បើកឡានក្រឡាប់ ធ្លាក់ផ្លូវបណ្តាល ឲ្យលោកមេឃុំ និងមេភូមិ ស្លាប់បាត់បង់ជីវិត
ខេត្តព្រះសីហនុ ៖ មានហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់មួយបានកើតឡើងកាលពីវេលាម៉ោង១១ និង៣០នាទីយប់ថ្ងៃទី១៣ សីហា ២០១៣ ស្ថិតនៅចំណុចអូរកំបុត ក្នុងភូមិអូរតាសេក ឃុំអូរឧកញ៉ាហេង ស្រុកព្រៃនប់ ដោយសារតែមានរថយន្តម៉ាកកាមរី មួយគ្រឿងបានបើកក្រឡាប់ធ្លាក់អូរបណ្តាលឲ្យបុរស២នាក់ ដែលជាមេឃុំ និងមេភូមិបានស្លាប់បាត់បង់ជីវិតភ្លាមៗ នៅកន្លែងកើតហេតុ។
បើតាមប្រភពព័ត៌មានពីកន្លែងកើតហេតុបានឲ្យដឹងថា ជនរងគ្រោះទាំងពីរនាក់មានឈ្មោះ គា វូ អាយុ ៤៧ឆ្នាំ ជាមេឃុំអូរឧកញ៉ាហេង មានទៅលំនៅក្នុងភូមិអូរតាប៉ាង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ និងម្នាក់ទៀតមានឈ្មោះលោក អ៊ំ ខ្នា អាយុ ៥០ឆ្នាំ ជាមេភូមិរស់នៅក្នុងភូមិអូរឧកញ៉ាហេង ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុ។
បើតាមប្រភពព័ត៌មានពីសាក្សីនៅកន្លែងកើតហេតុបានឲ្យដឹងថា មុនពេលកើតហេតុជនរងគ្រោះទាំង២នាក់ បានទៅហូបអាហារនៅហាងទឹកសាប បន្ទាប់មកក៏ទៅស្ទូចត្រីបន្ត រួចបានធ្វើដំណើរត្រឡប់មកវិញ ដោយជិះក្នុងរថយន្តម៉ាកកាមរីហើម ពាក់ស្លាកលេខភ្នំពេញ 2A 5030 មួយគ្រឿង ធ្វើដំណើរក្នុងទិសដៅពីត្បូងទៅជើង។ លុះពេលបើកមកដល់ចំណុចកើតហេតុ ស្រាប់តែរថយន្តបានរេចង្កូតធ្លាក់ចូលទៅអូរនៅចិញ្ចើមផ្លូវក្រឡាប់ជាច្រើន បណ្តាលឲ្យបុរសទាំង២នាក់ដែលជិះក្នុងរថយន្តស្លាប់បាត់បង់ជីវិតភ្លាមៗនៅកន្លែងកើតហេតុ។
បន្ទាប់ពីកើតហេតុ សមត្ថកិច្ចក៏បានចុះទៅអន្តរាគមន៍ដល់កន្លែងកើតហេតុ និងបានទំនាក់ទំនងក្រុមគ្រួសារជនរងគ្រោះ មកទទួលយកសាកសពទៅធ្វើបុណ្យតាមប្រពៃណី៕
ប្រភពពី វត្តភ្នំ
