សមត្ថកិច្ចចាប់ ខ្លួនជនល្មើស២នាក់ ដែលនាំគ្នារំលោភនារី ម្នាក់យ៉ាងសាហាវព្រៃផ្សៃ
ខេត្តកំពត ៖ កម្លាំងសមត្ថកិច្ចស្រុកជុំគិរី បានធ្វើការចាប់ខ្លួនជនសង្ស័យ២នាក់ កាលពីរសៀលថ្ងៃទី៧ ខែសីហា ឆ្នាំ២០១៣ បន្ទាប់ពីជនសង្ស័យទាំង២នាក់ខាងលើនេះ បានធ្វើសកម្មភាពចាប់រំលោភស្ត្រីម្នាក់ កាលពីវេលាម៉ោង៨ និង៣០នាទីយប់ ថ្ងៃទី២៦ ខែកក្កដា ឆ្នាំ២០១៣ កន្លងទៅនេះ នៅចំណុចភូមិតាភុល ឃុំស្នាយអញ្ចឹក ស្រុកជុំគិរី។
ប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យដែលត្រូវបានចាប់ខ្លួនទាំង២នាក់នេះ មានឈ្មោះ អ៊ួង ហន អាយុ២៥ឆ្នាំ និងម្នាក់ទៀតឈ្មោះ មៀន រតនា អាយុ២៤ឆ្នាំ ពួកគេទាំង២នាក់ រស់នៅចំណុចភូមិ ឃុំ កើតហេតុខាងលើ។ ចំណែកនារីរងគ្រោះ មានអាយុ១៨ឆ្នាំ រស់នៅក្នុងភូមិ ជាមួយជនសង្ស័យទាំង២នាក់។
ប្រភពដដែលបានបន្តទៀតថា នៅយប់ថ្ងៃកើតហេតុ ខណៈដែលនារីរងគ្រោះ បានចុះមកក្រោមផ្ទះបម្រុងនឹងងូតទឹក ស្រាប់តែមានជនសង្ស័យ២នាក់ បានមកចាប់ច្របាច់.ក និងខ្ទប់មាត់នាងមិនឱ្យស្រែក ហើយពួកគេទាំង២នាក់បានចាប់នាងសែងយកទៅគម្ពោធព្រៃ ហើយធ្វើសកម្មភាពរំលោភយ៉ាងសាហាវព្រៃផ្សៃរហូតបានសម្រេចម្តងម្នាក់ៗ ។ បន្ទាប់ពីរំលោភរួចហើយ ក្រុមជនល្មើសក៏បានដោះយកគ្រឿងអលង្ការរបស់នាង រួមមាន ខ្សែ.កប្លាទីនទម្ងន់៣ជី និងចិញ្ចៀនប្លាទីន១វង់ ទម្ងន់១ជី រត់គេចខ្លួនបាត់ស្រមោល។
បន្ទាប់ពីកើតហេតុ ជនរងគ្រោះបានមកដាក់ពាក្យបណ្តឹងសុំឲ្យសមត្ថកិច្ចជួយអន្តរាគមន៍។ រហូតដល់រសៀលថ្ងៃទី០៧ ខែសីហា ឆ្នាំ២០១៣ ទើបកម្លាំងសមត្ថកិច្ចបានចាប់ឃាត់ខ្លួនជនល្មើសទាំង២នាក់ ដើម្បីយកមកធ្វើការសាកសួរ និងកសាងសំណុំរឿងចាត់ការទៅតាមនីតិវិធីច្បាប់៕\
ប្រភពពី វត្តភ្នំ
