ផលិត Oppo Find 5 ថ្មីដោយបំពាក់ CPU Snapdragon 600
Oppo Find 5 គឺជាទូរស័ព្ទទំនើប និងជាទូរស័ព្ទឆ្នើមរបស់ក្រុមហ៊ុន Oppo Electronics Corp., Ltd ដែលត្រូវបានប្រកាសចេញកាលពីចុង ឆ្នាំ២០១២ ។ ដោយឡែកបន្ទាប់ពីទូរស័ព្ទត្រូវបានចេញលក់នៅលើទីផ្សារមក យើងបានទទួលនូវព័ត៌មានជាច្រើនដែលចេញផ្សាយថា ក្រុមហ៊ុននឹងប្រកាសចេញនូវទូរស័ព្ទជំនាន់ថ្មីផ្សេងទៀតរបស់ខ្លួនសម្រាប់ឆ្នាំ២០១៣ ដែលទូរស័ព្ទទាំងនោះ អាចជា Oppo Find 6 និង Oppo Find 7 ។ ប៉ុន្តែទូរស័ព្ទទាំងពីរម៉ូដែលនេះមិនទាន់ត្រូវបានក្រុមហ៊ុនប្រកាសចេញនៅឡើយទេមកដល់ពេលនេះ ។
យ៉ាងណាមិញពេលនេះក្រុមហ៊ុន Oppo ទើបតែបានប្រកាសចេញនូវទូរស័ព្ទ Oppo Find 5 ម៉ូដែលថ្មីដែលត្រូវបានបំពាក់ដោយ CPU Snapdragon 600 និងដំណើរការដោយប្រព័ន្ធប្រតិបត្តិការ Android 4.2 Jelly Bean ។ ទូរស័ព្ទ Oppo Find 5 ម៉ូដែលមុនដែលត្រូវបានក្រុមហ៊ុនចេញលក់ក្នុងពេលបច្ចុប្បន្ន គឺត្រូវបានបំពាក់ដោយ CPU Qualcomm Snapdragon S4 Pro processor and និងដំណើរការដោយ Android 4.1.2 Jelly Bean ដោយឡែកក្រៅពីលក្ខណសម្បត្តិទាំងពីរនេះទូរស័ព្ទ Oppo Find 5 ទាំងពីរម៉ូដែលគឺមិនមានអ្វីផ្សេងដែលត្រូវផ្លាស់ប្ដូរឡើយ ដូចជា កាមេរ៉ាមុខ 19MP ក្រោយ 13MP អេក្រង់ 5-inch Full HD និង RAM 2GB ជាដើម(អានលំអិត) ។
បើយោងទៅតាមប្រភព Phone Arena បានឲ្យដឹងថា ថ្វីបើទូរស័ព្ទ Oppo Find 5 ថ្មីត្រូវបានបំពាក់ដោយ CPU Snapdragon 600 និងដំណើរការដោយ Android 4.2 Jelly Bean ប៉ុន្តែសម្រាប់តម្លៃទូរស័ព្ទនេះនឹងមិនខុសគ្នាទៅនឹងម៉ូដែលមុននោះទេ ដែលមានតម្លៃប្រហែល $516 (ម៉ូដែល 16 GB) និង $555 (ម៉ូដែល 32 GB) ៕
