សុគន្ធ និសា បោះបង់អ្នកក្រៅ ស្រវាអ្នកក្នុងស្រុកវិញ
ភ្នំពេញៈ បើគិតតាំងពីអំឡុងពេលបែកបាក់ស្នេហ៍ជាមួយនឹងប្រុសបណ្តូលស្នេហាជាកវី និងអ្នកដឹកនាំការសម្តែងល្បីឈ្មោះលោក សុខ ជំនោរមកនាង សុគន្ធ និសា បានចំណាយពេលជាច្រើនដើម្បីចេញច្រៀងនៅក្រៅប្រទេសក្នុងបំណងដើម្បីស្រាយភាពតានតឹងនៅក្នុងអារម្មណ៍វិលវល់នៃចំណងស្នេហ៍ជិត១០ឆ្នាំត្រូវបែកបាក់។ ការបន្ធូរដៃនៅក្រៅស្រុក ដើម្បីគេចមុខប្រុសស្នេហ៍នេះ សុគន្ធ និសា បានធ្លាក់ប្រជាប្រិយយ៉ាងគំហុកនៅក្នុងស្រុក។ដោយសារមូលហេតុនេះ ទើបនាងបញ្ជាក់នៅពេលនេះថា នាងនឹងផ្អាកការចេញច្រៀងនៅក្រៅប្រទេសជាច្រើនឆ្នាំ និងចាប់ផ្តើមលេងស្ទីលសាហាវៗដើម្បីស្តារមុខមាត់ឡើងវិញ។
តារាចម្រៀងដែលមានត្រេមុខស្រគត់ស្រគំសុភាពរាបសានាង សុគន្ធ និសា បានជះប្រាក់ទាំងដុំទិញផ្ទះល្វែងមួយជុង តម្លៃ៦ម៉ឺនដុល្លារដោយបង់ផ្តាច់ ហើយនាងទើបតែបើកហាង២កន្លែងបន្ថែមទៀត បន្ថែមលើហាងមួយកន្លែងនៅជិតផ្សារបឹងត្របែកដែលមានស្រាប់ហើយនាងបានទិញរថយន្តម៉ាកកាម៉ារីបាឡែនមួយគ្រឿងបន្ថែមទៀតលើរថយន្តម៉ាក ឡិចស៊ីស៣០០ដែលនាងមានដើម្បីជិះផ្លាស់ប្តូរគ្នា។
ការចំណាយប្រាក់យ៉ាងច្រើនសន្ធឹកនេះ ត្រូវបានមហាជនសង្ស័យថា តារាចម្រៀងមានមន្តស្នេហ៍រូបនេះទំនងជាលោតឆត្រទទួលយកការលួងលោមស្នេហ៍ពីបុរសមានទ្រព្យណាម្នាក់មិនខាន តែសុគន្ធ និសា បានបញ្ជាក់ថា រូបនាងប្រឹងប្រែងយ៉ាងខ្លាំងទម្រាំតែទទួលបានប្រាក់ទាំងនោះ ពោលគឺនាងមិនបានទទួលការឧបត្ថម្ភពីបុរសណាម្នាក់ឡើយ។
និសាធ្លាប់ប្រាប់ថា៖«ខ្ញុំដឹងថា មានគេនិយាយច្រើនពីបញ្ហាហ្នឹង។ ខ្ញុំចង់បញ្ជាក់ថា រាល់ថ្ងៃខ្ញុំប្រឹងធ្វើការ ទៅច្រៀងនៅបរទេស ទៅមកៗ សន្សំបាន លុយម្តងបន្តិចៗ ទើបអាចសម្រេចបំណងនេះបាន ហើយរឿងមានគេជួយឧបត្ថម្ភ ទិញផ្ទះ បើកហាងអី គឺគ្មានទេ»។
ជាការពិតគេសង្កេតឃើញថា នៅក្នុងអំឡុងពេលនៃការបែកបាក់ស្នេហ៍ជាមួយនឹងលោក សុខ ជំនោរ នោះ សុគន្ធ និសា បានវេចបង្វេចដើរច្រៀងលក់សំឡេងនៅដែនទ្វីបអឺរ៉ុប និងអាមេរិកជាច្រើនលើកស្ទើរគ្មានពេលជាន់ដីស្រុកខ្មែរទេ។ នោះមានផលប្រយោជន៍ពីរសម្រាប់សុគន្ធ និសា ទី១គឺនាងអាចដកឃ្លាសាយចិត្តពីទុក្ខបែកបាក់ស្នេហ៍របស់នាងជាមួយនឹងលោក សុខ ជំនោរ និងទី២ គឺនាងអាចច្បាមពេលរកប្រាក់បានកាន់តែច្រើន។ តែយ៉ាងណាការដើរហើរក្រៅប្រទេសនេះ សុគន្ធ និសា ក៏បានរងហានិភ័យនៅពេលនេះផងដែរ ដោយសារតែប្រជាប្រិយភាពរបស់នាងនារយៈពេលនេះបានធ្លាក់ចុះគួរឲ្យបារម្ភ។ ដោយសារតែមូលហេតុនេះ ទើបសុគន្ធ និសា បានសម្រេចចិត្តយ៉ាងម៉ឺងម៉ាត់នៅពេលនេះថា នាងនឹងផ្អាកការចេញច្រៀងនៅក្រៅប្រទេសជាច្រើនឆ្នាំជាប់ៗគ្នាដើម្បីពង្រឹងការងារនៅក្នុងស្រុកឡើងវិញ។
តារាចម្រៀងដែលអះអាងថា បេះដូងនៅតែស្អាតស្អំរូបនេះបានប្រាប់សារព័ត៌មានថា៖«ខ្ញុំទៅអាមេរិក បារាំង អូស្ត្រាលី កាណាដា អស់ហើយ ពេលនេះខ្ញុំសម្រេចចិត្តលែងចេញទៅក្រៅស្រុក២-៣ឆ្នាំសិន ដោយសារតែចង់ពង្រឹងការងារនៅក្នុងស្រុកសិន ព្រោះតែប៉ុន្មានឆ្នាំនេះ ខ្ញុំបានចេញទៅក្រៅរហូតពេក»។
បន្ថែមលើការតាំងចិត្តវាយលុកទីផ្សារជាថ្មីនេះ សុគន្ធ និសា ក៏បានចំណាយប្រាក់ជាច្រើនដើម្បីជួលគ្រូជំនាញបង្ហាត់ក្បាច់រាំពិសេសៗដល់នាងដែរ។
សុគន្ធ និសា ប្រាប់ថា៖«ពេលនេះ ខ្ញុំកំពុងតែចាប់ផ្តើមហាត់ក្បាច់រាំ ដោយជួលគ្រូរាំជំនាញមក។ តាមចិត្តខ្ញុំចង់ឡើងឆាករាំឲ្យបានឆាប់កាលណា កាន់តែល្អ តែយើងធ្វើទៅតាមដំណាក់កាលសិន ព្រោះ ដូចដឹងហើយថា ការរាំក្បាច់សាហាវៗអី មិនមែនជា និស្ស័យខ្ញុំទេ»៕
__________________________
ប្រភពព័ត៌មានពី៖ ខ្មែរប៉ុស្តិ៍
ប្រភពព័ត៌មានពី៖ ខ្មែរប៉ុស្តិ៍
