ទះឃើញ សាកសពស្ត្រី ម្នាក់មានសភាព ហើមស្អុយរលួយ នៅក្នុងព្រៃ
ខេត្តកំពង់ស្ពឺ ៖ មានហេតុការណ៍ផ្អើលឆោឡោមួយបានកើតឡើងកាលពីវេលាម៉ោង៦និង០០នាទី ល្ងាចថ្ងៃទី០៨ ខែសីហា ឆ្នាំ២០១៣ នៅខាងជើងភ្នំពាំងល្វា ស្ថិតក្នុងភូមិពាំងល្វា ឃុំពាំងល្វា ស្រុកឧដុង្គ ខេត្តកំពង់ស្ពឺ ដោយសារតែប្រជាពលរដ្ឋម្នាក់បានប្រទះឃើញសាកសពស្ត្រីម្នាក់ដែលមានសភាពហើមស្អុយរលេះរលួយមើលទៅគួរឲ្យញញើត។
បើតាមប្រភពព័ត៌មានពីសមត្ថកិច្ចមូលដ្ឋានបានឲ្យដឹងថា កាលពីល្ងាចថ្ងៃទី០៨ ខែសីហា ឆ្នាំ២០១៣ មានប្រជាពលរដ្ឋម្នាក់បានរត់មកប្តឹងសមត្ថកិច្ចថាបានប្រទះឃើញសាកសពនារីម្នាក់នៅក្នុងគម្ពោធព្រៃ។ ភ្លាមៗនោះកម្លាំងសមត្ថកិច្ចក៏បានចុះទៅត្រួតពិនិត្យនៅកន្លែងកើតហេតុ ក៏បានប្រទះឃើញសាកសពនារីម្នាក់ដែលមានសភាពហើមរលួយ ដែលពិបាកនឹងកំណត់អត្តសញ្ញាណ ព្រោះសាកសពបានស្លាប់យូរថ្ងៃមកហើយ ទើបសមត្ថកិច្ចជំនាញរង់ចាំឲ្យក្រុមអ្នកធ្វើកោសល្យវិច្ច័យមកធ្វើការត្រួតពិនិត្យ។
រហូតដល់វេលាព្រឹកថ្ងៃទី០៩ ខែសីហា ឆ្នាំ២០១៣ កម្លាំងសមត្ថកិច្ចជំនាញក៏បានចុះទៅធ្វើកោសល្យវិច្ច័យនៅកន្លែងកើតហេតុ។ ដោយជំហានដំបូងសមត្ថកិច្ចបានសន្និដ្ឋានថា សពស្ត្រីខាងលើនេះអាចមានអាយុចាប់ពី២១ឆ្នាំដល់២៣ឆ្នាំ មានកម្ពស់ប្រហែល១.៥០ម៉ែត្រ ។ នៅខ្លួនសាកសពគឺមានស្លៀកខោខូវប៊យពណ៌ខៀវជើងខ្លី អាវយឺតខ្មៅនិងមានពាក់អាវកាក់ខូវប៊យពីក្រៅ។ ចំពោះមូលហេតុនៃការស្លាប់សមត្ថកិច្ចនៅមិនទាន់ហ៊ានអះអាងថាមកពីមូលហេតុអ្វីនោះទេ គឺត្រូវរង់ចាំធ្វើការពិនិត្យជាបន្តទៀត។
សមត្ថកិច្ចក៏បានធ្វើការអំពាវនាវដល់បងប្អូនប្រជាពលរដ្ឋណា ដែលបានបាត់សមាជិកក្នុងគ្រួសារ មានសភាពដូចរៀបរាប់ខាងលើ សូមមេត្តាមកទំនាក់ទំនងមកសមត្ថកិច្ចដើម្បីស្វែងរកអត្តសញ្ញាណជនរងគ្រោះ ដើម្បីឈានទៅដល់ការរកមូលហេតុនៃការស្លាប់របស់ជនរងគ្រោះ៕
ប្រភពពី វត្តភ្នំ
