ប៉េកាំងៈ អ្នកនាំពាក្យ របស់រដ្ឋមន្រ្តីការបរទេសចិន កាលពីថ្ងៃអង្គារកន្លងទៅនេះ បានសម្តែងការអបអរសាទរ ចំពោះបេក្ខភាពប្រចាំប្រទេសចិន ដែលបានទទួលជោគជ័យ ក្នុងការបោះឆ្នោតក្លាយជាអគ្គលេខាធិការ នៃ អង្គការអភិវឌ្ឍឧស្សាហកម្ម របស់អង្គការសហប្រជាជាតិ ដែលហៅកាត់ថា UNIDO។

ទីភ្នាក់ងារសារព័ត៌មាន ចិនស៊ិនហួ ចុះថ្ងៃទី២៦ ខែមិថុនា ឆ្នាំ២០១៣នេះបានឲ្យដឹងថា លោក លីយ៉ុង អនុរដ្ឋមន្ត្រីហិរញ្ញវត្ថុប្រទេស ចិន ត្រូវបានជាប់ឆ្នោតកា្លយជាអគ្គលេខាធិការនៃអង្គការ UNIDO កាលពីថ្ងៃចន្ទ កន្លងទៅនេះ។

ប្រភពដដែលបានឲ្យដឹងថា លោក លី នឹងត្រូវបានតែងតាំងជាផ្លូវការជាអគ្គលេខាធិការក្នុងមហាសន្និបាត នា ថ្ងៃទី២៨ ខែមិថុនា ខាងមុខ។ លោកស្រី Hua Chunying  អ្នកនាំពាក្យម្នាក់បានឲ្យដឹងថា លោក លី បានចូលរួម ក្នុងការងារកិច្ចសហប្រតិបត្តិការអភិវឌ្ឍន៍លើឆាកអន្តរជាតិជាច្រើន ព្រមទាំងមានប្រវតិ្តការងារ ក៏ដូចជា បទពិសោធន៍ក្នុងការងារយ៉ាងល្អប្រសើរ។

អ្នកនាំពាក្យរូបនេះបានបន្តថា ប្រទេស ចិនមានការជឿជាក់ថា លោក លី អាចមានសមត្ថភាពគ្រប់គ្រាន់ ក្នុងការ ដឹកនាំអង្គការ UNIDO បានប្រសើរ ដើម្បីបម្រើប្រយោជន៍ដល់ប្រទេសជាសមាជិកទាំងអស់ ស្របគ្នានឹង ការ ជំរុញកិច្ចសហប្រតិបត្តិការលើការអភិវឌ្ឍ ប្រកបដោយចេរភាព និងការអភិវឌ្ឍន៍វិស័យឧស្សាហកម្មអន្តរជាតិ។

លោកស្រី Hua បានបង្ហាញការកត់សម្គាល់ថា រដ្ឋាភិបាលចិន បានយកចិត្តទុកដាក់ខ្ពស់លើ UNIDO ព្រមទាំងបានធ្វើកិច្ចសហប្រតិបត្តិការ ជាមួយអង្គការនេះយ៉ាងមានប្រសិទ្ធភាព។ រដ្ឋាភិបាល ចិន នឹងគាំទ្រដល់កិច្ចការងារក្នុងនាមជាអគ្គលេខាធិការថ្មី ដើម្បីបង្កើននូវតួនាទីរបស់ UNIDO ក្នុងការអភិវឌ្ឍ ឧស្សាហកម្មទូទាំងពិភពលោក៕