​យើង​នឹងមិន​បន្ទោស អ្នក​នោះទេ​ប្រសិនបើ​អ្នក មិន​ធ្លាប់​ដឹង​ពី​ប្រភេទ​ទូរស័ព្ទ Vivo X1​។ ផលិត​ដោយ​ក្រុមហ៊ុន Chinese BBK Electronics ទូរស័ព្ទ​ស្មា​ត​ហ្វូ​ន Vivo X1 ទោះជា​យ៉ាង ណា​ក៏មាន​តម្លៃនឹង​ឲ្យ​គេ​និយាយ​អំពី​វា​ដែរ ព្រោះ​វា ​បានចេញ​លក់​ហើយ និង​បាន​ក្លាយជា​ស្មា​ត​ហ្វូ​ន​ស្តើង​ជាងគេ​បំផុត​លើ​ពិភពលោក​ថែមទៀត​ផង ។​

         ​មិន​ត្រឹមតែ​ប៉ុណ្ណឹង​នោះទេ វា​ថែមទាំង​មាន​គុណភាព​សំឡេង​ខ្ពស់​ដាច់​គេ និង មាន​សមត្ថភាព​ស្មើនឹង​ទូរស័ព្ទ​ស្តាប់ ត្រចៀក Beyerdynamic MMX 71 iE ។ ទូរស័ព្ទ​នេះ​ដំណើរការ​លើ​ប្រព័ន្ធ​ប្រតិបត្តិការ Android 4.1 Jelly Bean និង មានតម្លៃ​សមរម្យ គឺ ៤០០ ដុល្លារ ។​

         ​អ្វីដែល​ជាទី​ចាប់អារម្មណ៍​បំផុត​នោះ គឺថា ស្មា​ត​ហ្វូ​ន Vivo X1​នេះ​គឺជា​ស្មា​ត​ហ្វូ​ន​ស្តើង​ជាងគេ​បំផុត​លើ​ពិភពលោក ដោយមាន​កម្រាស់​ត្រឹមតែ ០,២៦ អ៊ី​ញ​ប៉ុណ្ណោះ ។ ហើយ​វា​នៅតែ​អាចដាក់​ថ្ម​កម្លាំង 2,000mAh បាន​ថែមទៀត ។ ហើយ​ប្រសិនបើ​អ្នក​ឆ្ងល់​ថា​តើ​ក្រុមហ៊ុន BBK Electronics គឺជា​ក្រុមហ៊ុន​ប្រភេទ​ស្អី នោះ​វា​គឺជា​ក្រុមហ៊ុន​ផលិត ទូរស័ព្ទ​របស់​ចិន​ដែល​ដំណើរការ​ក្រោម​ស្លាក​សញ្ញា​ផ្សេងគ្នា​ជាច្រើន​ដូចជា Vivo ជាដើម និង នាំចេញ​ភាគច្រើន ទៅ​ប្រទេស​រុស្ស៊ី ។ ថ្មីៗ​នេះ ក្រុមហ៊ុន​នេះ​ក៏​កំពុង​ចាប់ផ្តើម​លក់​ក្រោម​ស្លាក​សញ្ញា Oppo សម្រាប់​សហរដ្ឋអាមេរិក ផងដែរ ។​
​សំឡេង​របស់​ទូរស័ព្ទ​នេះ​ឮ​ច្បាស់​ល្អ​ណាស់ ព្រោះតែ​វា​ត្រូវបាន​បំពាក់​ជាមួយនឹង Cirrus Logic CS4398 digital-analog converter និង CS8422 sample-rate converter សម្រាប់​អូ​ឌី​យ៉ូ ។ ក្រៅពីនេះ ស្មា​ត​ហ្វូ​ន Vivo X1 មាន​បំពាក់ Processor MediaTek MT6577T ប្រភេទ Dual-core Cortex A9 ល្បឿន 1.2GHz និង RAM ទំហំ 1 GB ។​
Vivo X1 មាន​អេក្រង់​ប្រភេទ qHD ទំហំ ៤,៧ អ៊ី​ញ (540 x 960-pixel) និង កាមេរ៉ា​ខាងក្រោយ​ទំហំ ៨ មេ​ហ្គា​ភិ​ច​សែ​ល និង​កាមេរ៉ា​មុខ​ទំហំ ១,៣ មេ​ហ្គា​ភិ​ច​សែ​ល ។ ចំពោះ​ការផ្ទុក​ទិន្នន័យ​ខាងក្នុង​វិញ វា​មាន​មែ​ម​ម៉ូ​រី ទំហំ ១៦ GB និង ប្រព័ន្ធ 3G ផងដែរ ។​

         ​ហើយ​ប្រសិនបើ​ត្រឹម​ស្មា​ត​ហ្វូ​ន Vivo X1 នេះ​មិនទាន់​គ្រប់គ្រាន់​ទៀត ក្រុមហ៊ុន​បានធ្វើ​តេស្ត​ស្មា​ត​ហ្វូ​ន​ក្រោយ​របស់ ខ្លួន​រួចហើយ​ផងដែរ នោះ​គឺ​ស្មា​ត​ហ្វូ​ន​ដែល​អាច​ថតរូប​ភាព​ក្នុង​ទំហំ ១០៨០ ភិ​ច​សែ​ល​ដោយ​គ្មាន​មុខ​ទេរ​, មាន​ថ្ម កាន់​បានយូរ និង មាន​កាមេរ៉ា​ទំហំ ១៣ មេ​ហ្គា​ភិ​ច​សែ​ល ៕​