រទេះក្របីដឹក ឈើពីក្នុងព្រៃ កិនមីនតោន កប់ដី1គ្រាប់ ផ្ទុះកក្រើក បាត់បង់ជីវិត3នាក់
ខេត្តឧត្តរមានជ័យ ៖ កាលពីវេលាម៉ោង១ និង៤០នាទីរសៀល ថ្ងៃទី៣០ កក្កដាកន្លងទៅ នៅចំណុចផ្លូវរទេះចាស់ ក្នុងភូមិអភិវឌ្ឍន៍ ឃុំអូរស្វាយ ស្រុកត្រពាំងប្រាសាទ មីនតោនមួយគ្រាប់ដែលគេដឹងថាជាគ្រាប់សេសសល់ពីសម័យសង្គ្រាម បានផ្ទុះឡើងបណ្តាលឱ្យមនុស្សប្រុសស្រី ចាស់ក្មេងយ៉ាងហោចណាស់៣នាក់បានស្លាប់នៅកន្លែងកើតហេតុ ។ ប្រភពព័ត៌មានពីស្ត្រីម្នាក់ឈ្មោះ ជ្រិន ស្រីកា អាយុ៣៤ឆ្នាំ ត្រូវជាប្រពន្ធជនរងគ្រោះនិយាយថា មុនពេលកើតហេតុ រូបគាត់ និងប្តីព្រមទាំងកូន និងក្មួយ បាននាំគ្នាបររទេះក្របីចូលទៅក្នុងព្រៃ ដើម្បីទៅដឹកឈើយកមកទុកសម្រាប់សាងសង់ផ្ទះ ។ លុះពេលទៅដល់ក្នុងព្រៃក៏នាំគ្នាលើកឈើដាក់លើរទេះពេញ ហើយបររទេះចេញពីព្រៃវិញ ដោយប្តីជាអ្នកបរ ហើយកូន និងក្មួយម្នាក់ក៏ជិះនៅលើរទេះនោះ ចំណែកខ្លួនគាត់ជាប្រពន្ធដើរតាមពីក្រោយរទេះចម្ងាយ៣០ ទៅ៤០ម៉ែត្រ ។
ពេលបររទេះមិនទាន់ចេញផុតពីព្រៃផង ស្រាប់តែកង់រទេះបានកិនមីនតោនផ្ទុះលាន់ឮកក្រើក បណ្តាលឱ្យប្តី និងកូនព្រមទាំងក្មួយ ស្លាប់នៅនឹងកន្លែង ចំណែករទេះក៏ត្រូវខូចខ្ទេច ហើយក្របីបានផ្អើលបោលទាំងនឹមចេញពីកន្លែងផ្ទុះ រហូតដល់រសៀលថ្ងៃទី៣១ កក្កដា ទើបរកឃើញ ។ ស្ត្រីជាប្រពន្ធនិយាយថា ប្តីគាត់ដែលស្លាប់នេះឈ្មោះ ឯល ប៉ុល អាយុ៤៥ឆ្នាំ កូនស្រីបង្កើតឈ្មោះ តេង ស្រីមី អាយុ១២ឆ្នាំ ចំណែកក្មួយប្រុសឈ្មោះ ប៉េង ផ្លយ អាយុ១៣ឆ្នាំ ។ បន្ទាប់ពីកើតហេតុរួច ក៏មានសមត្ថកិច្ចចុះទៅដល់ត្រួតពិនិត្យកន្លែងផ្ទុះ រួចប្រគល់សពឱ្យក្រុមគ្រួសារយកទៅធ្វើបុណ្យតាមប្រពៃណី ៕
