ព្រះសីហនុ៖ នៅវេលាម៉ោង ២០ និង២០នាទី ថ្ងៃទី០៧ ខែសីហា ឆ្នាំ២០១៣នេះ កម្លាំងនគរបាល ការិយាល័យ ប្រឆាំងការជួញដូរមនុស្ស និងការពារអនិតិជន នៃស្នងការដ្ឋាននគរបាល ខេត្តព្រះសីហនុ ដែលដឹកនាំ ដោយលោក វរសេនីយ៍ទោ អ៊ី សុខា នាយការិយាល័យ នគរបាលប្រឆាំង ការជួញដូរមនុស្ស និងការពារអនិតិជន ក្រោមការដឹកនាំ បញ្ជាផ្ទាល់ពីលោក វរសេនីយ៍ឯក ជរ ហេង ស្នងការរង និងជាប្រធានការិយាល័យ កណ្តាល ប្រឆាំង បទល្មើស និងតំណាងអយ្យការ អមសាលាដំបូងខេត្តព្រះសីហនុ មានលោក ប៊ូ ប៊ុនហាង ព្រះរាជអាជ្ញា អមសាលាដំបូងខេត្ត លោក យូ ទិត្យវឌ្ឍនៈ ព្រះរាជអាជ្ញាររង អមសាលាដំបូងខេត្ត សហការជាមួយតំណាងអង្គការ បេសកកម្មយុត្តិធម៌អន្តរជាតិ (IJM) បានចុះបង្រ្កាបទីតាំងម៉ាស្សាកោសជប់ បង្កប់សេវាផ្លូវភេទ នៅហាងម៉ាស្សាកោសជប់ ៩០៣ ដែលមានទីតាំងស្ថិតនៅក្បែរទល់មុខនឹងប៉ុស្តិ៍ នគរបាលរដ្ឋបាលសង្កាត់លេខ២ ក្នុងក្រុមទី១៤ ភូមិ២ សង្កាត់លេខ២ ក្រុងខេត្តព្រះសីហនុ ។

ប្រភពពីសមត្ថកិច្ចបានប្រាប់ឱ្យដឹងថា ក្នុងប្រតិបត្តិការបង្រ្កាបនេះ បានធ្វើការឃាត់ខ្លួនថៅកែឈ្មោះ ហ្វៀង ធីវៀន ភេទស្រី អាយុប្រហែល៤០ឆ្នាំ អ្នកដាំស្លរម្នាក់ និងនារីម៉ាស្សា៤នាក់ ចំណែកវត្ថុតាងរឹបអូសបានមានវីស៊ីឌី ១៨បន្ទះ ស្រោមអនាម័យមិនទាន់ប្រើ ៣ ប្រើរួចមួយចំនួនធំ បញ្ជីកត់ត្រា៥ក្បាល ឯកសាភាសាវៀតណាម៣សន្លឹក។ សមត្ថកិច្ចបានបន្តថា ថៅកែរូបនេះកំពុងស្ថិតនៅក្រោមការសាកសួរពីក្រុមការងារនៅស្នងការដ្ឋាននគរបាលខេត្តព្រះសីហនុ ដើម្បីចាត់ការតាមផ្លូវច្បាប់៕

ប្រភព : ដើមអំពិល