ប្តីប្រពន្ធ១គូ ដឹកដៃគ្នាឆ្លង ផ្លូវត្រូវរថយន្ត ធុនធំបុកនិង កិនធ្លាយពោះវៀន
រាជធានីភ្នំពេញ ៖ មានហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់មួយបានកើតឡើងកាលពីវេលាម៉ោង ១១ និង ២៥នាទីយប់ថ្ងៃទី១៤ ខែសីហា ឆ្នាំ២០១៣ ចំណុចផ្លូវភ្នំពេញ-ហាណូយ ស្ថិតក្នុងសង្កាត់ភ្នំពេញថ្មី ខណ្ឌសែនសុខ ទល់មុខសាលាបឋមសិក្សាភ្នំពេញថ្មី ដែលបង្កឡើងដោយរថយន្តធុនធំប្រភេទកុងតឺន័រដឹកដែក ១គ្រឿង បានបើកបុកនិងកិនប្តីប្រពន្ធ២នាក់ បណ្តាលឲ្យប្រពន្ធបានស្លាប់បាត់បង់ជីវិតភ្លាមៗនៅកន្លែងកើតហេតុ និងបុរសជាប្តីរងរបួសធ្ងន់ធ្ងរ ។
បើតាមប្រភពព័ត៌មានពីសមត្ថកិច្ចដែលបានចុះទៅអន្តរាគមន៍នៅកន្លែងកើតហេតុបានឲ្យដឹងថា បុរសជាប្តីដែលរងរបួសធ្ងន់នោះមានឈ្មោះ តែម ផុង ភេទប្រុស អាយុ៣២ឆ្នាំ មានស្រុកកំណើតនៅភូមិក្បាលកោះ ឃុំឈើខ្មៅ ស្រុកកោះធំ ខេត្តកណ្តាល ចំណែកស្ត្រីជាប្រពន្ធនៅមិនទាន់ស្គាល់អត្តសញ្ញាណនោះទេ ព្រោះពុំមានអត្តសញ្ញាណប័ណ្ណនៅជាប់នឹងខ្លួន។
ប្រភពដដែលបានបន្តឲ្យដឹងទៀតថា មុនពេលកើតហេតុជនរងគ្រោះទាំង២នាក់បានដឹកដៃគ្នាដើរឆ្លងថ្នល់ បម្រុងទៅផ្លូវម្ខាងទៀត ខណៈពេលដែលដើរមិនទាន់ផុតផ្លូវផង ស្រាប់តែមានរថយន្តធុនធំដឹកដែក១គ្រឿង បានបើកបរតាមបណ្តោយផ្លូវភ្នំពេញ-ហានណូយ ក្នុងទិសដៅពីជើងទៅត្បូង ក្នុងល្បឿនយ៉ាងលឿន បានជ្រុលមកបុកជនរងគ្រោះទាំង២នាក់ពេញទំហឹង បណ្តាលឲ្យកង់រថយន្តផ្នែកខាងមុខកិនស្ត្រីជាប្រពន្ធធ្លាយពោះវៀន ចេញមកក្រៅស្លាប់យ៉ាងអាណោចអាធ័ម និងកង់ខាងក្រោយកិនចំពាក់កណ្តាលខ្លួន បុរសជាប្តីធ្វើឲ្យបែកប្លោកនោមរងរបួសធ្ងន់ធ្ងរ។
បន្ទាប់ពីកើតហេតុ រថយន្តបង្កមិនបានឈប់ដើម្បីធ្វើការទទួលខុសត្រូវនោះទេ បែរជាបន្ថែមល្បឿនបើករត់គេចខ្លួនរហូតដល់ចំណុចផ្សារមាន់អាំង ស្ថិតក្នុងសង្កាត់បឹងកក់ទី២ ខណ្ឌទួលគោក ទើបត្រូវនគរបាលមូលដ្ឋានដេញព័ទ្ធចាប់បាន។
បន្ទាប់ពីធ្វើការឃាត់ខ្លួន សមត្ថកិច្ចបាននាំយកអ្នកបើកបររួមទាំងរថយន្តទៅកាន់ស្នងការដ្ឋានចរាចរណ៍រាជធានីភ្នំពេញ ដើម្បីធ្វើការសាកសួរនិងកសាងសំណុំរឿងចាត់ការទៅតាមនីតិវិធីច្បាប់។ ចំណែកជនរងគ្រោះត្រូវបានរថយន្តសង្គ្រោះបន្ទាន់ដឹកយកទៅធ្វើការព្យាបាលនៅមន្ទីរពេទ្យ រីឯសាកសពត្រូវបានក្រុមគ្រួសារដឹកយកទៅធ្វើបុណ្យតាមប្រពៃណីនៅគេហដ្ឋាន៕
ប្រភពពី វត្តភ្នំ
