសង្ស័យថា កញ្ញា ពៅ លីដា កំពុងតែលួចមានទំនាក់ទំនង ស្នេហាក្រៅឆាកជាមួយបុរសម្នាក់ដែលជា អាណិកជនរស់នៅក្រៅស្រុក។
ទោះបីជាពេលនេះកញ្ញា ពៅ លីដា ហាក់មិនសូវលេចមុខលេខមាត់ នៅក្នុងពិភពសិល្បៈក៏ដោយ តែបើនិយាយពីមន្តស្នេហ៍ របស់នាងវិញ គឺមិនចាញ់តារាស្រីល្បីៗ ដទៃឡើយ ពោលគឺមានបុរសជាច្រើន ព្យាយាមតាមយកចិត្ត យកថ្លើមនាង និងធានាចិញ្ចឹម ដើម្បីបានក្លាយជា ម្ចាស់គ្រងបេះដូង របស់នាង ។ តែជារឿយៗនាងតែងតែ បដិសេធ មិនទាន់ចង់គិតពី រឿងនេះទេ ព្រោះថាខ្លួននៅក្មេង។
ផ្អែកតាមប្រភពពីអ្នកនៅក្បែរ តារាស្រីរូបនេះបានលួចបង្ហើបថា សម្រស់របស់តារាសម្តែង និង ជាពិធីការិនីកញ្ញា ពៅ លីដា ពិតជាមានឥទ្ធិពលមិនធម្មតាឡើយ ព្រោះកំពុងធ្វើឱ្យបុរសអាណិកជនវ័យកណ្តាលម្នាក់លង់ស្នេហ៍យ៉ាងងុបងុល និងថែមទាំងព្រមធ្វើអ្វីគ្រប់យ៉ាងដើម្បីតម្រូវចិត្តនាងមិនឱ្យទាស់ម្តងណាឡើយ។
ប្រភពខាងលើបាននិយាយថា ពៅ លីដា សព្វថ្ងៃនេះកំពុងត្រូវបានបុរសម្នាក់ អាណិកជនខ្មែររស់នៅអាមេរិម្នាក់ តាមថ្ពក់បេះដូង និងត្រូវគេសង្ស័យថា នាង នឹង អាណិកជនខ្មែររូបនេះកំពុងតែមានទំនាក់ទំនង ដ៏ជិតស្និទ្ធជាមួយគ្នាទៀតផង...។ប្រភពបានបន្ថែមថា បុរសអាណិកជនខ្មែរអាមេរិកដែលកំពុងតែ ទាក់ទងជាមួយកញ្ញា ពៅ លីដា នេះជាមនុស្សដែលសម្បូរទ្រព្យស្តុក ព្រោះគេមានមុខរបរ រកស៊ីផ្ទាល់ខ្លួននៅទីនោះ។
ជុំវិញការលេចសញ្ញាស្នេហាថ្មី ពាក់ព័ន្ធជាមួយបុរសនាយសមុទ្រនេះដែរ គេហទំព័រ Looking TODAY មិនទាន់អាចទាក់ទងសុំការបំភ្លឺពីកញ្ញា ពៅ លីដា បាននៅឡើយទេ នៅព្រឹកថ្ងៃច័ន្ទ ទី១៩ខែ សីហា ឆ្នាំ២០១៣នេះ។ ទោះជាយ៉ាងណា ក៏ដោយ Looking TODAY រងចាំស្វាគមន៍ជានិច្ចចំពោះវត្តមាន នៃចេញមុខមកបកស្រាយពីសំណាក់ កញ្ញា ពៅ លីដា នៅពេលក្រោយ។
ក្រោយពីជាប់ជុំផ្តាច់ព្រ័ត្រក្នុងការប្រលងកញ្ញាឯកព្រីដស្តុននៅ ប៉ុស្តិ៍លេខ៩ កាលពីឆ្នាំ២០០២ តារាសម្តែងកញ្ញា ពៅ លីដា បានក្លាយជាតារាសិល្បៈភ្លាម។ នាងមានភាពលេចធ្លោគួរសមបន្ទាប់ពីបានដើរតួសម្តែងក្នុងរឿង “ក្លិនផ្កាបីស្រទាប់” នៅប៉ុស្តិ៍បាយ័ន និងរឿង “រលកសំឡេង” នៅទូរទស្សន៍ ស៊ីធីអិ កាលពីពេលកន្លងទៅ៕ ប្រភព lookingtoday
