ពាក្យចចាមអារ៉ាម «ក្រុមហ៊ុន Qualcomm ធ្វើការលើ Smartwatch»
Smartwatch ឬហៅថា នាឡិកាទំនើបគឺជាឧបករណ៍បច្ចេកវិទ្យាថ្មីដែលត្រូវបានគេរំពឹងថា នឹងក្លាយជាឧបករណ៍ដែលមានប្រជាប្រិយភាពនៅក្នុងរយៈពេលពីរបីឆ្នាំខាងមុខ ។ ដោយឡែកចំពោះក្រុមហ៊ុនដែលបានចូលរួមធ្វើការផលិតនូវឧបករណ៍ថ្មី Smartwatch ក៏កាន់តែមានចំនួនច្រើនឡើងៗផងដែរ ដែលបច្ចុប្បន្នយើងដឹងថា ក្នុងចំណោមក្រុមហ៊ុនផលិតគ្រឿងអេឡិចត្រូនិកធំៗ ដូចជា Apple និង Samsung គឺសុទ្ធតែត្រូវបានគេរាយការណ៍ថា កំពុងធ្វើការទៅលើគម្រោងផលិតឧបករណ៍ថ្មីនេះ ហើយឥលូវសូម្បីតែក្រុមហ៊ុន Qualcomm ដែលជាអ្នកផលិតបន្ទះ chip ដ៏ធំក៏អាចនឹងធ្វើការផលិតនូវ Smartwatch ផងដែរ ។
SmartWatch 2 :
ថ្មីៗនេះក្រុមហ៊ុន Sony ទើបតែបានប្រកាសចេញ SmartWatch 2 ដែលជា Smartwatch ថ្មីមានរូបរាងគួរឲ្យទាក់ទាញ ប៉ុន្តែសម្រាប់លក្ខណៈនៃឧបករណ៍នេះនឹងអាចខុសពីផលិតផលរបស់ក្រុមហ៊ុនផ្សេងៗដូចជា Apple និង Samsung យ៉ាងណានោះយើងក៏មិនអាចដឹងដែរ ដោយហេតុថា Smartwatch របស់ក្រុមហ៊ុនទាំងពីរនេះមិនទាន់ត្រូវបានប្រកាសចេញជាផ្លូវការនៅឡើយ ។ ដោយឡែកក្រុមហ៊ុន Qualcomm ដែលយើងតែងស្គាល់ថា ជាក្រុមហ៊ុនផលិតបន្ទះ chip ដ៏ធំមួយ ពេលនេះត្រូវបានគេរាយការណ៍ថា ក៏អាចនឹងកំពុងធ្វើការទៅលើគម្រោងផលិត Smartwatch ផងដែរ ។
បើយោងទៅតាមប្រភព Geeeky-gadge បានឲ្យដឹងថា ប៉ាតង់នៃឧបករណ៍ Smartwatch របស់ក្រុមហ៊ុន Qualcomm គឺមានឈ្មោះនិមិត្តសញ្ញាថា Qualcomm TOQ ដែលត្រូវបានគេរកឃើញតាមរយៈប្រភព Phandroid ។ Qualcomm TOQ ដែលអាចជា Smartwatch របស់ក្រុមហ៊ុន Qualcomm ត្រូវបានរៀបរាប់នៅក្នុងប៉ាតង់ថា ជាឧបករណ៍ទំនាក់ទំនងផ្ទាល់ខ្លួនដែលមានលក្ខណៈជានាឡិកាដៃ និងជាឧបករណ៍អេឡិចត្រូនិកចល័តដែលអាចធ្វើការបញ្ជូន និងអាននូវ Text, data, image, audio files និងមានច្រើនទៀត ។
សូមបញ្ជាក់ថា ស្របពេលដែលទូរស័ព្ទទំនើបកាន់តែមានអេក្រង់ធំៗទៅៗ គេសង្កេតឃើញថា ការស្វែងរកនូវឧបករណ៍អេឡិចត្រូនិកទំនើបថ្មីៗក៏មានការលេចចេញជាបន្តបន្ទាប់ដូចជា វ៉ែនតាទំនើប Google Glass និងនាឡិកាទំនើបជាដើម ។ យ៉ាងណាមិញសម្រាប់នាឡិកាទំនើបដែលត្រូវបានក្រុមហ៊ុនមួយចំនួនកំពុងធ្វើការ និងចរាចរលក់លើទីផ្សារនោះ គឺហាក់មិនទាន់មានសមត្ថភាពខ្ពស់នៅឡើយទេ ព្រោះថាពួកវានៅត្រូវការទូរស័ព្ទទំនើបដើម្បីអាចដំណើរការនូវមុខងារពិសេសៗ ដូច្នេះតើទៅថ្ងៃមុខ អនាគតរបស់នាឡិកាទំនើបអាចនឹងឈានដល់កម្រិតណា ស្របពេលដែលក្រុមហ៊ុន Apple និង Samsung មិនទាន់បានបញ្ចេញនូវផលិតផលនេះនៅឡើយ ?
