យកដៃទៅស្ទាបប្រដាប់ភេទក្មេងស្រីប្រុងរំលោភ ត្រូវសមត្ថកិច្ចចាប់ក្របួចចាប់
ខេត្តកំពត ៖ យុវជនម្នាក់ត្រូវបានកម្លាំងសមត្ថកិច្ចស្រុកឈូក ធ្វើការចាប់ឃាត់ខ្លួនកាលពីល្ងាចថ្ងៃទី៣០ ខែកក្កដា ឆ្នាំ២០១៣ បន្ទាប់ពីទទួលបានពាក្យបណ្តឹងពីក្រុមគ្រួសារជនរងគ្រោះ ដែលបានប្តឹងចោទប្រកាន់ យុវជនខាងលើ ពីបទប៉ុនប៉ងរំលោភសេពសន្ថវៈ លើក្មេងស្រីជាអនីតិជន ដែលបានប្រព្រឹត្តទៅកាលពីថ្ងៃទី២៧ ខែកក្កដា ឆ្នាំ២០១៣កន្លងទៅនេះ។
បើតាមប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យដែលត្រូវបានចាប់ឃាត់ខ្លួនខាងលើនេះមានឈ្មោះ សោម ហន អាយុ២០ឆ្នាំ រស់នៅក្នុងឃុំតាកែន ស្រុកឈូក។ ចំណែកក្មេងស្រីរងគ្រោះ អាយុ១៣ឆ្នាំ ពួកគេទាំង២នាក់គឺជាអ្នកជិតខាងហ្នឹងគ្នា។
ប្រភពដដែលបានបន្តទៀតថា កាលពីវេលាម៉ោងប្រហែលជា១០យប់ថ្ងៃទី២៧ ខែកក្កដា ឆ្នាំ២០១៣ ជនសង្ស័យខាងលើនេះបានគោះទ្វារផ្ទះក្មេងស្រីរងគ្រោះ ដោយសុំយកទូរស័ព្ទទៅបញ្ចូលភ្លើង ព្រោះទូរស័ព្ទគេអស់ថ្ម ។ ខណៈនោះដោយក្មេងស្រីនឹកឃើញថា ជាអ្នកជិតខាងក៏យល់ព្រមបើកទ្វារឲ្យចូល ស្រាប់តែពេលនោះជនសង្ស័យបានឃើញក្មេងស្រីកំពុងដេកលក់ ស្របពេលដែលម្តាយឪពុកមិននៅផ្ទះ ជនកំហូចរូបនោះក៏បានលបទៅស្រាតខោក្មេងស្រីរងគ្រោះ ហើយបានយកដៃទៅស្ទាបអង្អែលបៀតបៀនកេរ្តិ៍ភេទក្មេងស្រី តែមិនបានប៉ុន្មាននាទីផង ក្មេងស្រីបានភ្ញាក់ដឹងខ្លួនក្រោកឡើងស្រែកឱ្យអ្នកភូមិជួយ ទើបមានការភ្ញាក់ផ្អើល ធ្វើឲ្យជនសង្ស័យភ័យរត់គេចខ្លួនបាត់ស្រមោល ។
ក្រោយពេលបង្កហេតុជនសង្ស័យបានរត់គេចខ្លួនបាត់ស្រមោល រហូតដល់ថ្ងៃទី៣០ ខែកក្កដា ឆ្នាំ២០១៣ ទើបត្រូវបានសមត្ថកិច្ចចាប់ខ្លួនបញ្ជូនទៅស្នងការខេត្ត ដើម្បីធ្វើការសាកសួរនិងកសាងសំណុំរឿងបញ្ជូនទៅកាន់តុលាការចាត់ការទៅតាមនីតិវិធីច្បាប់៕
ប្រភពពី វត្តភ្នំ
