រថយន្តកុងតឺន័រ បើកលឿនបុកម៉ូតូ គុបអូសជាង ១០ម៉ែត្រស្លាប់ម្នាក់
ភ្នំពេញ ៖ បុរសវ័យជាង៣០ឆ្នាំម្នាក់បានស្លាប់យ៉ាងអានោចអាធម៏ ខណៈដែលរូបគាត់កំពុងជិះម៉ូតូហើត្រូវបានរថយន្តកុងតឺន័របុកចំពីមុខយ៉ាងពេញទំហឹងហើយអូសជាង១០ម៉ែត្រគាបជាប់និងកង់រថយន្ត។
ហេតុការណ៍គ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង ១០ និង ១០នាទី យប់ថ្ងៃទី១១ កក្កដា ២០១៣ ស្ថិតក្នុងសង្កាត់ទូលទំពូងទី២ ខណ្ឌចំការមន រាជធានីភ្នំពេញ។ តាមប្រភពព័ត៌មានពីកន្លែងកើងហេតុបានឲ្យដឹងថា មុនពេលកើតហេតុគេបានឃើញជនរងគ្រោះជិះម៉ូតូម៉ាកគុបជ្រុង ពណ៌ទឹកប៊ិច ពាក់ស្លាកលេខ ឌ-3177 ភព1 ធ្វើដំណើរតាមបណ្តោយផ្លូវ២៧១ ក្នុងទិសដៅពីជើងទៅត្បូង លុះមកដល់ចំណុចមុខភ្នំពេញក្លិបស្ពត ក៏ត្រូវរថយន្តកុងតឹន័រ ១គ្រឿង ពណ៌បៃតង ពាក់ស្លាកលេខ ភ្នំពេញ 3C-0061 ដែលបើកបញ្ច្រាសទិសគ្នា បានបើកវ៉ារថយន្ត ១គ្រឿងទៀត ហើយរេចង្កូតជ្រុលទៅបុកម៉ូតូគុប យ៉ាងពេញទំហឹង អូសជាង ១០ម៉ែត្រ បណ្តាលឲ្យស្លាប់ភ្លាមតែម្តង ។
ប្រភពដដែលបានបន្តទៀតថា ក្រោយពីកិនមុនុស្សស្លាប់ហើយតៃកុង បានបើទ្វាចុះរត់គេចខ្លួនបាត់ស្រមោលបន្សល់ទុកតែរថយន្តនៅកន្លែងកើតហេតុ។ បច្ចុប្បន្នសពត្រូវបានក្រុមគ្រួសារមកទទួលយកទៅធ្វើបុណ្យតាមប្រពៃណី ចំណែកម៉ូតូនិងរថយន្តត្រូវបានសមត្ថកិច្ចជំនាញយកទៅរក្សាទុកនៅការិយាល័យចរាចរណ៍ជើង គោករាជធានីភ្នំពេញ ដើម្បីរង់ចាំការដោះស្រាយតាមផ្លូវច្បាប់ ៕
