ផ្ទុះiPhone 4 ក្លាយជាភ្លើងដុត គ្រែខណៈពេល កំពុងគេង
ថ្ងៃនេះគេទើបតែទទួលបានរូបភាពនៃទូរស័ព្ទទំនើប iPhone 4 របស់ក្រុមហ៊ុន Apple ដែលស្ទើរតែមិនគួរឲ្យជឿ ព្រោះថា រូបដែលទទួលបានគឺ ជាការបង្ហាញឲ្យដឹងថា ទូរស័ព្ទ iPhone 4 ត្រូវបានផ្ទុះក្លាយជាភ្លើងមកដុតគ្រែគេងរបស់អ្នកប្រើទៅវិញនៅក្នុងខណៈពេលគេកំពុងគេង និងសាកថ្មចោល ។
បុរសឈ្មោះ Wang Kailin ម្ចាស់ទូរស័ព្ទ iPhone 4 ដែលត្រូវបានផ្ទុះក្លាយជាភ្លើងបានរៀបរាប់ថា គាត់បានទុកទូរស័ព្ទ iPhone 4 របស់គាត់ទៅក្នុងខ្នើយមួយអស់រយៈពេលពីរយប់ បន្ទាប់មកគាត់បានដកវាចេញហើយទុកចោលជាច្រើនម៉ោងក្រោយមក ទូរស័ព្ទនោះមិនបានបញ្ចេញសញ្ញាណអ្វីដែលមិនប្រក្រតីនោះទេ តែវាក៏ត្រូវបានផ្ទុះក្លាយជាភ្លើងតូចដែលអាចដុតគ្រែគាត់ឲ្យឆេះបាន សំណាងល្អគាត់បានឭសំឡេងផ្ទុះនោះ ហើយប្រសិនជាគាត់ត្រូវបានគេងលក់យ៉ាងស្កប់ស្គាល់នៅក្នុងពេលនោះវិញ ម្ល៉េះគាត់នឹងត្រូវបាត់បង់យ៉ាងធំ ។
យោងទៅតាមប្រភព ‘Yangzi Evening News’ ដែលជាអ្នកជំនាញប្រឹក្សាយោបល់បានឲ្យដឹងថា ករណីផ្ទុះទូរស័ព្ទខាងលើ គឺអាចបណ្ដាលមកពីថ្មរបស់ទូរស័ព្ទ ។ ប៉ុន្តែមិនមានអ្វីដែលអាចបញ្ជាក់ឲ្យច្បាស់នោះទេ ទៅនឹងបញ្ហាបច្ចេកទេសផលិត ឬ អាចបណ្ដាលពីការត្រូវទឹក ។ សូមបញ្ជាក់ថា iPhone គឺមិនចេះតែផ្ទុះដោយងាយៗនៅគ្រប់ទីកន្លែងនោះទេ ដូច្នេះវាអាចបណ្ដាលមកពីកត្តាមួយចំនួនដែលបានកើតឡើងចំពោះទូរស័ព្ទលោក Wang ជាជាងបញ្ហានៃបច្ចេកទេសផលិតរបស់ក្រុមហ៊ុន Apple ។
តាមរយៈនេះផងដែរ ប្រភព Techinasia បានរំលឹកថា ប្រសិនបើការផ្ទុះនោះបណ្ដាលមកពីថ្មទូរស័ព្ទគឺ វាពិតជាកម្រណាស់ ប៉ុន្តែវាក៏ជាហេតុផលមួយយ៉ាងល្អផងដែរ សម្រាប់យើងដែលត្រូវការគេងជាមួយនឹងទូរស័ព្ទ ។ ជាការគាប់យើងត្រូវទុកទូរស័ព្ទឲ្យនៅកន្លែងណាមួយដែលមានសុវត្ថិភាពសម្រាប់ពេលយប់ និងត្រូវធ្វើការប្ដូរថ្មចេញភ្លាមប្រសិនប្រើមានករណីមិនប្រក្រតីណាមួយដែលទាក់ទងទៅនឹងថ្មរបស់ទូរស័ព្ទ ។
គូររំលឹកផងដែរថា នេះជាព័ត៌មានទីពីរហើយដែលយើងបានឮថា ថ្មរបស់ទូរស័ព្ទ ឬកុំព្យូទ័របន្ទះស្ដើងត្រូវបានផ្ទុះ ដែលព័ត៌មានយើងទទួលបានលើកទីមួយគឺ ពិតទេថា Nexus 7 ត្រូវបានផ្ទុះហុយផ្សែងខណៈពេលកំពុងសាកថ្ម ? ហើយព័ត៌មានទាំងនោះគឺ សុទ្ធតែត្រូវបានចេញពីប្រភពប្រទេសចិនទាំងអស់ ៕
