បុរសម្នាក់ត្រូវ រថយន្តបុកធ្លាយ ពោះវៀនស្លាប់ភ្លាម ៗនៅនឹងកន្លែង
ខេត្តកណ្តាល ៖ មានហេតុការណ៍គ្រោះថ្នាក់ចរាចរណ៍មួយបានកើតឡើង កាលពីវេលាម៉ោង ២ រសៀល ថ្ងៃទី១៥ ខែកក្កដា ឆ្នាំ២០១៣ ស្ថិតនៅលើកំណាត់ផ្លូវជាតិ លេខ១ ក្នុងភូមិស្តៅកន្លែង ស្រុកកៀនស្វាយ ដែលបណ្តាលឲ្យ បុរសម្នាក់បានស្លាប់បាត់បង់ជីវិតភ្លាមៗ បន្ទាប់ពីត្រូវរថយន្តដឹកទឹកកកមួយគ្រឿង បុកពេញទំហឹងបណ្តាលឲ្យធ្លាយពោះវៀនចេញមកក្រៅ។
បើតាមប្រភពព័ត៌មានពីកន្លែងកើតហេតុបានឲ្យដឹងថា ជនរងគ្រោះដែលបានស្លាប់បាត់បង់ជីវិតមាន ឈ្មោះ សាត់ ប៊ុនធឿន អាយុ ២៣ឆ្នាំ ស្នាក់នៅភូមិស្តៅកន្លែង ស្រុកកៀនស្វាយ ខេត្តកណ្តាល។ ចំណែកអ្នកបើករថយន្តបង្កមិនត្រូវបានស្គាល់អត្តសញ្ញាណនោះទេ ព្រោះក្រោយពេលកើតហេតុ គេឃើញតៃ កុងឡានបានបើកទ្វាររត់គេចខ្លួនបាត់ស្រមោល។
ប្រភពដដែលបានបន្តឲ្យដឹងទៀតថា មុនពេលកើតហេតុគេបានឃើញជនរងគ្រោះបានជិះម៉ូតូហុងដា សេ១២៥ ពណ៌ខ្មៅ មួយគ្រឿង ពាក់ស្លាកលេខ ភ្នំពេញ 1Q-1541 លើកំណាត់ ផ្លូវជាតិលេខ១ ក្នុងទិសដៅពីត្បូងទៅជើង ស្រាប់តែដល់ចំណុចកើតហេតុ ក៏ត្រូវរថយន្តដឹកទឹកកកមួយគ្រឿង ម៉ាកហ៊ីយ៉ាន់ដាយ ពណ៌ត្រួយចេក ពាក់ស្លាកលេខ ភ្នំពេញ 3A-9832 បើកបរក្នុងទិសដៅ ពីលិចទៅកើត ចេញពីរាជធានីភ្នំពេញ ឆ្ពោះទៅអ្នកលឿង បុកចំពាក់កណ្តាលម៉ូតូយ៉ាងពេញទំហឹង បណ្តាលឲ្យគាបជាប់ក្រោមរថយន្ត អូសជាង១០ម៉ែត្រ ធ្វើឲ្យជនរងគ្រោះធ្លាយពោះវៀនស្លាប់នៅនឹងកន្លែងភ្លាមៗ។
ក្រោយកើតហេតុ សមត្ថកិច្ចមូលដ្ឋានបានចុះទៅអន្តរាគមន៍ ដើម្បីធ្វើការវាស់វែង និងបាននាំយករថយន្តបង្កនិងម៉ូតូរបស់ជនរងគ្រោះទៅរក្សាទុកនៅអធិការដ្ឋានគរបាលស្រុកកៀនស្វាយ ដើម្បីរង់ចាំធ្វើការដោះស្រាយទៅតាមនីតិវិធីច្បាប់ ។ ចំណែកសាកសពជនរងគ្រោះ ត្រូវបានក្រុមគ្រួសារយកទៅធ្វើបុណ្យតាមប្រពៃណី៕
_________________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
