ភ្នំពេញៈ យុវជនម្នាក់ ត្រូវបានគេប្រទះឃើញ ដេកបែកពពុះមាត់ ម្នាក់ឯងតាម ចិញ្ចើមផ្លូវដោយ គ្មានមូលហេតុប្រជាពលរដ្ឋ សង្ស័យថា គេដាក់ថ្នាំសណ្តំយកម៉ូតូ ។ ហេតុការណ៍នេះ បានកើតឡើងកាល ពីវេលាម៉ោង៧និង ៣០នាទីយប់ថ្ងៃទី១ ខែសីហា ឆ្នាំ២០១៣ ស្ថិតនៅតាម បណ្តោយផ្លូវ សហព័ន្ធរុស្ស៊ី ខាងកើតរង្វង់មូលចោមចៅ ភូមិថ្នល់បំបែក សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

សាក្សីកន្លែងកើតហេតុបានឲ្យដឹងថា ជនរងគ្រោះមានឈ្មោះ ទេស សុខទី ភេទប្រុស អាយុ២៧ឆ្នាំ រស់នៅភូមិព្រែកអញ្ចាញ ឃុំព្រែកអញ្ចាញ ស្រុកខ្សាច់កណ្តាល ខេត្តកណ្តាល ។

សាក្សីកន្លែងកើតហេតុបាន បន្តថា មុនពេលកើតហេតុ គេឃើញមានម៉ូតូមួយគ្រឿង ជិះចូលមកកន្លែង កើតហេតុ ដោយទៅនោះមានស្ថានភាពងងិត បន្តិចក្រោយមកស្រាប់តែ មានអ្នកដំណើរធ្វើ ដំណើរឆ្លង កាត់ក៏ប្រទះឃើញជនសង្ស័យ ដេកម្នាក់ឯង រួចហើយក៏ទៅរាយការណ៍ ប្រាប់នគរបាលនៅក្បែរទីនោះ ឲ្យទីពិនិត្យមើល ភ្លាមៗនគរបាល ក៏ទៅពិនិត្យមើលឃើញថា ជនរងគ្រោះដេកបែកពពុះមាត់កខ្លាក់ក៏ បានហៅរថយន្ត សង្គ្រោះរបស់អង្គភាព៧១១ កងពលតូចលេខ៧០ ឲ្យមកដឹកយកទៅសង្គ្រោះជាបន្ទាន់ ។

ប្រជាពលរដ្ឋ នៅកន្លែងកើតហេតុបានឲ្យដឹងថា ជនរងគ្រោះទំនងជាគេដាក់ថ្នាំសណ្តំ យកម៉ូតូពីណានោះទេ រួចដឹកយកមក ទម្លាក់ចោលទីនេះ ក៏នាំគ្នាគេចខ្លួនបាត់អស់ទៅ។ ប៉ុន្តែទោះបីជាយ៉ាងណាគ្មាន ប្រភពមួយណាបញ្ជាក់ឲ្យបានច្បាស់លាស់អំពីមូលហេតុដែលជនរងគ្រោះដេកបែកពពុះមាត់ម្នាក់ឯង នោះទេ ។ បច្ចុប្បន្នជនរងគ្រោះកំពុងត្រូវបានសម្រាកព្យាបាលនៅមន្ទីរពេទ្យលោកសង្ឃ ៕

ផ្តល់សិទ្ធដោយ ដើមអម្ពិល