សប្ដាហ៍នេះ Microsoft Surface Pro ចូលដល់ទីផ្សារតំបន់អាស៊ីអាគ្នេយ៍
Microsoft Surface Pro គឺជាកុំព្យូទ័របន្ទះស្ដើងរបស់ក្រុមហ៊ុន Microsoft ធ្វើការរចនាផលិតឡើងដោយផ្ទាល់ជាមួយនឹងសមត្ថភាពខ្ពស់ប្រហាក់ ប្រហែលគ្នាទៅនឹងកុំព្យូទ័រយួរដៃធម្មតា ។ បើយោងទៅតាមប្រភពព័ត៌មាន TECH IN ASIA បានឲ្យដឹងថា នៅក្នុងសប្ដាហ៍នេះ កុំព្យូទ័របន្ទះស្ដើង Surface Pro ត្រូវបាននាំចូលមកដល់ទីផ្សារតំបន់អាស៊ីអាគ្នេយ៍យើងហើយ ។
ទីផ្សារដំបូងនៅក្នុងតំបន់អាស៊ីអាគ្នេយ៍ដែលទទួលបាននូវ កុំព្យូទ័របន្ទះស្ដើង Surface Pro មុនគេនោះគឺ ប្រទេសសិង្ហបុរី (ថ្ងៃទី ៣មិថុនា) បន្ទាប់មកគឺប្រទេសថៃ (ថ្ងៃទី ៥ មិថុនា ម្សិលមិញ) និងនៅក្នុងថ្ងៃស្អែក(ទី៧ មិថុនា) នៅប្រទេសម៉ាឡេស៊ី ហើយនឹងនៅក្នុងប្រទេសកូរ៉េខាងត្បូង នាថ្ងៃទី ១១ មិថុនា ។
ជាមួយនឹងទម្ងន់ប្រហែល 1kg កុំព្យូទ័របន្ទះស្ដើង Surface Pro ត្រូវបានប្រកាសចេញលក់នៅក្នុងទឹកដីប្រទេសសិង្ហបុរីក្នុងតម្លៃ រហូតដល់ទៅ $950 ឯណោះ ។ ដោយឡែកបន្ទាប់ពី Surface Pro (128 GB) អស់ពីស្ដុកបន្ទាប់ពីចេញលក់បានពីរបីម៉ោង កុំព្យូទ័របន្ទះស្ដើងនេះក៏ត្រូវបានគេរាយការណ៍ថា ក្រុមហ៊ុន Microsoft បានលក់អស់ចំនួន ៤០ ម៉ឺន គ្រឿង (កាលពីពាក់កណ្ដាលខែមិនា) ។ ដូច្នេះ Surface Pro គឺជាកុំព្យូទ័របន្ទះស្ដើងដែលត្រូវបានគេចាប់អារម្មណ៍បំផុតក្នុង ចំណោមកុំព្យូទ័របន្ទះស្ដើងផ្សេងៗទៀតដែលដំណើរការដោយ Windows 8 ។
សូមបញ្ជាក់ថា តាមរយៈព័ត៌មាននេះយើងជឿថា ពេលនេះប្រហែលជាមានក្រុមហ៊ុនមួយចំនួនកំពុងធ្វើការនាំចូលនូវ កុំព្យូទ័របន្ទះស្ដើង Surface Pro មកកាន់ទីផ្សារកម្ពុជាយើងហើយ ប៉ុន្តែចំពោះតម្លៃប៉ុន្មាននោះគឺអាស្រ័យលើការលក់បន្តរបស់ ក្រុមហ៊ុននីមួយៗ ៕
