ប្រទះឃើញ សាកសពបុរស ជាអ្នកនេសាទ ម្នាក់អណ្តែត មកទើជាប់ នឹងកំប្លោក
ខេត្តកំពង់ឆ្នាំង ៖ មានហេតុការណ៍ភ្ញាក់ផ្អើលមួយបានកើតឡើង កាលពីវេលាព្រឹកទី១៣ ខែសីហា ឆ្នាំ២០១៣ នៅក្នុងភូមិក្បាលដំរី ឃុំត្រពាំងចាន់ ស្រុកបរិបូរណ៌ ដោយសារតែប្រជាពលរដ្ឋបានប្រទះឃើញ សាកសពបុរសម្នាក់ ដែលមានសភាពហើមស្អុយរលួយ អណ្តែតជាប់ទើនឹងដើមកំប្លោក។
បើតាមសេចក្តីរាយការណ៍ពីកន្លែងកើតហេតុបានឲ្យដឹងថា សាកសពជនរងគ្រោះមានឈ្មោះ អ៊ួន សី ភេទប្រុស អាយុ២៣ឆ្នាំ មានមុខរបរជាអ្នកនេសាទ មានទីលំនៅក្នុងភូមិតាក្រៀម ឃុំអន្លង់សំណ ស្រុកជាយក្រែង ខេត្តសៀមរាប។ បើតាមការរៀបរាប់ពីក្រុមអ្នកនេសាទដែលជាមិត្តភក្តិរបស់ជនរងគ្រោះបានឲ្យដឹងថា កាលពីថ្ងៃទី៦ ខែសីហា ក្រុមខ្លួនរួមនិងជនរងគ្រោះបានសណ្តោងទូកគ្នាពីខេត្តសៀមរាប ដើម្បីមកនេសាទត្រីនៅក្នុងខេត្តកំពង់ឆ្នាំង គឺក្នុងភូមិសាស្ត្រឃុំត្រពាំងចាន់ ស្រុកបរិបូរណ៌ ។
ខណៈពេលដែលសណ្តោងទូកគ្នានោះ ពួកគាត់មិនដឹងថា ជនរងគ្រោះបានធ្លាក់ទឹកតាំងពីកន្លែងណានោះទេ រហូតទាល់តែទៅដល់គោលដៅដែលត្រូវសម្រាក ស្រាប់តែបាត់ជនរងគ្រោះ ពួកគេក៏នាំគ្នា ជិះទូកនិងកាណូតដើររកក៏នៅតែមិនឃើញ។ លុះដល់វេលាព្រឹកថ្ងៃទី១៣ ខែសីហា ឆ្នាំ២០១៣ ទើបប្រជាពលរដ្ឋប្រទះឃើញ សាកសពជនរងគ្រោះមានសភាពហើមស្អុយរលួយទើជាប់នឹងកំប្លោកតែម្តង។
បន្ទាប់ពីកើតហេតុការណ៍ភ្ញាក់ផ្អើលភ្លាមៗ ក្រុមសមត្ថកិច្ចជំនាញក៏បានចុះធ្វើកោសល្យវិច្ច័យ និងបាន សន្និដ្ឋានថា ជនរងគ្រោះពិតជាស្លាប់ដោយសារតែលង់ទឹក មិនមែនជាករណីឃាតកម្មនោះទេ។ បច្ចុប្បន្នសាកសពជនរងគ្រោះ ត្រូវបានសមត្ថកិច្ចប្រគល់ទៅឲ្យក្រុមគ្រួសារ ដើម្បីយកទៅធ្វើបុណ្យតាមប្រពៃណី នៅឯស្រុកកំណើត៕
ប្រភពពី វត្តភ្នំ
