ក្រុមហ៊ុន ZTE នឹងបញ្ចេញទូរស័ព្ទ Grand S Flex និង Blade G នៅចុងឆ្នាំនេះ
ក្រុមហ៊ុន ZTE បានប្រកាសចេញទូរស័ព្ទទំនើប Grand S តាំងពីខែមករា ឆ្នាំ២០១៣ នេះមកម្ល៉េះ ហើយនៅពេលនោះ ZTE Grand S គឺជាទូរស័ព្ទទំនើបដែលស្ដើងជាងគេគឺមានកម្រាស់ត្រឹមតែ ៦,៩ មម នេះបើយោងតាមប្រភពពី unviredview.com ។ បើផ្អែកលើថាមពលថ្មទំហំ 1,780mAh ដែលមានសម្រាប់ ZTE Grand S នោះគឺមិនសាកសមនឹងទូរស័ព្ទទំនើបដែលបំពាក់ដោយ CPU Quad-core និង អេក្រង់ Full HD នោះទេ មានន័យថាក្រុមហ៊ុនគួរតែផលិតទូរស័ព្ទទំនើបដែលមានថាមពលថ្មធំជាងនេះ ។
ដើម្បីកែតម្រូវនូវកំហុងឆ្គងដែលបានពោលខាងលើនោះ ពេលនេះក្រុមហ៊ុន ZTE កំពុងតែត្រៀមនឹងបញ្ចេញ ZTE Grand S ជំនាន់ថ្មីគឺ ZTE Grand S Flex ដែលមានសមត្ថភាពផ្ទុកថាមពលថ្មរហូតដល់ 2,300mAh ប៉ុន្តែវានឹងធ្វើឲ្យទូរស័ព្ទនេះមានកម្រាស់ក្រាស់ជាង ZTE Grand S ។ ប្រភពពីគេហទំព័រ Frandroid បានឲ្យដឹងថាក្រុមហ៊ុន ZTE នឹងចាប់ផ្ដើមបញ្ចេញ ZTE Grand S Flex ទៅលើទីផ្សារប្រទេសបារាំងនៅក្នុងខែកញ្ញា ឆ្នាំ២០១៣ ។ បើពិនិត្យលើរូបភាពរបស់ Grand S Flex ដែលបង្ហាញខាងក្រោម អាចបង្ហាញបានថាទូរស័ព្ទទំនើបនេះមានរូបរាងមិនខុសពីរៀមច្បងរបស់ខ្លួននោះទេ ។
ទូរស័ព្ទទំនើបមួយម៉ូដែលទៀតរបស់ ZTE ដែល Frandroid បានលើកឡើងនោះគឺ ZTE Blade G ដែលមានលក្ខណសម្បត្តិបច្ចេកទេសមួយចំនួនដូចជា៖ អេក្រង់ទំហំ 4.5-inch កម្រិតភាពច្បាស់ 854 x 480 pixels, CPU Dual-core 1.2GHz (Qualcomm), RAM 512 MB និង ថាមពលថ្ម 2,000mAh ។ ប្រភពដដែលខាងលើបានបញ្ជាក់ផងដែរថាទូរស័ព្ទទំនើប ZTE Grand x2 ដែលក្រុមហ៊ុនបានប្រកាសចេញកាលពីដើមខែឧសភា នឹងត្រូវបញ្ចេញទៅលើទីផ្សារប្រទេសបារាំងនៅបំណាច់ខែកញ្ញា ប៉ុន្តែចំពោះតម្លៃរបស់ទូរស័ព្ទទំនើបទាំងបីគ្មានប្រភពណាមួយអាចបញ្ជាក់នៅឡើយទេ ៕
