ប៉ូលិសបញ្ចូន យុវជនម្នាក់ ដែលឡើងផ្ទះ ចាប់រំលោភប្រពន្ធគេ ទៅតុលាការ
ខេត្តតាកែវ: យុវជនម្នាក់ ត្រូវបានប៉ូលិសចាប់ដាក់ខ្នោះ បញ្ជូនទៅតុលាការ ខេត្ដតាកែវ កាលពីថ្ងៃទី២៤ ខែកក្កដា ឆ្នាំ២០១៣ ដោយសារយុវជនរូបនោះ បានលបឡើងផ្ទះចាប់រំលោភប្រពន្ធគេកាលពីយប់ថ្ងៃទី២២ ខែកក្កដា ឆ្នាំ២០១៣ វេលាម៉ោង ១០យប់ ស្ថិតនៅភូមិជំពូព្រឹក ឃុំចំប៉ា ស្រុកព្រៃកប្បាស ខេត្ដតាកែវ។ប៉ូលិសបានចាប់ខ្លួនយុវជនខាងលើតាមពាក្យបណ្ដឹងក្រុមគ្រួសារស្ដ្រីរងគ្រោះ កាលពីថ្ងៃទី២៣ ខែកក្កដា ឆ្នាំ២០១៣។លោក ហ៊ុន ហែម ប្រធានការិយាល័យព្រហ្មទណ្ឌកំរិតធ្ងន់ បានអោយដឹងថា ជនសង្ស័យ ឈ្មោះ ជ្រិន ស៊ីណន អាយុ ២៣ឆ្នាំ។ ចំណែកស្ដ្រីរងគ្រោះ អាយុ១៨ឆ្នាំ។ ជនសង្ស័យ និងស្ដ្រីរងគ្រោះ រស់នៅភូមិឃុំកើតហេតុជាមួយគ្នា។
ស្ដ្រីរងគ្រោះ បានបញ្ជាក់ថា ពេលជនសង្ស័យឡើងលើផ្ទះប៉ុនប៉ងចាប់រំលោភរូបនាង នាងមិនដឹងថា ជាអ្នកណាទេ គ្រាន់តែសង្ស័យតែប៉ុណ្ណោះ ប៉ុន្ដែដល់ព្រឹកឡើង ជនសង្ស័យបានមករកទូរស័ព្ទ ដែលជ្រុះដល់ផ្ទះ ពេលនោះ រូបនាងក៏សង្ស័យ ហើយបានទៅប្ដឹងប៉ូលិសទៅ។ ស្ត្រីរងគ្រោះ ទាមទារប្រាក់សំណង ចំនួន ១ លាន៧០ម៉ឺនរៀល។ជនសង្ស័យបានឆ្លើយសារភាពប្រាប់ប៉ូលិសថា រូបគេពិតជាបានឡើងទៅលើផ្ទះ ប៉ុនប៉ងចាប់រំលោភស្ដ្រីរងគ្រោះ ពិតប្រាកដមែន ព្រោះតែរូបគេផឹកស្រាស្រវឹងខ្លាំងពេក ហើយមិនដឹងខុសត្រូវអ្វីឡើយ៕ ប្រភព CEN
