ស្ត្រីវ័យ៤៤ឆ្នាំម្នាក់ ប្តឹងតុលាការ និងក្រឡាបញ្ជី ខេត្តពោធិ៍សាត់ថា មិនដោះស្រាយ រឿងគេចាប់ ពង្រត់កូនស្រីគាត់
ខេត្តពោធិ៍សាត់៖ ម្តាយរបស់សិស្សស្រីវ័យក្រមុំម្នាក់ចោទប្រកាន់ចៅក្រម និងក្រឡាបញ្ជីខេត្តពោធិ៍សាត់ថា មិនដោះស្រាយរឿងគេដាកថ្នាំកូនស្រីរបស់គាត់ រួចពង្រត់យកទៅខេត្តបន្ទាយមានជ័យអស់១៥ថ្ងៃទើបរកឃើញវិញ ហើយការប្តឹងនេះគឺធ្វើ ឡើង ក្រោយពីរកកូនស្រីគាត់ ឃើញបានប៉ុន្មានថ្ងៃ។
ម្តាយសិស្សស្រីរងគ្រោះឈ្មោះ នូ អូន អាយុ៤៤ឆ្នាំ ចំណែកសិស្សស្រីរងគ្រោះឈ្មោះ នួន ថាច អាយុ២០ឆ្នាំ រីឯជនសង្ស័យឈ្មោះ ទួន ចាន់ឌី អាយុ២៥ឆ្នាំ ទាំង៣នាក់ស្នាក់នៅក្នុងភូមិក្តីឈ្នូល ឃុំត្រពាំងជង ស្រុកបាកាន ខេត្តពោធិ៍សាត់។
ប្រភពព័ត៌មានពីម្តាយស្ត្រីរងគ្រោះបានឲ្យដឹងថា តុលាការ និងក្រឡាបញ្ជីខេត្តពោធិ៍សាត់ដូចជាមិនមានចំណាត់ការ ឬកោះហៅភាគីពាក់ព័ន្ធទៅដោះស្រាយ និងឡើងតុលាការម្តងណាឡើយ ហើយជនសង្ស័យនៅតែមានសេរីភាពដើរលេងក្នុងភូមិឲ្យគាត់ឃើញមុខសឹងរាល់ថ្ងៃ។
ប្រភពដដែលរំលឹកថា កូនស្រីរបស់គាត់បាត់ទៅតាំងពីថ្ងៃទី១៥ ខែកុម្ភៈ ឆ្នាំ២០១៣ មិនឃើញមកផ្ទះក៏នាំគ្នាចេញទៅតាមរក ទើបដឹងដំណឹងឈ្មោះ ទួន ចាន់ឌី ជាបុរសដែលមានប្រពន្ធកូនរស់នៅក្នុងភូមិជាមួយគ្នាចាប់ពង្រត់ទៅខេត្តបន្ទាយមានជ័យ ទើបគាត់ដាក់ពាក្យបណ្តឹងទៅសមត្ថកិច្ចប្រឆាំងការជួញដូរស្ត្រី និងកុមារឲ្យជួយតាមរកបានយកត្រឡប់ទៅផ្ទះវិញនៅថ្ងៃទី៣០ ខែកុម្ភៈ ឆ្នាំ២០១៣ ។
លោក ប៉ុល ចំរើន ប្រធានការិយាប្រឆាំងការជួញដូរមនុស្សបានឲ្យដឹងថា រឿងនេះគឺមានអ្នកនៅពីក្រោយខ្នង ព្រោះមានការក្លែងបន្លំច្រើនដែលមានដូចជា លិខិតស្នាអាពាហ៍ពិពាហ៍ដែលរៀបចំឡើងដោយគ្មាន មេភូមិ ឬចៅសង្កាត់ណាម្នាក់ដឹងឮឡើយ ហើយថ្ងៃអាពាហ៍ពិពាហ៍ក៏ខុសពីថ្ងៃដែលសិស្សស្រីរងគ្រោះបាត់ខ្លួនដែរ លើសពីនេះប្រពន្ធនឹងកូនរបស់ជនសង្ស័យដែលរស់នៅខេត្តកំពង់ធំ ក៏មិនហ៊ានបង្ហាញ ឬឲ្យសមត្ថកិច្ចសាកសួរឡើយ។
លោក ប៉ុល ចំរើនបន្តថា ម្តាយស្ត្រីរងគ្រោះបានដាក់ពាក់បណ្តឹងជាកន្លះឆ្នាំទៅហើយ ប៉ុន្តែមិនឃើញចំណាត់ណាមួយឡើយ ហើយលោកនឹងទ្រាមខ្លួនចូលបំភ្លឺក្នុងករណីនេះ៕
ប្រភពពី ann
