យុវជនគណបក្សសង្គ្រោះជាតិមួយក្រុមនៅខេត្ដកំពង់ចាមទទួលរងការគំរាមសម្លាប់
យោងតាមសេចក្ដីប្រកាសព័ត៌មានចុះថ្ងៃទី៣១ខែកក្កដាឆ្នាំ២០១៣នេះ របស់គណៈកម្មាធិការប្រតិបត្ដិគណបក្សសង្គ្រោះជាតិ ខេត្ដកំពង់ចាម បានឱ្យដឹងថា យុវជនគណបក្សសង្គ្រោះជាតិមួយក្រុមមានគ្នាចំនួន៥នាក់ បានទទួលរងការជេរប្រមាថនិងគំរាមសម្លាប់ពីសំណាក់មន្ដ្រីប៉ូលិស និងមេប៉ូលិសប៉ុស្ដិ៍ឃុំចាន់មូល ស្រុកមេមត់ ខេត្ដកំពង់ចាម ។
សេចក្ដីប្រកាសព័ត៌មាននេះ បានបញ្ជាក់ថា កាលពីវេលាម៉ោង១៩យប់ថ្ងៃទី៣០ខែកក្កដាឆ្នាំ២០១៣ម្សិលមិញ លោក ណឹម វុទ្ធី មន្ដ្រីប៉ូលិសប៉ុស្ដិ៍ និងលោក ណោ ច័ន្ទមុនីរ័ត្ន នាយប៉ុស្ដិ៍នគរបាលរដ្ឋបាលឃុំចាន់មូល បានជេរប្រមាថ និងគំរាមសម្លាប់យុវជនគណបក្សសង្គ្រោះជាតិមួយក្រុមមានគ្នា៥នាក់ ខណៈពេលដែលយុវជនទាំងនោះកំពុងឈរជជែកគ្នាលេងនៅតាមផ្លូវ ឋិតក្នុងភូមិចាន់មូល ឃុំចាន់មូល ស្រុកមេមត់ ខេត្ដកំពង់ចាម ដោយយុវជនគណបក្សសង្គ្រោះជាតិទាំង៥នាក់នោះត្រូវបានមន្ដ្រីប៉ូលិសប៉ុស្ដិ៍ទាំង២នាក់ សម្លុតគំរាមកំហែងបោកគ្រាប់បែកសម្លាប់ចោលទាំងអស់ ហើយថែមទាំងទាញយកទូរស័ព្ទដៃពួកគេចោលទៀតផង ។
នៅក្នុងខ្លឹមសារនៃសេចក្ដីប្រកាសព័ត៌មានរបស់គណបក្សសង្គ្រោះជាតិនេះបានបញ្ជាក់បន្ថែមទៀតថា គណបក្សសង្គ្រោះជាតិ ចាត់ទុកអំពើរបស់មន្ដ្រីប៉ូលិសប៉ុស្ដិ៍នគរបាលរដ្ឋបាលឃុំចាន់មូលទាំង២នាក់ គឺជាការរំលោភបំពានយ៉ាងធ្ងន់ធ្ងរលើសិទ្ធិបុគ្គល ដែលធានាការពារដោយច្បាប់និងរដ្ឋធម្មនុញ្ញនៃព្រះរាជាណាចក្រកម្ពុជា និងជាការគំរាមកំហែងបំភិតបំភ័យក្នុង គោលបំណងបំបាក់ស្មារតីសកម្មជនគណបក្សសង្គ្រោះជាតិ ។ គណបក្សសង្គ្រោះជាតិសូមអំពាវនាវឱ្យអាជ្ញាធរមានសមត្ថកិច្ចចាត់ វិធានការចំពោះបុគ្គលទាំង២នាក់ខាងលើដើម្បីធានាកុំឱ្យមានករណីរំលោភបំពានបែបនេះកើតមានឡើងលើសកម្មជនគណបក្សសង្គ្រោះជាតិតទៅទៀត ។
លោកនាយប៉ុស្ដិ៍នគរបាលរដ្ឋបាលឃុំចាន់មូល និងលោក ណឹម វុទ្ធី ជាមន្ដ្រីប៉ូលិសប៉ុស្ដិ៍ គេហទំព័រសារព័ត៌មានដើមត្នោតមិនទាន់អាចសុំការបំភ្លឺបញ្ជាក់អំពីករណីនេះនៅឡើយទេ ត្រឹមថ្ងៃទី៣១ខែកក្កដាឆ្នាំ២០១៣នេះ ។
សូមបញ្ជាក់ជូនថា ក្នុងការបោះឆ្នោតជ្រើសតាំងតំណាងរាស្ដ្រនីតិកាលទី៥នៅថ្ងៃទី២៨ខែកក្កដាឆ្នាំ២០១៣កន្លងទៅនេះនៅមណ្ឌលខេត្ដកំពង់ចាមគណបក្សសង្គ្រោះជាតិទទួលបានសំឡេងឆ្នោតគាំទ្រចំនួន៤៥៦.៣៩៥សំឡេង និងគណបក្សប្រជាជនកម្ពុជាទទួលបានសំឡេងឆ្នោតគាំទ្រចំនួន៣៧៤.៥៥៩សំឡេង ពោលគឺគណបក្សសង្គ្រោះជាតិដែលជាគណ បក្សនយោបាយប្រឆាំងដ៏ធំនៅកម្ពុជា ទទួលបានសំឡេងឆ្នោតគាំទ្រច្រើនជាងគណបក្សប្រជាជនកម្ពុជាដែលជាគណបក្សនយោបាយកាន់កាប់អំណាចដុះស្លែនៅកម្ពុជា ៕
ប្រភពពី ដើមត្នោត
