ក្រុមហ៊ុន​ Apple អាច​នឹង​មាន​គម្រោង​បន្ថែម​ម៉ូដែល​ថ្មីៗ​ទៅ​លើ​ទូរស័ព្ទទំនើប​ខ្សែស្រឡាយ​ iPhone របស់​ខ្លួន​ ដោយ​បន្ថែម​នូវ​ iPhones ម៉ូដែល​ថ្មី​ដែល​មាន​អេក្រង់​រហូត​ដល់ទំហំ 4.7-inch និង 5.7-inch និង​ ម៉ូដែល​មួយ​ទៀត​នោះ​គឺ​ទូរស័ព្ទតម្លៃ $99 ដែល​មាន​ច្រើន​ពណ៌ នេះ​បើ​យោង​​ទៅ​តាម​ប្រភព​ពី​គេហទំព័រ​ Reuters ។

ប្រភព​ដដែល​នេះ​បាន​បន្ថែម​ទៀត​ថា​​គម្រោង​នេះគឺស្ថិត​ក្នុង​​​ដំណាក់ការ​​ពិភាក្សា​នៅ​ឡើយ​ទេ ប៉ុន្តែ​​​បញ្ជាក់​​ឲ្យ​ឃើញ​ថា​ក្រុមហ៊ុន​​កំពុង​តែ​មាន​បំណង​ទាញ​យក​ចំណែក​ទីផ្សារ​ពី​​ដៃគូ​ប្រជែង​ដ៏​ខ្លាំង​របស់​ខ្លួន​គឺ​ក្រុមហ៊ុន Samsung ដែល​បាន​​ផលិតនិង​បញ្ចេញ​​ទូរស័ព្ទ​ទំនើប​អេក្រង់​ធំៗ​ឬ​គេ​ឲ្យ​ឈ្មោះ​ថា Phablets យ៉ាង​ច្រើន​ទៅ​លើ​ទីផ្សារ​ ដែល​មាន​ដូច​ជា​ Galaxy Note II ជា​ដើម​ ។ បើ​ទោះ​បី​ជា​ Apple បាន​បដិសេធ​ថា​មិន​ផលិត​ iPhone ដែល​មាន​តួ​ធ្វើ​ពី​ប្លាស្ទិក​និង​មាន​តម្លៃ​ទាប​ក៏​ដោយ​ក៏​នាយក​ប្រតិបត្តិ​របស់​ក្រុមហ៊ុន​ លោក Tim Cook មិន​បាន​បដិសេធឲ្យ​ច្បាស់​លាស់​​ទេ​នៅ​ពេល​ដែល​មាន​សំណួរ​ថា​តើ​ក្រុមហ៊ុន​មាន​ចំណាប់​​អារម្មណ៍​លើ​ទូរស័ព្ទទំនើប​អេក្រង់ធំៗ​នោះ ។

សូម​បញ្ជាក់​ថា​ប្រភព​របស់​ Reuters មិន​ទាន់​អាច​អះអាង​ថា​​ក្រុមហ៊ុន​ Apple ពិត​ជា​នឹង​​អនុវត្ត​គម្រោង​នេះ​​ ១០០% នៅ​នោះ​ទេ​ វា​គ្រាន់​តែ​ជា​ការ​សន្និដ្ឋាន​ជំហាន​ដំបូង​តែ​ប៉ុណ្ណោះ​ ដូច្នេះ​សូម​ប្រិយមិត្ត​រង់ចាំ​តាមដាន​ជា​មួយ​ពពក ៕

រូបភាព​ iPhone concept

រូបគំរូ iPhone តម្លៃ​ទាប

បញ្ជាក់៖ ទាំង​នេះ​ជារូបភាព​គំរូ​ (concept) របស់​ទូរស័ព្ទ​ទំនើប iPhones ដែល​ត្រូវ​បាន​រចនា​ឡើង​ដោយ​​អ្នក​ជំនាញ​មួយ​ចំនួន​ ។ តើ​ប្រិយមិត្ត​យល់​ដូច​ម្ចេច​ដែរ​ចំពោះ​រូប​ទាំង​នេះ​? សូម​បញ្ចេញ​មតិ​ក្នុង​ប្រអប់​ខាង​ក្រោម៖