អផ្សុកដុត ផ្ទះបងស្រី ឆេះខ្ទេចពេល នគរបាលនាំខ្លួន មកសួរឆ្លើយ ថាសង្គ្រាមលោក លើកទី៣ ជិតដល់ហើយ
ភ្នំពេញ ៖ បុរសម្នាក់ដែលមានសតិមិនគ្រប់គ្រាន់បានយកដែកកេះដុតសម្ភារ នៅក្នុងផ្ទះរបស់បងស្រីបណ្ដាលឱ្យឆេះ ទាំងអស់ សូម្បីតែសម្លៀកបំពាក់មួយ កំផ្លេក៏មិនអាចយកចេញបានដែរ ព្រោះបងស្រី ប្អូន និងកូនប្រសាមិនបាននៅ នៅតែប្អូនប្រុសបង្កើតដែលមានជំងឺ សរសៃប្រសាទ ។
នៅពេលដែលអគ្គិភ័យ បានកើតឡើងឆាបឆេះផ្ទះខាងលើនេះ ជនបង្កដែលជាប្អូនប្រុសបានឈរញញឹម និងសើចមើលភ្លើងឆេះផ្ទះរបស់បង ហើយពេលសមត្ថកិច្ចចុះទៅជួយអន្ដរាគមន៍បាញ់ទឹកពន្លត់ ព្រមទាំងជននេះ យកមកសួរនាំ បែរជាគេឆ្លើយថាអផ្សុក ដុតលេង ព្រោះសង្គ្រាមលោកលើកទី៣ ជិតដល់ហើយ ដែលធ្វើឱ្យសមត្ថកិច្ចសួរ នាំហួសចិត្ដនិយាយមិនចេញ ក៏យករំពាត់ វាយ២-៣រំពាត់ ក៏ត្រូវជននេះឆ្លើយថា ឈឺណាស់ ។ ភ្លាមៗនោះសមត្ថកិច្ចក៏ធ្វើ ការសួរនាំបន្ដទៀតអំពីឈ្មោះអំពីជនដែល ដុតផ្ទះបងស្រីរបស់ខ្លួនថា អ្នកឯងឈ្មោះ អី ស្រាប់តែបុរសរូបនេះឆ្លើយតបទៅ វិញថា ម៉ាត់ហ៊ីធ្លែរ និងបញ្ជាក់ថា ហ៊ីធ្លែរ ធ្វើឱ្យសមត្ថកិច្ចដែលសួរជាលើកទី២ ហួសចិត្ដម្ដងទៀតក៏ដើរចេញពីក្នុងបន្ទប់ មកខាងក្រៅគ្រវីក្បាលដូចគោច្រាំងទិច។ ហេតុការណ៍អគ្គិភ័យដែលកើតឡើង ដោយសារតែប្អូនប្រុសបង្កើតមានជំងឺ សរសៃប្រសាទរួចដុតឱ្យឆេះនេះបានកើត ឡើងកាលពីវេលាម៉ោង១០និង៤០នាទី ព្រឹកថ្ងៃទី៨ ខែសីហា ឆ្នាំ២០១៣ ស្ថិតនៅ ចំណុចក្រុម៥ ភូមិ២ សង្កាត់ជ្រោយចង្វា ខណ្ឌឫស្សីកែវ ។
ម្ចាស់ផ្ទះដែលត្រូវជាបងស្រីបង្កើត ត្រូវបានគេស្គាល់ឈ្មោះយស ខេមភូរី អាយុ៤៩ឆ្នាំ មានមុខរបរជាអ្នកលក់ផ្លែ ឈើ និងមានទីលំនៅផ្ទះកើតហេតុខាងលើ ។ ចំណែកប្អូនប្រុសដែលមានជំងឺ សរសៃប្រសាទឈ្មោះយស ស័ក្ដិខាន់ណារ៉ា អាយុ៤០ឆ្នាំ រស់នៅក្នុងបន្ទុករបស់បង ស្រី។
ផ្ទះដែលត្រូវប្អូនប្រុសបង្កើតដុតឱ្យ ឆេះខ្ទេចខាងលើនេះមានទំហំ៥គុណនឹង ១៤ម៉ែត្រ ថ្មក្រោមលើឈើប្រក់ស័ង្កសី ពណ៌ខៀវ ហើយពេលបងប្អូនមកដល់ គ្មានអ្វីក្រៅពីទឹកភ្នែក និងអស់សង្ឃឹម ដោយសារតែផ្ទះដែលធ្លាប់តែរស់នៅ និងខិតខំសន្សំប្រាក់ធ្វើទម្រាំតែបានស្នាក់ នៅ បែរជាត្រូវឆេះអស់មួយប៉ប្រិចភ្នែក ដោយសារតែប្អូនប្រុសបង្កើតជាអ្នកដុត។
បើតាមសម្ដីបុរសឈ្មោះចក់ សុផល អាយុ៤៨ឆ្នាំ ដែលអតីតជាបងថ្លៃរបស់ ជនដែលដុតផ្ទះនោះបាននិយាយឱ្យដឹងថា មុនដុតផ្ទះ១ថ្ងៃ យស ស័ក្ដិខាន់ណារ៉ា ដែលជាប្អូនថ្លៃបានវាយមកលើរូបគាត់ ដោយចោទថា រូបគាត់សម្លាប់ឪពុក ហើយនិងឈ្លោះទាស់ទែងគ្នានៅក្នុងផ្ទះ នោះជាញឹកញាប់ តែគាត់មិនដែលខឹង នោះឡើយ ព្រោះដឹងថា អតីតប្អូនថ្លៃមាន ជំងឺប្រចាំកាយ ។ លោកសុផល បានឱ្យ ដឹងទៀតថា ជំងឺរបស់អតីតប្អូនថ្លៃនេះ តាំងពីឆ្នាំ១៩៩៣ ហើយក្រុមគ្រួសារ និងបងប្អូនបានព្យាយាមយកទៅពេទ្យនិង មើលរហូត តែមិនដឹងថ្ងៃកើតហេតុនោះ យ៉ាងដូចម្ដេចទេស្រាប់តែគេយកដែក កេះដុតសម្ភារក្នុងផ្ទះបណ្ដាលឱ្យឆេះផ្ទះ ទាំងអស់តែម្ដង ។
បើតាមសម្ដីបុរសឈ្មោះថាន់ ថេ អាយុ៣២ឆ្នាំ ដែលអះអាងថារូបគេជា កូនប្រសារបស់ម្ចាស់ផ្ទះបានបញ្ជាក់ឱ្យ ដឹងថា មុនពេលកើតហេតុគឺគ្មាននរណា ម្នាក់នៅផ្ទះក្រៅពី យស ស័ក្ដិខាន់ណារ៉ា ទេ ហើយម្នាក់ៗចេញទៅខាងក្រៅដើម្បី ប្រកបមុខរបររកស៊ីរៀងៗខ្លួន ស្រាប់តែ វេលាម៉ោងប្រហែលជា១០ ក៏មានគេ ទូរស័ព្ទថា ផ្ទះដែលស្នាក់នៅត្រូវបានភ្លើង ឆាបឆេះហើយ ក៏នាំគ្នារត់មកទាំងព្រលឹង ចុងសក់មកដល់ ឃើញផ្សែងនិងអណ្ដាត ភ្លើងហុយឡើងលើ ហើយចូលទៅខាង ក្នុងផ្ទះគ្មានយកអ្វីបានបន្ដិចណាឡើយ ។
ថាន់ ថេ បានបន្ដទៀតថា ជំងឺរបស់ពូ ថ្លៃខ្លួនទើបរើតែរយៈពេល១ខែនេះប៉ុណ្ណោះ ហើយគ្មាននរណាម្នាក់ដែលនៅក្នុងផ្ទះ នោះបានសុខឡើយ ដោយសារតែការរក រឿងរបស់ឈ្មោះណារ៉ា នេះតែម្ដង ។ ទី បញ្ចប់ខណៈដែលគ្មានមនុស្សនៅផ្ទះ ពូថ្លៃ ដែលមានជំងឺប្រចាំកាយបានដុតផ្ទះចោល តែម្ដង ៕
.jpg)
ប្រភពពីនគរវត្ត
